ଫୁଟବଲ ଓ କ୍ରିକେଟ ଖେଳରୁ ମହାକାଶଚାରୀ ହେବାର ଯାତ୍ରା ଥିଲା ଏପରି....

ନୂଆଦିଲ୍ଲୀ: ଭାରତୀୟ ମହାକାଶଚାରୀ ଶୁଭାଂଶୁ ଶୁକ୍ଳା ୧୮ ଦିନ ମହାକାଶରେ ରହିବା ପରେ ପୃଥିବୀକୁ ସୁରକ୍ଷିତ ଭାବେ ଫେରି ଆସିଛନ୍ତି।  ମହାକାଶରେ ଶୁଭାଂଶୁ ଶୁକ୍ଳାଙ୍କ ସମେତ ୪ଜଣ ମହାକାଶଚାରୀ ପ୍ରାୟ ୬୦ଟି ପରୀକ୍ଷଣ କରିଥିଲେ। 

ସୁରକ୍ଷିତ ପ୍ରତ୍ୟାବର୍ତ୍ତନ ପରେ ଶୁଭାଂଶୁ ଶୁକ୍ଳାଙ୍କୁ ନେଇ ଦେଶ ଖୁବ ଉତ୍ସାହିତ ଅଛି।ତେବେ ଆପଣ ଜାଣନ୍ତି କି ମହାକାଶଚାରୀ ହେବା ପୂର୍ବରୁ ଶୁଭାଂଶୁ ଶୁକ୍ଳାଙ୍କ ଫୁଟବଲ୍ ଖେଳ ପ୍ରତି ଥିଲା ଖୁବ ଦୁର୍ବଳତା।ସିଟି ମୋଣ୍ଟିସୋରି ସ୍କୁଲର ଛାତ୍ର ଥିବା ଶୁଭାଂଶୁ ଶୁକ୍ଳାଙ୍କ ଜଣେ ଶିକ୍ଷକଙ୍କ କହିବାନୁସାରେ, ‘ଶୁଭାଂଶୁ ସ୍କୁଲ ସମୟରେ ଖୁବ କମ୍ ପାଠପଢ଼ନ୍ତି। ଏହାପରେ ମଧ୍ୟ ସେ ଭଲ ନମ୍ବର ରଖି ସମସ୍ତଙ୍କୁ ଆଶ୍ଚର୍ଯ୍ୟ କରି ‌ଦିଅନ୍ତି। 

ପାଠ ଅପେକ୍ଷା ଶୁଭାଂଶୁଙ୍କ ଖେଳ, ବିଶେଷକରି ଫୁଟବଲ୍ ପ୍ରତି ତାଙ୍କର ଖୁବ ଦୁର୍ବଳତା ଥିଲା। ସେ ଫୁଟବଲ ସହିତ କ୍ରିକେଟ୍ ମଧ୍ୟ ଭଲ ଖେଳୁଥିଲେ। ଏହା ବ୍ୟତୀତ ଶୁଭାଂଶୁ ଏନଡିଏ ପାଇଁ ବି ଆବେଦନ କରିଥିଲେ, କିନ୍ତୁ ତାଙ୍କ ବାପାମା ତାଙ୍କୁ ସମର୍ଥନ କରି ନଥିଲେ।।

ଶୁଭାଂଶୁ ଶୁକ୍ଳାଙ୍କ ଜନ୍ମ ୧୦ ଅକ୍ଟୋବର ୧୯୮୫ରେ ଲକ୍ଷ୍ନୌର ଏକ ମଧ୍ୟବିତ୍ତ ପରିବାରରେ ହୋଇଥିଲା। ଶୁଭାଂଶୁ ଜଣେ ମହାକାଶଚାରୀ ହେବା ପାଇଁ ବହୁତ କମ୍ ଆଶା ରଖିଥିଲେ, କିନ୍ତୁ ଏକ ଏୟାର ସୋ’ ଏହି କ୍ଷେତ୍ରରେ ତାଙ୍କର ଆଗ୍ରହକୁ ବୃଦ୍ଧି କରିଥିଲା।

ଶୁକ୍ଲା ତାଙ୍କ ପିଲାଦିନେ ଏକ ଏୟାରଶୋ ଦେଖିଥିଲେ, ଯେଉଁଠାରେ ସେ ବିମାନର ଗତି ଏବଂ ଶବ୍ଦ ଶୁଣି ବହୁତ ଉତ୍ସାହିତ ହୋଇ ଯାଇଥିଲେ। ସେ ୨୦୦୬ ମସିହାରେ ଭାରତୀୟ ବାୟୁସେନାରେ ନିଯୁକ୍ତି ପାଇଥିଲେ ଏବଂ ଏରୋସ୍ପେସ୍ ଇଞ୍ଜିନିୟରିଂରେ ଏମଟେକ୍ ଡିଗ୍ରୀ ହାସଲ କରିଥିଲେ। ୨୦୧୯ ମସିହାରେ ତାଙ୍କୁ ଇସ୍ରୋର 'ଭାରତୀୟ ମାନବ ମହାକାଶ ଉଡ଼ାଣ କାର୍ଯ୍ୟକ୍ରମ'  ପାଇଁ ମନୋନୀତ କରାଯାଇଥିଲା। ଶୁଭାଂଶୁ ମହାକାଶଚାରୀ ତାଲିମ ପାଇଁ ମନୋନୀତ ଚାରି ଜଣ ପ୍ରାର୍ଥୀଙ୍କ ମଧ୍ୟରୁ ଜଣେ ଥିଲେ।