ବଂଲାଦେଶ ଦ୍ବିତୀୟ ପାକିସ୍ତାନ ହେବ: ଶେଖ ହସିନାଙ୍କ ପୁଅ

ନୂଆଦିଲ୍ଲୀ: ବାଂଲାଦେଶ ବିଶୃଙ୍ଖଳା ପରିସ୍ଥିତିକୁ ଆସିବା ପରେ ପ୍ରଧାନମନ୍ତ୍ରୀ ଶେଖ ହସିନାଙ୍କ ପୁଅ ତଥା ପୂର୍ବତନ ସରକାରୀ ପରାମର୍ଶଦାତା ସାଜିବ ୱାଜେଦ ଜୟ ଇଣ୍ଡିଆ ଟୁଡେକୁ ନିଜର ବୟାନ ଦେଇଛନ୍ତି। ସେ ଇଣ୍ଡିଆ ଟୁଡେ ଟିଭିକୁ କହିଛନ୍ତି ଯେ ବାଂଲାଦେଶ ପାଇଁ କାମ କରି ପ୍ରଧାନମନ୍ତ୍ରୀ ଥକି ପଡ଼ିଥିଲେ।

ଇଣ୍ଡିଆ ଟୁଡେ ନ୍ୟୁଜ୍ ନିର୍ଦ୍ଦେଶକ ରାହୁଲ କାନୱାଲଙ୍କ ସହ ଟେଲିଫୋନ୍‌ରେ ବାର୍ତ୍ତାଳାପ କରି ଜୟ ଆହୁରି ମଧ୍ୟ କହିଛନ୍ତି ଯେ ପ୍ରଧାନମନ୍ତ୍ରୀ କିଛି ଭୁଲ କରିନାହାଁନ୍ତି ଏବଂ ସେ ନିରାଶ ହୋଇ ଏପରି ନିଷ୍ପତ୍ତି ନେଇଛନ୍ତି।

ସେ ଦେଶର ସର୍ବୋତ୍ତମ ସରକାର। ତାଙ୍କୁ ୭୭ ବର୍ଷ ବୟସ ହୋଇସାରିଛି ଓ ବର୍ତ୍ତମାନ ସେ ନିଜର ନାତିନାତୁଣୀମାନଙ୍କ ସହ ସମୟ ଅତିବାହିତ କରିବେ ବୋଲି ହସିନାଙ୍କ ପୁଅ କହିଛନ୍ତି।

ଶେଖ ହସିନା ଲଣ୍ଡନ ଯିବାକୁ ଯୋଜନା କରୁଥିବା ଖବର ଉପରେ ଜୟ କହିଛନ୍ତି ଯେ ଏ ସମ୍ପର୍କରେ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଯାଇ ନାହିଁ। ଲଣ୍ଡନ ସମ୍ବନ୍ଧୀୟ ରିପୋର୍ଟ ସତ୍ୟ ନୁହେଁ  ବୋଲି ସେ ସଫେଇ ଦେଇଛନ୍ତି।

ଜୟ କହିଛନ୍ତି ଯେ ତାଙ୍କ ରାସ୍ତାରେ ରକ୍ତପାତ ଚାହୁଁ ନ ଥିବାରୁ ତାଙ୍କ ମା ବାଂଲାଦେଶ ଛାଡିଛନ୍ତି। ଅଗଷ୍ଟ ୩ ତାରିଖରେ ପ୍ରଧାନମନ୍ତ୍ରୀ ତାଙ୍କ ପଦରୁ ଇସ୍ତଫା ଦେବାକୁ ନିଷ୍ପତ୍ତି ନେଇଥିଲେ ବୋଲି ମଧ୍ୟ ଜୟ କହିଛନ୍ତି।

ବାର୍ତ୍ତାଳାପ ସମୟରେ ହସିନାଙ୍କ ପୁଅ ଏହା ମଧ୍ୟ କହିଛନ୍ତି ଯେ ଛାତ୍ରମାନଙ୍କୁ ଉତ୍ତେଜିତ କରିବା ଏବଂ ପରିସ୍ଥିତିକୁ ଆହୁରି ବଢ଼ାଇବାରେ ପାକିସ୍ତାନର ଇଣ୍ଟର ସର୍ଭିସେସ୍ ଇଣ୍ଟେଲିଜେନ୍ସ (ଆଇଏସଆଇ) ର ସମ୍ପୃକ୍ତି ରହିଛି ବୋଲି ସେ ସନ୍ଦେହ କରୁଛନ୍ତି।

ପ୍ରଧାନମନ୍ତ୍ରୀଙ୍କ ପୁଅ ଦାବି କରିଛନ୍ତି ଯେ ବାଂଲାଦେଶ ପରବର୍ତ୍ତୀ ପାକିସ୍ତାନ ହେବ ଏବଂ ଆହୁରି ବିଶୃଙ୍ଖଳିତ ହେବ। ଦେଶରେ ହିନ୍ଦୁ ଏବଂ ଖ୍ରୀଷ୍ଟିଆନମାନଙ୍କୁ ଟାର୍ଗେଟ କରାଯାଉଥିବାରୁ ସେ ଭୟଭୀତ ଥିବା ମଧ୍ୟ ପ୍ରକ‌ାଶ କରିଛନ୍ତି।