ବିଜେପିକୁ ମାତ ଦେବାକୁ ମିଶନ ଉତ୍ତରପ୍ରଦେଶରେ ବାହାରିଲେ ଶିବସେନା ଓ ଆମ ଆଦମୀ ପାର୍ଟି
ନୂଆଦିଲ୍ଲୀ: ଉତ୍ତରପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ସେମିଫାଇନାଲ କୁହାଯାଉଥିବା ପଞ୍ଚାୟତ ନିର୍ବାଚନରେ ପ୍ରତିଦ୍ବନ୍ଦିତା କରିବା ପାଇଁ ଅଣ୍ଟା ଭିଡିଛି ଶିବସେନା | ଉତ୍ତରପ୍ରଦେଶ ପଞ୍ଚାୟତ ନିର୍ବାଚନରେ ଶିବସେନା ଲଢେଇ କରିବ ବୋଲି ଘୋଷଣା କରିଛି | ଏହାପୂର୍ବରୁ ଆମ୍ ଆଦମୀ ପାର୍ଟି ମଧ୍ୟ ପଞ୍ଚାୟତ ନିର୍ବାଚନରେ ପ୍ରତିଦ୍ବନ୍ଦିତା କରିବାକୁ ଘୋଷଣା କରିଛି। ରାଜ୍ୟରେ ପଞ୍ଚାୟତ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ଶିବସେନାର ରାଜ୍ୟ ୟୁନିଟ୍ ରବିବାର ସରୋଜନଗରରେ ଥିବା ରାଜ୍ୟ କାର୍ଯ୍ୟାଳୟରେ ଏକ ସମୀକ୍ଷା ବୈଠକ କରିଛି।
Sambad is now on WhatsApp
Join and get latest news updates delivered to you via WhatsApp
ଶିବସେନା ରାଜ୍ୟ ସଚିବ ବିଶ୍ୱଜିତ ସିଂ କହିଛନ୍ତି ଯେ ଶିବସେନା ରାଜ୍ୟ ମୁଖ୍ୟ ଅନିଲ ସିଂ ପଞ୍ଚାୟତ ନିର୍ବାଚନ ପାଇଁ ପ୍ରସ୍ତୁତି ସମ୍ପର୍କରେ ଆଲୋଚନା କରିଛନ୍ତି। ଦଳ ପକ୍ଷରୁ ପଞ୍ଚାୟତ ନିର୍ବାଚନ ପାଇଁ ଜିଲ୍ଲା ଭିତ୍ତିକ ସମୀକ୍ଷା କରାଯାଉଛି। ଶିବସେନା ରାଜ୍ୟ ସଚିବ ବିଶ୍ୱଜିତ ସିଂ କହିଛନ୍ତି ଯେ ଆସନ୍ତା ସପ୍ତାହରେ ଶିବସେନା ପ୍ରତିନିଧି ଦଳ ମହାରାଷ୍ଟ୍ରରେ ସଂଗଠନର ବରିଷ୍ଠ ନେତାମାନଙ୍କୁ ଭେଟି ନିର୍ବାଚନ ପ୍ରସ୍ତୁତି ସମ୍ପର୍କରେ ସୂଚନା ଦେବେ। ଶିବସେନା ପୂର୍ବରୁ ଆମ୍ ଆଦମୀ ପାର୍ଟି ମଧ୍ୟ ପଞ୍ଚାୟତ ନିର୍ବାଚନରେ ସମସ୍ତ ଆସନରେ ପ୍ରାର୍ଥୀ ଦେବାକୁ ଘୋଷଣା କରିଥିଲା।
ଦଳର ଜାତୀୟ ମୁଖପାତ୍ର ତଥା ରାଜ୍ୟସଭା ସଦସ୍ୟ ସଞ୍ଜୟ ସିଂ କହିଛନ୍ତି ଯେ ଦଳର ରାଜ୍ୟ କାର୍ଯ୍ୟନିର୍ବାହୀ ବୈଠକରେ ଏହି ନିଷ୍ପତ୍ତି ନିଆଯାଇଛି। ଯଦିଓ ରାଜ୍ୟରେ ପଞ୍ଚାୟତ ନିର୍ବାଚନର ତାରିଖ ଘୋଷଣା କରାଯାଇ ନାହିଁ, କିନ୍ତୁ ସୂତ୍ର ଅନୁଯାୟୀ ମାର୍ଚ୍ଚ-ଏପ୍ରିଲ ସୁଦ୍ଧା ନିର୍ବାଚନ ଅନୁଷ୍ଠିତ ହେବ। ସୂଚନା ଥାଉ କି ଉତ୍ତରପ୍ରଦେଶରେ ସରପଞ୍ଚଙ୍କ କାର୍ଯ୍ୟକାଳ ୨୫ ଡିସେମ୍ବରରେ ଶେଷ ହୋଇଛି |