ସେନାର ସମର୍ଥନ ବିନା ସରକାର ଚଳାଇବା ଅସମ୍ଭବ : ଶେହବାଜ ସରିଫ୍

ଇସ୍ଲାମାବାଦ : କ୍ଷମତାକୁ ଆସିବା ପୂର୍ବରୁ ଇମ୍ରାନ୍ ଖାଁ ସରକାରରେ ସେନା ହସ୍ତକ୍ଷେପ କରୁଛି ବୋଲି ଅଭିଯୋଗ ଆଣିଥିବା ଶେହବାଜ ସରିଫ୍ ଏବେ ସେନା ପ୍ରତି ନିଜର ପରିବର୍ତ୍ତିତ ମନୋଭାବ ପ୍ରକାଶ କରୁଛନ୍ତି। ବିଦାୟୀ ପ୍ରଧାନମନ୍ତ୍ରୀ ଶେହବାଜ ସରିଫ୍ ସ୍ୱୀକାର କରିଛନ୍ତି ଯେ ତାଙ୍କ ସରକାର ମଧ୍ୟ ଏକ ଶକ୍ତିଶାଳୀ ସେନାର ସମର୍ଥନ ବିନା କାର୍ଯ୍ୟ କରିପାରିବ ନାହିଁ, ଯାହା ଏକ ବିଦ୍ରୋହ ପ୍ରବଣ ଦେଶର ରାଜନୀତିରେ ଏହାର ଗୁରୁତ୍ୱପୂର୍ଣ୍ଣ ଭୂମିକାକୁ ପ୍ରତିଫଳିତ କରୁଛି।

ଶେହବାଜ ସରିଫ୍ ଯେତେବେଳେ ବିରୋଧୀ ଦଳ ନେତା ଥିଲେ, ସେତେବେଳେ ସରକାର ଚଳାଇବା ପାଇଁ ସେନାର ହସ୍ତକ୍ଷେପ ପାଇଁ ସେ ତତ୍କାଳୀନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କୁ ସମାଲୋଚନା କରୁଥିଲେ, କିନ୍ତୁ କ୍ଷମତାକୁ ଆସିବା ପରେ ସେ ସମାନ ଆଭିମୁଖ୍ୟ ଗ୍ରହଣ କରିଥିଲେ।

ଜିଓ ନ୍ୟୁଜକୁ ଦେଇଥିବା ଏକ ସାକ୍ଷାତକାରରେ ଯେତେବେଳେ ନ୍ୟୁଜ ଆଙ୍କର କହିଥିଲେ ଯେ ପାକିସ୍ତାନ ଆଜି ବିଶ୍ୱରେ "ହାଇବ୍ରିଡ୍ ଶାସନ"ର ଅନ୍ୟତମ ପ୍ରମୁଖ ଉଦାହରଣ, ସେତେବେଳେ ସରିଫ କହିଥିଲେ ଯେ ଇମ୍ରାନ୍ ଖାଁ ପୂର୍ବତନ ସେନାମୁଖ୍ୟ ଜେନେରାଲ କମର ଜାଭେଦ ବାଜୱାଙ୍କୁ ବହୁତ ବିଶ୍ୱାସ କରିଥିଲେ । ଇମ୍ରାନଙ୍କୁ ତାଙ୍କ କାର୍ଯ୍ୟକାଳରେ ସେନାର ସମର୍ଥନ ମଧ୍ୟ ମିଳିଥିଲା। ଯଦିଓ ସେ ଅନ୍ୟମାନଙ୍କ ଉପରେ ଅଭିଯୋଗ ଆଣିଥିଲେ, ତଥାପି ତାଙ୍କ ସରକାର ବିଭିନ୍ନ ବର୍ଗର ମିଶ୍ରଣ ଥିଲା। ପ୍ରତ୍ୟେକ ସରକାରଙ୍କୁ ସେନା ସମେତ ପ୍ରମୁଖ କ୍ଷେତ୍ରର ସହଯୋଗ ଦରକାର।