ସିନ୍ଦେଙ୍କ ପ୍ରଭାବ ହ୍ରାସ ପାଉଛି: ସ୍ଥିତିରେ ସୁଧାର ପାଇଁ ଶାହଙ୍କୁ ଭେଟିବାକୁ ଦିଲ୍ଲୀରେ ଡେରା ପକାଇଲେ

ମୁମ୍ବାଇ: ମହାୟୁତି ସରକାରରେ ହ୍ରାସ ପାଉଥିବା ପ୍ରଭାବକୁ ନେଇ ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ଅସନ୍ତୁଷ୍ଟ ହୋଇଛନ୍ତି। ମଙ୍ଗଳବାର ସେ ଏକ ଗୁରୁତ୍ୱପୂର୍ଣ୍ଣ କ୍ୟାବିନେଟ ବୈଠକ ଛାଡ଼ି ଦିଲ୍ଲୀ ଯାଇଥିଲେ। ଗୋଟିଏ ସପ୍ତାହ ମଧ୍ୟରେ ଏହା ତାଙ୍କର ଦ୍ୱିତୀୟ ଦିଲ୍ଲୀ ଗସ୍ତ। ସୂତ୍ର ଅନୁସାରେ, ମହାୟୁତି ସରକାରରେ ସିନ୍ଦେଙ୍କ ନିଷ୍ପତ୍ତି ଉପରେ ଲଗାତାର ଅଙ୍କୁଶ ଲଗାଯାଉଛି। ଏହି କାରଣରୁ ସେ ଅସନ୍ତୁଷ୍ଟ ହୋଇ ପଡ଼ିଛନ୍ତି।

ଏକନାଥ ସିନ୍ଦେ ବିଜେପିର ବରିଷ୍ଠ ନେତା ତଥା କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ଭେଟିବେ ବୋଲି ରିପୋର୍ଟ ରହିଛି। ଏହା ବ୍ୟତୀତ ସେ ଉପରାଷ୍ଟ୍ରପତି ନିର୍ବାଚନ ପୂର୍ବରୁ ସାଂସଦମାନଙ୍କ ସହିତ ତାଙ୍କର ରଣନୀତି ମଧ୍ୟ ସ୍ଥିର କରିବେ। ରାଜନୈତିକ ଦୃଷ୍ଟିକୋଣରୁ ତାଙ୍କର ଦିଲ୍ଲୀ ଗସ୍ତକୁ ବହୁତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି।

ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ସମସ୍ତ ସରକାରୀ କାର୍ଯ୍ୟ ଉପରେ କଡ଼ା ନଜର ରଖିଛି। କୌଣସି ବଡ଼ ପ୍ରକଳ୍ପ ଫାଇଲକୁ ସବୁଜ ସଙ୍କେତ ଦେବା ପୂର୍ବରୁ ମୁଖ୍ୟମନ୍ତ୍ରୀଙ୍କ ଅନୁମତିକୁ ବାଧ୍ୟତାମୂଳକ କରାଯାଇଛି। ସିନ୍ଦେଙ୍କ ନଗର ଉନ୍ନୟନ ବିଭାଗ ଦ୍ୱାରା ଜାରି ହେବାକୁ ଥିବା ପାଣ୍ଠିର ଫାଇଲ ମଧ୍ୟ ସିଏମଓକୁ ପଠାଇବାକୁ ପଡିବ। ମୁଖ୍ୟମନ୍ତ୍ରୀଙ୍କ ଅନୁମୋଦନ ପରେ ହିଁ ଏବେ ବିଧାୟକମାନଙ୍କୁ ପାଣ୍ଠି ବଣ୍ଟନ କରାଯାଇପାରିବ। ଅଭିଯୋଗ ହୋଇଥିଲା ଯେ, ସିନ୍ଦେ ପାଣ୍ଠି ବଣ୍ଟନରେ କେବଳ ତାଙ୍କ ଦଳର ବିଧାୟକମାନଙ୍କୁ ପ୍ରାଥମିକତା ଦେଉଛନ୍ତି।

ଅଧିକ ପଢ଼ନ୍ତୁ: ୧୬ ଦେଶରେ ବ୍ୟାପିଲା ନୂଆ ସଂକ୍ରାମକ ଭୂତାଣୁ: ଚୀନ୍‌ରେ ୭ ହଜାର ମାମଲା,ଆମେରିକାରେ ଯାତ୍ରା ସତର୍କତା ଜାରି

ଏହି କାରଣରୁ ଏହି ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରାଯାଇଛି। ଏବେ ୫୦୦ କୋଟି ଟଙ୍କାରୁ ଅଧିକ ମୂଲ୍ୟର ସହର ବିକାଶ ପ୍ରକଳ୍ପ ପାଇଁ ମୁଖ୍ୟମନ୍ତ୍ରୀଙ୍କ ଅନୁମୋଦନ ଆବଶ୍ୟକ। ଏହି ସମସ୍ତ ପ୍ରତିବନ୍ଧକ ଯୋଗୁ, ସିନ୍ଦେ ମହାୟୁତି ସରକାରରେ ଅସହାୟ ଅନୁଭବ କରୁଛନ୍ତି। ଏହି କାରଣରୁ ସେ ଦିଲ୍ଲୀ ଯାଇ ତାଙ୍କ ନେତାମାନଙ୍କ ସହିତ ପରାମର୍ଶ କରୁଛନ୍ତି। ସେ ଏ ବିଷୟରେ ବରିଷ୍ଠ ବିଜେପି ନେତାମାନଙ୍କୁ ମଧ୍ୟ ସୂଚନା ଦେଉଛନ୍ତି। କିନ୍ତୁ ବିଶେଷଜ୍ଞମାନେ କହିଛନ୍ତି ଯେ, ମହାୟୁତି ସରକାର ଉପରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀସଙ୍କର ପ୍ରଭାବ ଦୃଢ଼ ରହିଛି। ଏପରି ପରିସ୍ଥିତିରେ, ସିନ୍ଦେଙ୍କ ପାଇଁ ଦିଲ୍ଲୀରେ ନିଜର ସମସ୍ୟା ଉପସ୍ଥାପନା କରିବା କଷ୍ଟକର ବୋଲି ରାଜନୈତିକ ସମୀକ୍ଷକ ମତପୋଷଣ କରୁଛନ୍ତି।

ସାମ୍ପ୍ରତିକ ସମୟରେ, ସିନ୍ଦେ ଗୋଷ୍ଠୀର ଅନେକ ମନ୍ତ୍ରୀ ମଧ୍ୟ ବିବାଦରେ ଫସିଛନ୍ତି। ସେସବୁ ମନ୍ତ୍ରୀମାନଙ୍କ ମଧ୍ୟରେ କ୍ୟାବିନେଟ୍ ମନ୍ତ୍ରୀ ସଞ୍ଜୟ ଶିରସାତ ଏବଂ ଗୃହ ରାଷ୍ଟ୍ରମନ୍ତ୍ରୀ ଯୋଗେଶ କଦମ ପ୍ରମୁଖ ରହିଛନ୍ତି। ନୋଟ୍ ଭର୍ତ୍ତି ବ୍ୟାଗ ସହିତ ଦେଖାଯିବା ପରେ ଶିରସାତ ବିବାଦରେ ଫସିଛନ୍ତି। ତାଙ୍କର ମନ୍ତବ୍ୟ ମଧ୍ୟ ଅସୁବିଧା ସୃଷ୍ଟି କରୁଛି। ଅନ୍ୟପକ୍ଷରେ, କଦମ ତାଙ୍କ ମାଆଙ୍କ ନାମରେ ପ୍ରାପ୍ତ ଲାଇସେନ୍ସ ଆଧାରରେ ଏକ ଡ୍ୟାନ୍ସ ବାର୍ ଚଲାଉଥିବା ଅଭିଯୋଗ ହୋଇଥିଲା।

କିନ୍ତୁ, ମାମଲା ବଢ଼ିବା ପରେ ତାଙ୍କ ପରିବାର ସାଭଲି ବାର୍‌ର ଅର୍କେଷ୍ଟ୍ରା ଲାଇସେନ୍ସ ଫେରାଇ ଦେଇଥିଲେ। ଏହି ମାମଲାରେ ଉଦ୍ଧବ ଠାକରେ ଗୋଷ୍ଠୀର ବିଧାୟକ ଅନିଲ ପରବ କଦମଙ୍କ ଇସ୍ତଫା ଦାବି କରୁଛନ୍ତି। ଏହି ସମସ୍ତ ଚ୍ୟାଲେଞ୍ଜକୁ ଦୃଷ୍ଟିରେ ରଖି, ଉପମୁଖ୍ୟମନ୍ତ୍ରୀ ସିନ୍ଦେଙ୍କ ଉପରେ ତାଙ୍କ ମନ୍ତ୍ରୀମାନଙ୍କୁ ଇସ୍ତଫା ଦେବା ପାଇଁ ଚାପ ବୃଦ୍ଧି ପାଉଛି। କିନ୍ତୁ ସିନ୍ଦେ  କହିଛନ୍ତି ଯେ, ସେ କଦମଙ୍କ ସହିତ ଠିଆ ହୋଇଛନ୍ତି। କିନ୍ତୁ ଏହି ମନ୍ତବ୍ୟ ବିଜେପିକୁ ପସନ୍ଦ ଆସୁନାହିଁ। ଏପରି ପରିସ୍ଥିତିରେ, ଏବେ ସିନ୍ଦେ ଦିଲ୍ଲୀ ଯାଇ  ସ୍ଥିତିକୁ ସୁଧାରିବା କାର୍ଯ୍ୟ ନିୟୋଜିତ ଅଛନ୍ତି।

ଅଧିକ ପଢ଼ନ୍ତୁ: ଜଳିଗଲେ ଯୁବତୀ: ଦେହରେ କିରାସିନି ଢାଳି ଲଗାଇଦେଲେ ନିଆଁ

 eknath-shinde | devendra fadnavis | maharastra | amit shah