ଅଷ୍ଟ୍ରେଲିଆ ଗସ୍ତରେ ଯିବେନି ସାମି

ମୁମ୍ବାଇ: ଅଷ୍ଟ୍ରେଲିଆ ବିପକ୍ଷରେ ଖେଳାଯାଉଥିବା ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ଅଭିଜ୍ଞ ବୋଲର ମହମ୍ମଦ ସାମିଙ୍କ ପ୍ରତ୍ୟାବର୍ତ୍ତନକୁ ଅପେକ୍ଷା କରିଥିବା ପ୍ରଶଂସକଙ୍କ ପାଇଁ ଖରାପ ଖବର ସାମ୍ନାକୁ ଆସିଛି। ସାମି ଅଷ୍ଟ୍ରେଲିଆ ଗସ୍ତରେ ଯିବେ ନାହିଁ । 

ବିସିସିଆଇ ନିକଟରେ ଏହି ଦ୍ରୁତ ବୋଲରଙ୍କ ଫିଟନେସ୍ କୁ ନେଇ ଏକ ବଡ଼ ଅପଡେଟ୍ ସେୟାର କରିଛି, ଯେଉଁଥିରେ ସ୍ପଷ୍ଟ ଭାବେ କୁହାଯାଇଛି ଯେ ସାମି ବର୍ଡର-ଗାଭାସ୍କର ଶୃଙ୍ଖଳାର ଶେଷ ଦୁଇଟି ମ୍ୟାଚ୍ ଖେଳିପାରିବେ ନାହିଁ ଏବଂ ତାଙ୍କ ପାଇଁ ଦଳରେ ଯୋଗ ଦେବାର କୌଣସି ସୁଯୋଗ ନାହିଁ। ୨୦୨୩ ବିଶ୍ୱକପ୍ ପରଠାରୁ ମହମ୍ମଦ ସାମି ଦଳବାହାରେ ଅଛନ୍ତି ଏବଂ ଏହା ପରେ ତାଙ୍କ ଗୋଡ଼ର ଅସ୍ତ୍ରୋପଚାର ମଧ୍ୟ କରାଯାଇଥିଲା। ସାମି ଘରୋଇ କ୍ରିକେଟକୁ ଫେରିଛନ୍ତି କିନ୍ତୁ ବିସିସିଆଇ ଡାକ୍ତରୀ ଦଳ ତାଙ୍କ ଫିଟନେସରେ ସନ୍ତୁଷ୍ଟ ନୁହଁନ୍ତି।

ବିସିସିଆଇ ପକ୍ଷରୁ ପ୍ରକାଶିତ ରିପୋର୍ଟ ଅନୁଯାୟୀ ସାମି ଏହି ଗୋଇଠି ସମସ୍ୟାରୁ ସମ୍ପୂର୍ଣ୍ଣ ସୁସ୍ଥ ହୋଇଛନ୍ତି। ନଭେମ୍ବରରେ ମଧ୍ୟପ୍ରଦେଶ ବିପକ୍ଷ ରଣଜୀ ଟ୍ରଫି ମ୍ୟାଚରେ ସାମି ୪୩ ଓଭର ବୋଲିଂ କରିଥିଲେ। ଏହାପରେ ସେ ସୟଦ ମୁସ୍ତାକ ଅଲ୍ଲୀ ଟ୍ରଫି (ଏସଏମଏଟି)ର ସମସ୍ତ ୯ଟି ମ୍ୟାଚ୍ ଖେଳିଥିଲେ, ଯେଉଁଠାରେ ସେ ଅତିରିକ୍ତ ବୋଲିଂ ଅଧିବେଶନରେ ଅଂଶଗ୍ରହଣ କରି ନିଜର ବୋଲିଂ ଦକ୍ଷତା ବୃଦ୍ଧି କରିଥିଲେ। ତେବେ ତାଙ୍କ ବାମ ଆଣ୍ଠୁରେ ପୁଣିଥରେ ସାମାନ୍ୟ ଫୁଲା ଦେଖିବାକୁ ମିଳିଛି।