କର୍ଣ୍ଣାଟକରେ ୧୧୪ ଫୁଟ ଉଚ୍ଚ ଯୀଶୁ ମୂର୍ତ୍ତି ନିର୍ମାଣ କରିବେ କଂଗ୍ରେସ ନେତା ଶିବକୁମାର, ବିଜେପିର ସମାଲୋଚନା
ବାଙ୍ଗାଲୁରୁ : କର୍ଣ୍ଣାଟକରେ ବିଶ୍ୱର ସର୍ବୋଚ୍ଚ ଯୀଶୁ ମୂର୍ତ୍ତି ନିର୍ମାଣ ହେବ । ଦୁଇଦିନ ତଳେ କଂଗ୍ରେସ ନେତା ଡିକେ. ଶିବକୁମାର ଏହି ପ୍ରକଳ୍ପର ଶିଳାନ୍ୟାସ କରିଛନ୍ତି । ଏହି ମୂର୍ତ୍ତିର ଉଚ୍ଚତା ୧୧୪ ଫୁଟ ରହିବ । ତେବେ ଏହାକୁ ନେଇ ରାଜନୀତି ଆରମ୍ଭ ହୋଇଯାଇଛି । କଂଗ୍ରେସର ଏହା ଏକ ସଂଖ୍ୟାଲଘୁ ତୁଷ୍ଟୀକରଣ କାର୍ଯ୍ୟକ୍ରମ ବୋଲି ବିଜେପି କହିଛି ।
Sambad is now on WhatsApp
Join and get latest news updates delivered to you via WhatsApp
ବିଜେପି ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ଅନନ୍ତ କୁମାର ହେଗଡ଼େ କହିଛନ୍ତି ଯେ ଜଣେ ଇଟାଲୀୟ ମହିଳାଙ୍କୁ ସନ୍ତୁଷ୍ଟ କରିବାକୁ ଶିବକୁମାର ଏହି ମୂର୍ତ୍ତି କରିବାକୁ ଯାଉଛନ୍ତି । ଆଗାମୀ ଦିନରେ କଂଗ୍ରେସର ଆହୁରି କିଛି ଚାଟୁକାର ନେତା ଏହିପରି ତୁଷ୍ଟୀକରଣ ରାଜନୀତି କରିବାକୁ ଆଗେଇ ଆସିବେ ବୋଲି ସେ କହିଛନ୍ତି ।
ଡିସେମ୍ବର ୨୫ ବଡ଼ଦିନ ଉପଲକ୍ଷେ କର୍ଣ୍ଣାଟକର ଖ୍ରୀଷ୍ଟିଆନ ବହୁଳ କନକପୁରା ଅଞ୍ଚଳର ହାରୋବେଲେ ଗାଁରେ ଏହି ମୂର୍ତ୍ତି ପ୍ରତିଷ୍ଠା ପାଇଁ ଶିଳାନ୍ୟାସ କରିଥିଲେ । ୧୦ ଏକର ଜମିରେ ଏହି ମୂର୍ତ୍ତି ଓ ଅନ୍ୟାନ୍ୟ ସହାୟକ କୋଠା ନିର୍ମାଣ କରାଯିବ ।
ଶିବକୁମାରଙ୍କ ଏହି କାର୍ଯ୍ୟକୁ କର୍ଣ୍ଣାଟକର ଗ୍ରାମ୍ୟ ଉନ୍ନୟନ ମନ୍ତ୍ରୀ କେଏସ ଇଶ୍ୱରାପ୍ପା ମଧ୍ୟ ସମାଲୋଚନା କରିଛନ୍ତି । ସେ କହିଛନ୍ତି ଯେ ଭାରତରେ ଜନ୍ମ ହୋଇଥିବା ଭଗବାନ ରାମଙ୍କ ମନ୍ଦିର ନିର୍ମାଣକୁ ଯେଉଁମାନେ ବିରୋଧ କରୁଥିଲେ ସେମାନେ ଏବେ ଯୀଶୁଙ୍କ ମୂର୍ତ୍ତି ନିର୍ମାଣ କରିବାକୁ ଯାଉଛନ୍ତି । ଏହା ଦୁର୍ଭାଗ୍ୟଜନକ ବୋଲି ସେ କହିଛନ୍ତି ।