କଳା ପଡ଼ିଲା ଅରୁଣାଚଳର ସିଆଙ୍ଗ ନଦୀ ପାଣି : ଚୀନର ହାତ ସଂଦେହ
ଗୌହାଟୀ: ଉତ୍ତର ଅରୁଣାଚଳ ପ୍ରଦେଶର ଜୀବନଧାରା ବୋଲି କୁହାଯାଉଥିବା ତଥା ବ୍ରହ୍ମପୁତ୍ର ନଦୀର ପ୍ରମୁଖ ଉପନଦୀ ସିଆଙ୍ଗ ନଦୀ ପ୍ରବଳ ଭାବେ ଦୂଷିତ ହୋଇଯାଇଥିବାରୁ ତାହା ସାଧାରଣ ଲୋକ ଓ ଜୀବଜନ୍ତୁଙ୍କ ବ୍ୟବହାର ଅନୁପଯୋଗୀ ହୋଇପଡିଛି । ତିବ୍ଦତରୁ ଆସୁଥିବା ଏହି ନଦୀ ଦୂଷିତ ହେବା ପଛରେ ଚୀନର ହାତ ଥିବା ସଂଦେହ କରାଯାଉଛି ।
କେବଳ ବର୍ଷା ଦିନକୁ ଛାଡିଦେଲେ ବର୍ଷର ଅନ୍ୟ ସମୟ କାଚକେନ୍ଦୁ ପରି ସ୍ୱଚ୍ଛ ପାଣି ରହୁଥିବା ଏହି ନଦୀର ପାଣି ଗତ କିଛି ମାସ ଧରି କଳା ପଡିଯାଇଥିବାରୁ ତାହା ସ୍ଥାନୀୟ ଜନସାଧାରଣ ସରକାରଙ୍କ ପାଇଁ ଚିନ୍ତାର କାରଣ ହୋଇଛି ।
ଏ ନେଇ ପୂର୍ବ ସିଆଙ୍ଗ ଜିଲ୍ଲାର ଡେପୁଟି କମିଶନର ତମୟୋ ତତକ୍ କହିଛନ୍ତି ଯେ ଏବେ ଏହି ନଦୀପାଣି ମଣିଷ ଓ ଜୀବଜନ୍ତୁଙ୍କ ବ୍ୟବହାର ଉପଯୋଗୀ ରହିନାହିଁ, କାରଣ ଏଥିରେ ସିମେଣ୍ଟ ପରି କିଛି ପଦାର୍ଥ ମିଶିକରି ଆସୁଛି । ଗତ ଦେଢ ମାସ ହେଲେ ଏହି କାରଣରୁ ନଦୀରେ ଥିବା ଅନେକ ମାଛ ମରି ଭାସୁଥିବା ଦେଖାଯାଉଛି ।
Sambad is now on WhatsApp
Join and get latest news updates delivered to you via WhatsApp
“ଗତ ବର୍ଷା ଦିନେ ଏହି ନଦୀର ପାଣି ଗୋଳିଆ ଆସିବା ପରେ ଆମେ ଭାବୁଥିଲୁ ଯେ ଉପମୁଣ୍ଡରେ ବନ୍ୟାପାଣି ଆସିବା ଯୋଗୁଁ ପାଣି ଏପରି ହେଉଛି । କିନ୍ତୁ ଏବେ ବର୍ଷା ଦିନ ଚାଲିଯାଇଛି, ତଥାପି ପାଣି ଗୋଳିଆ ରହିଛି । ନଭେମ୍ବରରୁ ଫେବ୍ରୁଆରୀ ପର୍ଯ୍ୟନ୍ତ ଏହି ନଦୀର ପାଣି ବେଶ ସ୍ୱଚ୍ଛ ଥାଏ । କିନ୍ତୁ ଏବେ ତାହା କଳା ଓ ଦୂଷିତ ରହିଛି । ଏପରିକି ମୋ ଜେଜେମା ମଧ୍ୟ ତାଙ୍କ ଜୀବନ କାଳରେ ଏପରି ହେବା କେବେ ଦେଖି ନ ଥିଲେ । ବୋଧହୁଏ ଉପର ମୁଣ୍ଡରେ ଚୀନ ତରଫରୁ କୌଣସି ବଡ଼ ଧରଣର ନିର୍ମାଣ କାମ ଚାଲିଛି, ଯେଉଁଥିରେ ସିମେଣ୍ଟ ବ୍ୟବହାର ହେଉଛି କିମ୍ବା ଚୀନ ନଦୀ ଭିତରେ କୌଣସି ପ୍ରକାରର ବୋରିଂ କାମ କରୁଛି । ” କହିଛନ୍ତି ତତକ୍।
ଏବେ ଏହି ନଦୀ ପାଣିର ନମୁନା କେନ୍ଦ୍ରୀୟ ଜଳ ଆୟୋଗର ପରୀକ୍ଷା ପାଇଁ ପଠାଯାଇଛି ।
ଭାରତରେ ଦିହାଙ୍ଗ ନାମରେ ମଧ୍ୟ ଏହି ନଦୀ ପରିଚିତ ଯାହାକି ବ୍ରହ୍ମପୁତ୍ରର ଏକ ପ୍ରମୁଖ ଉପନଦୀ। ଏହା ଅରୁଣାଚଳ ପ୍ରଦେଶରେ ୨୩୦ କିମି ବୋହିବା ପରେ ଲୋହିତ୍ ନଦୀ ସହ ମିଶୁଛି ଓ ଏହା ପୂର୍ବ ସିଆଙ୍ଗରେ ପ୍ରବାହିତ ଦିବାଙ୍ଗ ନଦୀ ସହ ମିଶି ବ୍ରହ୍ମପୁତ୍ର ନଦୀରେ ପରିଣତ ହେଉଛି ।