ପାକିସ୍ତାନକୁ ଗୁପ୍ତତଥ୍ୟ ଦେବା ଅଭିଯୋଗରେ ସିକ୍ୟୁରିଟି ଗାର୍ଡ ଗିରଫ

କୋଲକାତା : ପାକିସ୍ତାନ ପାଇଁ ଗୁପ୍ତଚର କାମ କରୁଥିବା ଅଭିଯୋଗରେ ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) କୋଲକାତାର ଏକ ହୋଟେଲର ଜଣେ ସୁରକ୍ଷା କର୍ମୀଙ୍କୁ ଗିରଫ କରିଛି। ଶନିବାର ସକାଳଠାରୁ ଏନଆଇଏ ଅଧିକାରୀମାନେ କୋଲକାତା ସମେତ ଦେଶର ପନ୍ଦରଟି ସ୍ଥାନରେ ତଲାସୀ ନେଇଥିଲେ। ତଲାସୀ ସମୟରେ, ଏନଆଇଏ କୋଲକାତାର ତାପସିଆରୁ ଜଣେ ସନ୍ଦିଗ୍ଧ ପାକିସ୍ତାନୀ ଗୁପ୍ତଚରଙ୍କୁ ଗିରଫ କରିଛି। ନ୍ୟୁଟାଉନରେ ଏନଆଇଏ କାର୍ଯ୍ୟାଳୟରେ ତାଙ୍କୁ ପଚରାଉଚରା କରାଯାଉଛି।

ନିକଟରେ ସିଆରପିଏଫ ଯବାନ ମୋତିରାମ ଜାଟଙ୍କୁ ପାକିସ୍ତାନୀ ଗୁପ୍ତଚର ଅଭିଯୋଗରେ ଗିରଫ କରାଯାଇଥିଲା। ତଦନ୍ତକାରୀ ଅଧିକାରୀମାନେ ଏବେ ତାଙ୍କୁ ପଚରାଉଚରା କରୁଛନ୍ତି। ତାଙ୍କଠାରୁ ମିଳିଥିବା ସୂଚନା ଆଧାରରେ, କେନ୍ଦ୍ରୀୟ ସଂସ୍ଥା ଦେଶର ବିଭିନ୍ନ ସ୍ଥାନରେ ତଲାସୀ ଚଳାଇଛି। କେନ୍ଦ୍ରୀୟ ସଂସ୍ଥା ଶନିବାର କୋଲକାତାର ପାର୍କ ସର୍କସ, ମୋମିନପୁର ଏବଂ ଇକବାଲପୁରରେ ଚଢାଉ କରିଛି।

ଅପରେସନ ସିନ୍ଦୁର ପରେ ଏନଆଇଏ ପକ୍ଷରୁ ଦେଶରେ ଥିବା ପାକିସ୍ତାନୀ ଗୁପ୍ତଚରଙ୍କ ଉପରେ କଡ଼ା ନଜର ରଖିଛି । ଦୁଇ ସପ୍ତାହ ତଳେ ୟୁଟ୍ୟୁବର ଜ୍ୟୋତି ମାଲହୋତ୍ରାଙ୍କୁ ଗିରଫ କରାଯାଇଥିଲା । ଆଇଏସଆଇ ସହ ସଂପର୍କ ଅଭିଯୋଗରେ ତାଙ୍କୁ ଗିରଫ କରାଯାଇଥିଲା।