ଆମେ ଶିବସେନା ଛାଡ଼ିନାହୁଁ, କେବଳ ନେତା ବଦଳାଇବାକୁ କହୁଛୁ: ସୁପ୍ରିମକୋର୍ଟରେ ଏଭଳି କହିଲେ ସିନ୍ଦେ ଗୋଷ୍ଠୀ

ନୂଆଦିଲ୍ଲୀ: ଶିବସେନା ଉପରେ ଅଧିକାରକୁ ନେଇ ସୁପ୍ରିମକୋର୍ଟରେ ଶୁଣାଣି ବେଳେ ଏକନାଥ ସିନ୍ଦେଙ୍କ ଗୋଷ୍ଠୀ ବୁଧବାର କହିଛନ୍ତି ଯେ ଆମେ ଦଳ ଛାଡି ନାହୁଁ। ଏକନାଥ ସିନ୍ଦେଙ୍କ ଗୋଷ୍ଠୀର ଓକିଲ ହରିଶ ସାଲଭେ କହିଛନ୍ତି ଯେ ଏହି ମାମଲାରେ ବିରୋଧୀ ଆଇନ ପ୍ରଯୁଜ୍ୟ ନୁହେଁ। ଯେତେବେଳେ ବିଧାୟକ କିମ୍ବା ସାଂସଦମାନେ ଅନ୍ୟ ଦଳକୁ ଯାଆନ୍ତି କିମ୍ବା ଦଳ ଛାଡନ୍ତି ସେତେବେଳେ ଏହା ଲାଗୁ ହୋଇପାରିବ । ଏକନାଥ ସିନ୍ଦେ ଦଳର ବିଧାୟକମାନେ କେବଳ ଦଳର ନେତୃତ୍ୱ ଉପରେ ନାରାଜ ଅଛନ୍ତି ଏବଂ ସଂଖ୍ୟାଗରିଷ୍ଠତା ସେମାନଙ୍କ ସହ ଥିବାରୁ ଏକ ପୃଥକ ଦଳ ପାଇଁ ଦାବି କରୁଛନ୍ତି। ଅଧିକାଂଶ ସାଂସଦ ଏବଂ ବିଧାୟକମାନେ ଏକନାଥ ସିନ୍ଦେଙ୍କ ସହ ଅଛନ୍ତି।

ସେ କହିଛନ୍ତି ଯେ ଏକନାଥ ସିନ୍ଦେଙ୍କ ଗୋଷ୍ଠୀର ବିଧାୟକ ତଥା ସାଂସଦମାନେ ଦଳର ନେତୃତ୍ୱରେ ପରିବର୍ତ୍ତନ ଆଣିବାକୁ ଚାହୁଁଛନ୍ତି। ଅନ୍ୟପକ୍ଷରେ, ଉଦ୍ଧବ ଠାକରେଙ୍କ ଗୋଷ୍ଠୀର ଓକିଲ କପିଲ ସିବଲ କହିଛନ୍ତି ଯେ ବିଦ୍ରୋହୀ ବିଧାୟକମାନେ ଦଳ ପାଇଁ ଦାବି କରିପାରିବେ ନାହିଁ। ବର୍ତ୍ତମାନ ସୁଦ୍ଧା ଏକ ତୃତୀୟାଂଶ ବିଧାୟକ ଦଳ ସହ ଅଛନ୍ତି। ସେ ଯୁକ୍ତି ବାଢ଼ିଛନ୍ତି ଯେ ବିଦ୍ରୋହୀ ବିଧାୟକମାନଙ୍କୁ ଏକ ନୂତନ ଦଳ ଗଠନ କରିବାକୁ କିମ୍ବା ଅନ୍ୟ କେଉଁ ଦଳରେ ଯୋଗଦେବାକୁ ପଡ଼ିବ।

ସେ କହିଛନ୍ତି ଯେ ଏକନାଥ ସିନ୍ଦେ ସରକାର ମଧ୍ୟ ଏକ ଭୁଲ ଢଙ୍ଗରେ ଗଠନ କରାଯାଇଥିବାବେଳେ ତାଙ୍କ ଦ୍ୱାରା ନିଆଯାଇଥିବା ସମସ୍ତ ନିଷ୍ପତ୍ତି ବେଆଇନ । କପିଲ ସିବଲ ଯୁକ୍ତି କରିଛନ୍ତି, ‘ତୁମେ ଏକ ରାଜନୈତିକ ଦଳ ବୋଲି ଦାବି କରିପାରିବ ନାହିଁ। ଗୌହାଟୀରେ ବସି ତୁମେ(ଏକନାଥ) କହୁଛ ଯେ ତୁମେ ଶିବସେନାରେ ଅଛ | ଏହାର ନିଷ୍ପତ୍ତି ନିର୍ବାଚନ ଆୟୋଗ ହିଁ ନେବେ । ତେବେ ପ୍ରଧାନ ବିଚାରପତି ଏନ.ଭି ରାମନା, ଜଷ୍ଟିସ କୃଷ୍ଣ ମୁରାରୀ ଏବଂ ଜଷ୍ଟିସ ହିମା କୋହଲିଙ୍କ ଖଣ୍ଡପୀଠ ଏହି ଶୁଣାଣି ଗୁରୁବାର ପର୍ଯ୍ୟନ୍ତ ସ୍ଥଗିତ ରଖିଛନ୍ତି ।

ସମ୍ବନ୍ଧିତ ଖବର