୩୨ ମିନିଟ ଭାଷଣରେ ୧୭ ଥର ଯୋଗୀଙ୍କ ନାମ ନେଇ ଏହି ବାର୍ତ୍ତା ଦେଲେ ଶାହା
ନୂଆଦିଲ୍ଲୀ: ଭାରତୀୟ ଜନତା ପାର୍ଟି (ବିଜେପି) ର ସଦସ୍ୟତା ଅଭିଯାନ ଆରମ୍ଭ କରିବାକୁ ଲଖନଉ ଆସିଥିବା କେନ୍ଦ୍ର ଗୃହମନ୍ତ୍ରୀ ଅମିତ ଶାହା ନିଜର ପ୍ରାୟ ୩୨ ମିନିଟର ଅଭିଭାଷଣରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ୧୭ ଥର ପ୍ରଶଂସା କରିଥିଲେ। ସେ କହିଛନ୍ତି ଯେ ଯଦି ଯୋଗୀ ସରକାର ଉତ୍ତରପ୍ରଦେଶକୁ ମାଫିଆରୁ ମୁକ୍ତ କରି ସବୁଠୁ ବଡ କାର୍ଯ୍ୟ କରିଛନ୍ତି । ଯୋଗୀ ଆଦିତ୍ୟନାଥ ଉତ୍ତରପ୍ରଦେଶରେ ବିକାଶର ସମସ୍ତ ମାନକରେ ଅନେକ ଉନ୍ନତି କରିଛନ୍ତି। ଯୋଗୀ ଆଦିତ୍ୟନାଥ ଉତ୍ତରପ୍ରଦେଶର ଯୁବକମାନଙ୍କୁ ଶିକ୍ଷା ଦେବା, ନୂତନ ପିଢ଼ିକୁ ପ୍ରସ୍ତୁତ କରିବା ପାଇଁ ବ୍ୟବସ୍ଥା କରିଛନ୍ତି। ଅମିତ ଶାହା ଯୋଗୀଙ୍କୁ ପ୍ରଶଂସା କରିବା ସହିତ ୟୁପି ନିର୍ବାଚନରେ ବିଜେପିରୁ ମୁଖ୍ୟମନ୍ତ୍ରୀ ଚେହେରାକୁ ନେଇ ଥିବା କଳ୍ପନାଜଳ୍ପନାର ଅନ୍ତ କରିଛନ୍ତି |
Sambad is now on WhatsApp
Join and get latest news updates delivered to you via WhatsApp
ଅମିତ ଶାହା ଶୁକ୍ରବାର ଦିନ ଲଖନଉର ଡିଫେନ୍ସ ଏକ୍ସପୋ ଗ୍ରାଉଣ୍ଡରେ ‘ମେରା ପରିବାର, ବିଜେପି ପରିବାର’ ଅଭିଯାନ ଆରମ୍ଭ କରିଥିଲେ । ତେବେ ବିରୋଧୀଙ୍କୁ ଟାର୍ଗେଟ କରୁଥିବା ବେଳେ ଅମିତ ଶାହା ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବଙ୍କ ବିଷୟରେ ଅଧିକ ଉଲ୍ଲେଖ କରିଥିଲେ । ଉତ୍ତରପ୍ରଦେଶର ଦୁର୍ଦ୍ଦଶା ପାଇଁ ପୂର୍ବ ସରକାରଙ୍କୁ ଦାୟୀ କରୁଥିବାବେଳେ ସେ ଅଖିଳେଶଙ୍କୁ ତିନିଥର ‘ଅଖିଳେଶ ବାବୁ’ ବୋଲି କହିଥିଲେ। ଏଥି ସହିତ ଉତ୍ତରପ୍ରଦେଶର ଆଇନ ଶୃଙ୍ଖଳା ସମେତ ଅନ୍ୟାନ୍ୟ ପ୍ରସଙ୍ଗରେ ଯୋଗୀ ସରକାରଙ୍କ ପ୍ରଶଂସା କରିଥିଲେ | ସେ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଯୋଗୀ ଆଦିତ୍ୟନାଥଙ୍କ ଦ୍ୱାରା ପରିଚାଳିତ ସରକାର ମହିଳା, ଦଳିତ, ପଛୁଆ ଓ ପ୍ରତ୍ୟେକ ଯୁବକଙ୍କ ପାଇଁ କାର୍ଯ୍ୟ କରିଛନ୍ତି | ବିଜେପିର ନିର୍ବାଚନ ଇସ୍ତାହାର ବିଷୟରେ ସେ କହିଛନ୍ତି ଯେ ୨୦୧୭ରେ ଜନସମ୍ପର୍କ ସ୍ଥାପନ ହୋଇଥିଲା ଏବଂ ଏହା ପରେ ଇସ୍ତାହାର ଜାରି କରାଯାଇଥିଲା।
ଆଜି ମୁଁ ଗର୍ବର ସହିତ କହିପାରିବି ଯେ ଆମର ଇସ୍ତାହାରକୁ ଦେଖନ୍ତୁ, ଯୋଗୀ ଜୀ ଏବଂ ତାଙ୍କ ଟିମ ୯୦ ପ୍ରତିଶତରୁ ଅଧିକ ପ୍ରତିଶ୍ରୁତି ପୂରଣ କରିଛନ୍ତି। ଯୋଗୀ ଜୀ, ଆଉ ଦୁଇମାସ ବାକି ଅଛି, ଏହାକୁ ଯଥାସମ୍ଭବ ୧୦୦% ଆଡକୁ ନିଅନ୍ତୁ, ଲୋକମାନେ ବିଶ୍ୱାସ କରିବେ ଯେ ବିଜେପି ଯାହା କହେ ତାହା କରେ। ଅମିତ ଶାହା କହିଛନ୍ତି ଯେ କେବଳ ବିଜେପି ହିଁ ପରିବର୍ତ୍ତନ କରିପାରିବ। ମୋଦୀ ଏତେ ବଡ ରାଜ୍ୟରେ ଥିବା ପ୍ରତ୍ୟେକ ଘରକୁ ବିଦ୍ୟୁତ ଯୋଗାଇବା କାର୍ଯ୍ୟ କରିଛନ୍ତି। ପ୍ରତ୍ୟେକ ଗରିବ ପରିବାରକୁ ଶୌଚାଳୟ ଏବଂ ବିଦ୍ୟୁତ ଯୋଗାଇବା କାମ ଶେଷ ହୋଇଛି | ୧୦ କୋଟି ଲୋକଙ୍କୁ ଘର ଯୋଗାଇବାର ଲକ୍ଷ୍ୟ ଡିସେମ୍ବର ୨୦୨୨ ପୂର୍ବରୁ ଧାର୍ଯ୍ୟ କରାଯାଇଛି, ଯାହା ମଧ୍ୟ ସମ୍ପୂର୍ଣ୍ଣ ହେବ। ମୁଁ ଆଶାବାଦୀ ଅଛି ଯେ, ଏଥର ମଧ୍ୟ ଆମେ ୩୦୦ ଅତିକ୍ରମ କରିବୁ | ଉତ୍ତରପ୍ରଦେଶ ତଥା ଦେଶରେ ଏକ ବଡ ପରିବର୍ତ୍ତନ ଆଣିବା ପାଇଁ ନରେନ୍ଦ୍ର ମୋଦୀ ଏବଂ ଯୋଗୀ ସରକାର କାର୍ଯ୍ୟ ଜାରି ରଖିଛନ୍ତି |