ପେଟ୍ରୋଲ ଓ ଡିଜେଲର ଦର ୫୦ ଟଙ୍କାରୁ କମ କରିବାକୁ ହେଲେ ବିଜେପିକୁ ହରାଇବାକୁ ହେବ: ସଞ୍ଜୟ ରାଉତ
ନୂଆଦିଲ୍ଲୀ: ପେଟ୍ରୋଲ ଓ ଡିଜେଲ ଉପରୁ କେନ୍ଦ୍ର ସରକାର ଉତ୍ପାଦ ଶୁଳ୍କ କମାଇବା ପରେ ଶିବସେନାର ବରିଷ୍ଠ ନେତା ସଞ୍ଜୟ ରାଉତ ମୋଦୀ ସରକାରଙ୍କୁ କଟାକ୍ଷ କରିଛନ୍ତି । ସଞ୍ଜୟ କହିଛନ୍ତି, ଯଦି ପେଟ୍ରୋଲ ଓ ଡିଜେଲ ଦର ୫୦ ଟଙ୍କାରୁ କମ ଚାହୁଁଥାନ୍ତି ତେବେ ବିଜେପିକୁ ହରାଇବା ନିହାତି ଆବଶ୍ୟକ । ଆଜି ଏଭଳି କହି କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି ସଞ୍ଜୟ ।
Sambad is now on WhatsApp
Join and get latest news updates delivered to you via WhatsApp
ଏହାସହ ସଞ୍ଜୟ କହିଛନ୍ତି ଯେ, ଇନ୍ଧନ ଦର ୧୦୦ ଟଙ୍କାରୁ ଅଧିକ କରିବାକୁ ହେଲେ ଯେକୌଣସି ବ୍ୟକ୍ତିଙ୍କୁ ଅତ୍ୟନ୍ତ କଠୋର ହେବାକୁ ପଡିଥାଏ । ଆଉ ବିଜେପି ସରକାର ଏବେ କଠୋର ହୋଇଛନ୍ତି । ଉପ-ନିର୍ବାଚନରେ ବିଜେପିର ପରାଜୟ ପରେ କେନ୍ଦ୍ର ସରକାର ପେଟ୍ରୋଲ ଓ ଡିଜେଲ ଦର କମାଇଛନ୍ତି । ତେଣୁ ଯଦି ପେଟ୍ରୋଲ ଓ ଡିଜେଲର ଦର ୫୦ ଟଙ୍କା ତଳକୁ ଚାହୁଁଥାନ୍ତିି ତେବେ ବିଜେପିକୁ ସମ୍ପୂର୍ଣ୍ଣ ଭାବେ ହରାଇବାକୁ ପଡିବ । କାରଣ ତେଲ ଦରକୁ ନେଇ ଲୋକେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। ମହଙ୍ଗା ମାଡରେ ସାଧାରଣ ଲୋକେ ଅସ୍ତବ୍ୟସ୍ତ ହୋଇପଡିଲେଣି । ଏବେ ଦୀପାବଳି ପାଳିବାକୁ ଲୋକଙ୍କୁ କରଜ କରିବାକୁ ପଡୁଛି ଏବଂ ଦରଦାମ ବୃଦ୍ଧି କାରଣରୁ ଉତ୍ସବ ପାଳିବାକୁ ଲୋକଙ୍କ ମନରେ ଆଉ ପୂର୍ବଭଳି ଆଗ୍ରହ ନାହିଁ ।
ଏହାପୂର୍ବରୁ ସଞ୍ଜୟ କେନ୍ଦ୍ର ସରକାରଙ୍କୁ ଟାର୍ଗେଟ କରି କହିଥିଲେ ଯେ, ପେଟ୍ରୋଲ ଓ ଡିଜେଲ ଶସ୍ତା କରିବାକୁ କହି ବିଜେପି କ୍ଷମତାକୁ ଆସିଥିଲା କିନ୍ତୁ ଏବେ ବିମାନ ଇନ୍ଧନ ଠାରୁ ଅଧିକ ମହଙ୍ଗା ହେଲାଣି ଗାଡି ତେଲର ଦାମ, ଯାହା ସାଧାରଣ ଲୋକଙ୍କ ପକେଟ ଉପରେ ସିଧାସଳଖ ପ୍ରଭାବ ପକାଉଛି ।