ସିରିୟାରେ ଆମେରିକାର ବିମାନ ଆକ୍ରମଣ; ବରିଷ୍ଠ ଅଲ୍-କାଏଦା ନେତା ନିହତ
ଓ୍ଵାସିଂଟନ୍: ଉତ୍ତରପଶ୍ଚିମ ସିରିୟାରେ ଯୁକ୍ତରାଷ୍ଟ୍ର ଆମେରିକା କରିଥିବା ବିମାନ ଆକ୍ରମଣରେ ବରିଷ୍ଠ ଅଲ୍-କାଏଦା ନେତା ହମିଦ୍ ଅଲ୍-ମତର ନିହତ ହୋଇଥିବା କଥା ଶୁକ୍ରବାର ଦିନ ‘ସେଣ୍ଟ୍ରାଲ୍ କମାଣ୍ଡ୍’ର ମୁଖପାତ୍ର ମେଜର୍ ଜନ୍ ରିଗ୍ସ୍ବି କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ରିଗ୍ସ୍ବି କହିଛନ୍ତି, ‘ଏମ୍କ୍ୟୁ-୯’ ଲଢୁଆ ବିମାନଦ୍ୱାରା ହୋଇଥିବା ଉକ୍ତ ଆକ୍ରମଣରେ କୌଣସି ସାଧାରଣ ନାଗରିକଙ୍କର ମୃତ୍ୟୁ ଘଟିନାହିଁ।
ଏ ସଂକ୍ରାନ୍ତରେ ଜାରି ଏକ ବିବୃତି ଅନୁସାରେ, ଆମେରିକା ଏବଂ ତା’ର ମିତ୍ର ରାଷ୍ଟ୍ରମାନଙ୍କ ପ୍ରତି ଏବେ ମଧ୍ୟ ଅଲ୍-କାଏଦା ବିପଦର କାରଣ ହୋଇ ରହିଛି।
ଏଥିରେ ଉଲ୍ଲେଖ ଅଛି ଯେ, ପୁନର୍ଗଠନ, ବାହ୍ୟ ସଙ୍ଗଠନଗୁଡ଼ିକ ସହାୟତା ଲୋଡ଼ିବା ଏବଂ ବାହ୍ୟ ଅଭିଯାନ ନିମନ୍ତେ ଯୋଜନା କରିବା ଲାଗି ଅଲ୍-କାଏଦା ସିରିୟାକୁ ନିରାପଦ ଆଶ୍ରୟସ୍ଥଳ ଭାବେ ବ୍ୟବହାର କରୁଛି। ସିରିୟା, ଇରାକ୍ ଏବଂ ଅନ୍ୟ ରାଷ୍ଟ୍ରଗୁଡ଼ିକୁ ଧମକ ଦେବା ପାଇଁ ମଧ୍ୟ ଅଲ୍-କାଏଦା ସିରିୟାକୁ ଆଡ୍ଡା ଭାବେ ଉପଯୋଗ କରୁଛି। ଉକ୍ତ ବରିଷ୍ଠ ନେତାଙ୍କୁ ହତ୍ୟା କରିବାଦ୍ୱାରା ଅଲ୍-କାଏଦା ଆମେରିକୀୟ ନାଗରିକ, ଆମେରିକାର ମିତ୍ରରାଷ୍ଟ୍ର ଓ ସାଧାରଣ ଜନତାଙ୍କ ଉପରେ ଆକ୍ରମଣ କରି ପାରିବ ନାହିଁ କି ଷଡ଼ଯନ୍ତ୍ର କରିବାକୁ ତା’ର ସାମର୍ଥ୍ୟ ମଧ୍ୟ ରହିବ ନାହିଁ।
ଆମେରିକୀୟମାନଙ୍କର କ୍ଷତି କରିବାକୁ ଲକ୍ଷ୍ୟ ରଖିଥିବା ଅଲ୍-କାଏଦାର ସଦସ୍ୟ ଏବଂ ଅନ୍ୟ ଆତଙ୍କବାଦୀ ସଙ୍ଗଠନଗୁଡ଼ିକ ଉପରେ ଯୁକ୍ତରାଷ୍ଟ୍ର ଆମେରିକା ଆକ୍ରମଣ ଜାରି ରଖିବ।