ହିମାଳୟରେ ଭାରତ-ଚୀନ ମଧ୍ୟରେ ସ୍ଥିତି ଗମ୍ଭୀର ରହିଛି : ଜୟଶଙ୍କର
ନୂଆଦିଲ୍ଲୀ: ଲଦାଖର ପଶ୍ଚିମ ହିମାଳୟ ରେଞ୍ଜରେ ଭାରତ ଓ ଚୀନ୍ ମଧ୍ୟରେ ସ୍ଥିତି ଗମ୍ଭୀର ଓ ବିପଜ୍ଜନକ ରହିଛି ବୋଲି ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର କହିଛନ୍ତି । ଏହି ରେଞ୍ଜର କେତେକ ସ୍ଥାନରେ ସଶସ୍ତ୍ର ବାହିନୀ ପରସ୍ପରର ଅତି ନିକଟରେ ସାମନାସାମନି ମୁତୟନ ଅଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମନ୍ତ୍ରୀ କହିଛନ୍ତି ଯେ ଗତ ଡିସେମ୍ବର ମାସରେ ଦୁଇ ଦେଶ ମଧ୍ୟରେ ଥିବା ସୀମାର ପୂର୍ବ ସେକ୍ଟରରେ ସଂଘର୍ଷ ଘଟିଥିଲା, କିନ୍ତୁ ଏଥିରେ କେହି ମୃତାହତ ହୋଇନଥିଲେ । ଇଣ୍ଡିଆ ଟୁଡେ କନକ୍ଲେଭରେ ଜୟଶଙ୍କର କହିଛନ୍ତି, ମୋ ମନରେ ଏବେ ବି ସ୍ଥିତି ଅତ୍ୟନ୍ତ ସଂବେଦନଶୀଳ ରହିଛି କାରଣ ଏପରି କିଛି ସ୍ଥାନ ଅଛି ଯେଉଁଠାରେ ଦୁଇ ଦେଶର ସେନା ପରସ୍ପରର ନିକଟରେ ରହିଛନ୍ତି ।
ସୂଚନାଯୋଗ୍ୟ ଯେ, ୨୦୨୦ ଜୁନ ମାସରେ ଗଲଓ୍ବାନଠାରେ ଭାରତ ଓ ଚୀନ ସୈନ୍ୟଙ୍କ ମଧ୍ୟରେ ସଂଘର୍ଷ ହୋଇଥିଲା । ଏଥିରେ ୨୦ ଜଣ ଭାରତୀୟ ଯବାନ ସହିଦ ହୋଇଥିଲେ । ଏହି ସଂଘର୍ଷରେ ୪ ଜଣ ପିଏଲଏ ସୈନ୍ୟ ନିହତ ହୋଇଥିବା ଚୀନ କହୁଛି । ତେବେ ବିଭିନ୍ନ ବିଦେଶୀ ଗୁଇନ୍ଦା ସଂସ୍ଥାଙ୍କ ରିପୋର୍ଟ ଅନୁସାରେ ଏଥିରେ ଚୀନର ୪୦ରୁ ଅଧିକ ସୈନିକ ନିହତ କିମ୍ବା ଆହତ ହୋଇଛନ୍ତି । କିନ୍ତୁ ପରେ ଦୁଇ ଦେଶ ମଧ୍ୟରେ ହୋଇଥିବା କୂଟନୈତିକ ଓ ସାମରିକ ଆଲୋଚନା ପରେ ଏବେ ପରିସ୍ଥିତି ଶାନ୍ତ ହୋଇଛି ।