ନୂଆଦିଲ୍ଲୀ: ବ୍ରିଟେନ୍ ମହାରାଣୀ ଏଲିଜାବେଥ ଦ୍ୱିତୀୟଙ୍କ ଦେହାନ୍ତ ସହିତ ଇଂଲଣ୍ଡ ଇତିହାସର ଦୀର୍ଘତମ ରାଜତ୍ବର ଅବସାନ ଘଟିଛି। ୧୯୨୬ ଏପ୍ରିଲ୍ ୨୧ରେ ଜନ୍ମଗ୍ରହଣ କରିଥିବା ଏଲିଜାବେଥ୍ ଆଲେକ୍ସଜାଣ୍ଡ୍ରା ମେରି ପରବର୍ତ୍ତୀ ସମୟରେ ୬ ଫେବ୍ରୁଆରି ୧୯୫୨ରେ ବ୍ରିଟେନ ସିଂହାସନ ଆରୋହଣ କରି ରାଣୀ ଏଲିଜାବେଥ୍ ଦ୍ୱିତୀୟ ଭାବେ ପୂରା ବିଶ୍ବରେ ବିଦିତ ହୋଇଥିଲେ।
Sambad is now on WhatsApp
Join and get latest news updates delivered to you via WhatsApp
ଡ୍ୟୁକ୍ ଏବଂ ଡୁଚେସ୍ ଅଫ୍ ୟର୍କଙ୍କର ପ୍ରଥମ ସନ୍ତାନ ଭାବରେ ଲଣ୍ଡନର ମେଫେୟାରରେ ଜନ୍ମ ଗ୍ରହଣ କରିଥିଲେ ଏଲିଜାବେଥ୍। ୧୯୩୬ ମସିହାରେ ତାଙ୍କର ବାପା ରାଜା ଜର୍ଜ ଷଷ୍ଠ ଏବଂ ମା’ ରାଣୀ ଏଲିଜାବେଥ୍ ବ୍ରିଟିସ ସିଂହାସନ ଆରୋହଣ କରିଥିଲେ। ରାଜା ଏଡୱାର୍ଡ ଅଷ୍ଟମଙ୍କ ସିଂହାସନ ପରିତ୍ୟାଗ ପରେ ଏଲିଜାବେଥଙ୍କ ପିତା ସିଂହାସନରେ ବସିଥିଲେ।
ରାଣୀ ଏଲିଜାବେଥ୍ ଦ୍ବିତୀୟ ତାଙ୍କ ଜୀବନକାଳରେ ୩ ଥର ଭାରତ ଗସ୍ତରେ ଆସିଛନ୍ତି। ଦେଶ ସ୍ବାଧୀନ ହେବାର ୧୫ ବର୍ଷ ପରେ ୧୯୬୧ ମସିହାରେ ସେ ପ୍ରଥମ ଥର ଲାଗି ଭାରତ ଆସିଥିଲେ। ଏହାପରେ ସେ ୧୯୮୩ ଏବଂ ୧୯୯୭ରେ ଭାରତ ଭ୍ରମଣରେ ଆସିଥିଲେ ଓ ଭାରତବାସୀଙ୍କଠାରୁ ଢ଼େର ଶ୍ରଦ୍ଧା ଓ ସମ୍ମାନ ଲାଭ କରିଥିଲେ ମହାରାଣୀ।
ରାଣୀ ଏଲିଜାବେଥ ଦ୍ବିତୀୟ କୌଣସି ଶିକ୍ଷାନୁଷ୍ଠାନରେ ଶିକ୍ଷାଗ୍ରହଣ କରି ନଥିଲେ। ଘରେ ବ୍ୟକ୍ତିଗତ ଶିକ୍ଷକଙ୍କ ମାର୍ଗଦର୍ଶନରେ ଅଧ୍ୟୟନ କରିଥିଲେ। ଦ୍ୱିତୀୟ ବିଶ୍ୱଯୁଦ୍ଧ ସମୟରେ ସେ ବ୍ରିଟିସ୍ ସାମୟିକ ସାମରିକ ବାହିନୀରେ କାର୍ଯ୍ୟ କରିଥିଲେ। ୧୯୪୭ ନଭେମ୍ବରରେ ସେ ଗ୍ରୀସ୍ ଏବଂ ଡେନମାର୍କର ପୂର୍ବତନ ରାଜକୁମାର ଫିଲିପ୍ ମାଉଣ୍ଟବ୍ୟାଟେନଙ୍କୁ ବିବାହ କରିଥିଲେ। ତାଙ୍କର ବୈବାହିକ ଜୀବନ ଫିଲିପଙ୍କ ବିୟୋଗ ପର୍ଯ୍ୟନ୍ତ ଅକ୍ଷୁର୍ଣ୍ଣ ରହିଥିଲା। ଚାର୍ଲ୍ସ ତୃତୀୟ; ଆନ୍ନେ, ପ୍ରିନ୍ସେସ୍ ରୟାଲ୍; ପ୍ରିନ୍ସ ଆଣ୍ଡ୍ରୁ, ଡ୍ୟୁକ୍ ଅଫ୍ ୟର୍କ; ଏବଂ ପ୍ରିନ୍ସ ଏଡୱାର୍ଡ, ୱେସେକ୍ସର ଆର୍ ହେଉଛନ୍ତି ସେମାନଙ୍କର ଚାରି ସନ୍ତାନ।
ଫେବୃଆରି ୧୯୫୨ରେ ଯେତେବେଳେ ତାଙ୍କ ପିତାଙ୍କର ଦେହାନ୍ତ ହେଲା, ସେତେବେଳେ ଏଲିଜାବେଥ ମାତ୍ର ୨୫ ବର୍ଷ ବୟସରେ ଶାସନ ଭାର ଗ୍ରହଣ କରିଥିଲେ। ସେ ସମୟରେ ସେ ୭ଟି ସ୍ବାଧୀନ ଦେଶର ରାଣୀ ଭାବେ ଅଭିଷିକ୍ତ ହୋଇଥିଲେ।ସେ ବ୍ରିଟେନ, କାନାଡା, ଅଷ୍ଟ୍ରେଲିଆ, ନ୍ୟୁଜିଲ୍ୟାଣ୍ଡ, ଦକ୍ଷିଣ ଆଫ୍ରିକା, ପାକିସ୍ଥାନ ଏବଂ ସିଲଂ (ଆଜି ଶ୍ରୀଲଙ୍କା ଭାବରେ ଜଣାଶୁଣା) ଆଦି ଦେଶର ମହାରାଣୀ ଭାବେ ପରିଚିତ ହେବା ସହ ରାଜ୍ୟଗୋଷ୍ଠୀ ରାଷ୍ଟ୍ରସମୂହର ମୁଖ୍ୟ ହୋଇଥିଲେ।
ନିଜର ଦୀର୍ଘ କାର୍ଯ୍ୟକାଳ ମଧ୍ୟରେ ରାଣୀ ଏଲିଜାବେଥ୍ ଦ୍ବିତୀୟ ବହୁ ରାଷ୍ଟ୍ର ଭ୍ରମଣ କରିଥିଲେ। ତେବେ ତାଙ୍କର ଐତିହାସିକ ବିଦେଶ ଗସ୍ତ ମଧ୍ୟରେ ୧୯୮୬ରେ ଚୀନ୍, ୧୯୯୪ରେ ଋଷ, ୨୦୧୧ରେ ଆୟର୍ଲାଣ୍ଡ ରିପବ୍ଲିକ୍ ଏବଂ ପାଞ୍ଚ ଥର ଭଟିକାନ୍ ସିଟିରେ ପୋପଙ୍କ ସହ ସାକ୍ଷାତ ଗୁରୁତ୍ବପୂର୍ଣ୍ଣ ବିବେଚନା କରାଯାଏ। ୧୯୫୩ରେ ସିଂହାସନ ଆରୋହଣ ସମାରୋହ ଏବଂ ୧୯୭୭, ୨୦୦୨, ୨୦୧୨, ଏବଂ ୨୦୨୨ରେ ଯଥାକ୍ରମେ ତାଙ୍କ ଶାସନର ରୌପ୍ୟ, ସ୍ବର୍ଣ୍ଣ, ହୀରକ, ଏବଂ ପ୍ଲାଟିନମ୍ ଜୁବୁଲି ଉତ୍ସବ ଉଲ୍ଲେଖନୀୟ ଘଟଣା ଅନ୍ତର୍ଭୁକ୍ତ | ମହାରାଣୀ ଏଲିଜାବେଥ ଦ୍ବିତୀୟ ବ୍ରିଟେନର ସର୍ବାଧିକ କାଳ ଶାସନ କରିଥିବା ମହାରାଣୀ ଭାବେ ଇତିହାସରେ ଚିରସ୍ମରଣୀୟ ହୋଇ ରହିବେ।