କର୍ଣ୍ଣାଟକରେ ଏବେ ବି ପେଟ୍ରୋଲ-ଡିଜେଲ ଶସ୍ତା: ସିଦ୍ଧରମେୟା
ବେଙ୍ଗାଲୁରୁ: କର୍ଣ୍ଣାଟକ ସରକାରଙ୍କ ଦ୍ୱାରା ପେଟ୍ରୋଲ ଏବଂ ଡିଜେଲ ଉପରେ ବିକ୍ରୟ ଟିକସ ବୃଦ୍ଧି ହେତୁ ରାଜ୍ୟରେ ଇନ୍ଧନ ମୂଲ୍ୟ ବୃଦ୍ଧି ପାଇଛି। ଏ ସମ୍ପର୍କରେ ରାଜ୍ୟ ମୁଖ୍ୟମନ୍ତ୍ରୀ ସିଦ୍ଧରମେୟା କହିଛନ୍ତି ଯେ ପେଟ୍ରୋଲ ଏବଂ ଡିଜେଲର ନୂତନ ମୂଲ୍ୟ ଏବେ ମଧ୍ୟ ସୁଲଭ । ସେ ସୋସିଆଲ ମିଡିଆ ପ୍ଲାଟଫର୍ମରେ ପୋଷ୍ଟ କରି କହିଛନ୍ତି, କର୍ଣ୍ଣାଟକ ସରକାର ପେଟ୍ରୋଲ ଉପରେ ଟିକସ ବଢ଼ାଇ ୨୯.୮୪ ପ୍ରତିଶତ ଓ ଡିଜେଲ ଉପରେ ୧୮.୪୪ ପ୍ରତିଶତ କରିଛନ୍ତି | ଏହି ବୃଦ୍ଧି ପରେ ବି ଦକ୍ଷିଣ ଭାରତର ଅନେକ ରାଜ୍ୟ ତୁଳନାରେ କର୍ଣ୍ଣାଟକ ସରକାର ଲଗାଇଥିବା ଟିକସ କମ ଅଛି | ମହାରାଷ୍ଟ୍ରରେ ପେଟ୍ରୋଲ ଉପରେ ୨୫ ପ୍ରତିଶତ ଓ ଅତିରିକ୍ତ ୫.୧୨ ଟଙ୍କା ଟିକସ ଥିବାବେଳେ କର୍ଣ୍ଣାଟକରେ ଇନ୍ଧନ ମୂଲ୍ୟ ଏବେ ବି ସୁଲଭ ରହିଛି | ଏଥିସହ ଗୁଜୁରାଟ ଏବଂ ମଧ୍ୟପ୍ରଦେଶ ତୁଳନାରେ କର୍ଣ୍ଣାଟକରେ ଡିଜେଲ ମୂଲ୍ୟ କମ୍ ରହିଛି। କର୍ଣ୍ଣାଟକରେ ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି ପାଇଁ ସିଦ୍ଧରମେୟା ବିଜେପିକୁ ଦାୟୀ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସେ କହିଛନ୍ତି, “ଆମେ ଆମ ଲୋକମାନଙ୍କୁ ଯଥାର୍ଥ ମୂଲ୍ୟରେ ଇନ୍ଧନ ଯୋଗାଇବା ପାଇଁ ପ୍ରତିଶ୍ରୁତିବଦ୍ଧ। ଯେତେବେଳେ ବିଜେପି ସରକାର ରାଜ୍ୟରେ ଥିଲେ, ସେମାନେ ପେଟ୍ରୋଲ ଏବଂ ଡିଜେଲ ଉପରେ ଭ୍ୟାଟ୍ ହ୍ରାସ କରୁଥିଲେ, ଯେତେବେଳେ କେନ୍ଦ୍ର ସରକାର ଲଗାତାର ଟ୍ୟାକ୍ସ ହାର ବୃଦ୍ଧି କରିଥିଲେ। କର୍ଣ୍ଣାଟକର ରାଜସ୍ୱ ହ୍ରାସ ପାଇଥିବାବେଳେ କେନ୍ଦ୍ର ସରକାର ନିଜ ରାଜସ୍ବ ପୂରଣ କରିଚାଲିଛନ୍ତି। ଇନ୍ଧନ ଉପରେ ଖୁଚୁରା ବିକ୍ରୟ ଟିକସ ବୃଦ୍ଧି ହେତୁ କର୍ଣ୍ଣାଟକରେ ପେଟ୍ରୋଲ ୩ ଟଙ୍କା ଏବଂ ଡିଜେଲ ଲିଟର ପିଛା ୩.୫୦ ଟଙ୍କା ବ୍ୟୟବହୁଳ ହୋଇଛି। ଏହି ନୂତନ ହାର ଶନିବାର (ଜୁନ୍ ୧୫) ଠାରୁ କାର୍ଯ୍ୟକାରୀ ହୋଇଛି | ରାଜ୍ୟରେ ଇନ୍ଧନ ମୂଲ୍ୟ ବୃଦ୍ଧି ନେଇ ବିଜେପି ସିଦ୍ଧରମେୟା ସରକାରଙ୍କୁ ଟାର୍ଗେଟ କରିଥିଲା । କର୍ଣ୍ଣାଟକ ସରକାରଙ୍କ ଦ୍ୱାରା ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି ନିନ୍ଦନୀୟ ବୋଲି ବିଜେପି ନେତା କହିଥିଲେ । ଲୋକସଭା ନିର୍ବାଚନ ଶେଷ ହେବା ପରେ ରାଜ୍ୟ ସରକାର ଏହି ପଦକ୍ଷେପ ନେଇଥିଲେ। ରାହୁଲ ଗାନ୍ଧୀଙ୍କ ଦେଇଥିବା ପ୍ରତିଶ୍ରୁତି ପୂରଣ ପାଇଁ ଲୋକମାନେ ଅପେକ୍ଷା କରିଥିଲେ। ନିର୍ବାଚନରେ ରାହୁଲ ଗାନ୍ଧୀ ପ୍ରତି ମାସରେ ସମସ୍ତ ମହିଳାଙ୍କ ଆକାଉଣ୍ଟରେ ୮୦୦୦ ଟଙ୍କା ଜମା କରିବେ ବୋଲି ପ୍ରତିଶ୍ରୁତି ଦେଇଥିଲେ ମଧ୍ୟ ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି କରି ଲୋକଙ୍କ ଉପରେ ଆର୍ଥିକ ବୋଝ ବଢାଇବାକୁ ଚେଷ୍ଟା କରାଯାଇଛି, ଯାହା ଠିକ ନୁହେଁ ବୋଲି ବିଜେପି କହିଛି ।