ପଶ୍ଚିମବଙ୍ଗରେ ସ୍କୁଲ୍‌, କଲେଜ ବନ୍ଦ: ବିବାହ, ଅନ୍ତିମ ସଂସ୍କାର ପାଇଁ ନୂଆ ଗାଇଡ୍‌ଲାଇନ୍‌

କୋଲକାତା: ପଶ୍ଚିମବଂଗରେ ଆଜି ଦିନକରେ ୮ ହଜାରରୁ ଅଧିକ ସଂକ୍ରମଣ ମାମଲା ସାମ୍ନାକୁ ଆସିବା ପରେ ରାଜ୍ୟ ସରକାର ଅଧିକ କଟକଣା ଲାଗୁ କରିଛନ୍ତି। ମୁଖ୍ୟ ଶାସନ ସଚିବ ଏଚ୍ କେ ଦ୍ୱିବେଦୀ ଏକ ସାମ୍ବାଦିକ ସମ୍ମିଳନୀରେ ଘୋଷଣା କରିଛନ୍ତି ଯେ ରାଜ୍ୟରେ ସମସ୍ତ ସ୍କୁଲ୍‌, କଲେଜ ବନ୍ଦ ରହିବ। ରାତି ୧୦ଟାରୁ ଭୋର୍‌ ୫ଟା ମଧ୍ୟରେ କେବଳ ଜରୁରୀ ସେବାକୁ ଅନୁମତି ଦିଆଯିବ। ସପିଂ ମଲ୍‌ ଓ ମାର୍କେଟଗୁଡିକ ୫୦% କ୍ଷମତା ସହିତ ରାତି ୧୦ଟା ପର୍ଯ୍ୟନ୍ତ ଖୋଲା ରହିବ। ଦୂରଗାମୀ ଟ୍ରେନ୍ଗୁଡିକ ସେମାନଙ୍କର ସାଧାରଣ ସମୟ ଅନୁସାରେ ଚଳାଚଳ କରିବେ। କୋଲକାତାର ମେଟ୍ରୋ ଟ୍ରେନ୍ ମଧ୍ୟ ସେମାନଙ୍କର ସାଧାରଣ କାର୍ଯ୍ୟସୂଚୀ ଅନୁଯାୟୀ ଚାଲିବ, କିନ୍ତୁ ୫୦ ପ୍ରତିଶତ କ୍ଷମତା ସହିତ। ପ୍ରାଣୀ ଉଦ୍ୟାନ ସମେତ ସମସ୍ତ ପର୍ଯ୍ୟଟନସ୍ଥଳ ବନ୍ଦ ରହିବ ଏବଂ ସୁଇମିଂ ପୁଲ, ପାର୍ଲର, ସ୍ପା ଏବଂ ଜିମ୍ ଗୁଡିକ ମଧ୍ୟ ବନ୍ଦ କରିବାକୁ କୁହାଯାଇଛି। ସିନେମା ହଲ୍ ୫୦ ପ୍ରତିଶତ କ୍ଷମତାରେ ଚାଲିବ । ସଭା ସମିତି ପାଇଁ ସର୍ବାଧିକ ୨୦୦ ଲୋକ କିମ୍ବା ହଲ୍ କ୍ଷମତାର ୫୦ ପ୍ରତିଶତ ସହିତ ଅନୁମତି ଦିଆଯାଇଛି। ବିବାହ ଉତ୍ସବରେ ୫୦ ଏବଂ ଅନ୍ତିମ ସଂସ୍କାରରେ ମାତ୍ର ୨୦ ଜଣ ଉପସ୍ଥିତ ରହିପାରିବେ।

ମୁଖ୍ୟସଚିବ କହିଛନ୍ତି, ମୁମ୍ବାଇ ଏବଂ ନୂଆଦିଲ୍ଲୀରୁ ବିମାନ ସପ୍ତାହରେ ଦୁଇଥର ଚଳାଚଳ କରିବ ଏବଂ ବ୍ରିଟେନରୁ କୌଣସି ବିମାନକୁ ଅନୁମତି ଦିଆଯିବ ନାହିଁ। ବାର୍ ଏବଂ ରେଷ୍ଟୁରାଣ୍ଟଗୁଡିକ ରାତି ୧୦ଟା ପର୍ଯ୍ୟନ୍ତ ୫୦ ପ୍ରତିଶତ କ୍ଷମତା ସହିତ ଖୋଲା ରହିବାକୁ ଅନୁମତି ଦିଆଯାଇଥିବାବେଳେ ସାଧାରଣ କାର୍ଯ୍ୟ ସମୟ ଅନୁଯାୟୀ ଖାଦ୍ୟ ଏବଂ ଅନ୍ୟାନ୍ୟ ଜରୁରୀ ଦ୍ରବ୍ୟର ଗୃହ ବିତରଣକୁ ଅନୁମତି ମିଳିବ। ବାଣିଜ୍ୟିକ ପ୍ରତିଷ୍ଠାନଗୁଡିକରେ ନିର୍ଦ୍ଦେଶାବଳୀକୁ କଡାକଡି ପାଳନ କରିବା ପାଇଁ ଶିଳ୍ପ, କାରଖାନା, ମିଲ୍, ଚା ବଗିଚା ଏବଂ ଅନ୍ୟାନ୍ୟ ବାଣିଜ୍ୟିକ ପ୍ରତିଷ୍ଠାନଗୁଡିକର ପରିଚାଳନା କମିଟିକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି।
ସୂଚନାଯୋଗ୍ୟ, ପଶ୍ଚିମବଙ୍ଗରେ ଏବେ ଅତି କ୍ଷିପ୍ର ସଂକ୍ରମଣ ଆରମ୍ଭ ହୋଇଯାଇଛି। ଆଜି କୋଲକାତାରେ ୩ ହଜାରରୁ ଅଧିକ ନୂଆ ମାମଲା ଚିହ୍ନଟ ହୋଇଥିବା ଜଣାପଡ଼ିଛି।

ସମ୍ବନ୍ଧିତ ଖବର