‘ଲୋକ ପଚାରିବେ, ଯଦି ବିରୋଧୀ ମଜଭୁତ ରାଷ୍ଟ୍ରପତି ପ୍ରାର୍ଥୀ ଦେଇପାରିବେନି, ସମର୍ଥ ପ୍ରଧାନମନ୍ତ୍ରୀ କିଭଳି ଦେବେ’: ଶିବସେନା
ମୁମ୍ବାଇ: ଶିବସେନା ଶୁକ୍ରବାର ଦିନ କହିଛି ଯେ ଯଦି ଆଗାମୀ ରାଷ୍ଟ୍ରପତି ନିର୍ବାଚନରେ ବିରୋଧୀଦଳ ଦୃଢ ପ୍ରାର୍ଥୀ ଦେଇ ପାରିବେ ନାହିଁ ତେବେ କିପରି ଜଣେ ଦକ୍ଷ ପ୍ରଧାନମନ୍ତ୍ରୀ ଦେବେ ? ମହାରାଷ୍ଟ୍ରର ଶାସକ ଦଳ କହିଛି ଯେ ବିରୋଧୀ ଦଳ ଆଗାମୀ ରାଷ୍ଟ୍ରପତି ନିର୍ବାଚନକୁ ଗମ୍ଭୀରତାର ସହିତ ନେବା ଆବଶ୍ୟକ | ଦଳର ମୁଖପତ୍ର ‘ସାମନା’ର ଏକ ସମ୍ପାଦକୀୟରେ ଲେଖାଯାଇଛି ଯେ ରାଷ୍ଟ୍ରପତି ନିର୍ବାଚନ ସମୟରେ ମହାତ୍ମା ଗାନ୍ଧୀଙ୍କ ନାତି ଗୋପାଳ କୃଷ୍ଣ ଗାନ୍ଧୀଙ୍କ ନାମ ଏବଂ ନ୍ୟାସନାଲ କନ୍ଫରେନ୍ସ ନେତା ଫାରୁକ୍ ଅବଦୁଲ୍ଲାଙ୍କ ନାମ ବାରମ୍ବାର ଆସୁଛି |
Sambad is now on WhatsApp
Join and get latest news updates delivered to you via WhatsApp
ସାମନାରେ କୁହାଯାଇଛି ଯେ ଅନ୍ୟପକ୍ଷରେ ସରକାର କୌଣସି ‘ତେଜସ୍ୱୀ’ ପ୍ରାର୍ଥୀ ଆଣିବାର ସମ୍ଭାବନା ନାହିଁ | ପାଞ୍ଚ ବର୍ଷ ପୂର୍ବେ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଦୁଇ ତିନି ଜଣ ଲୋକ ମନୋନୀତ କରିଥିଲେ ଏବଂ ଚଳିତ ବର୍ଷ ସେମାନେ ମଧ୍ୟ ତାହା କରିପାରିବେ। ରାଷ୍ଟ୍ରପତି କୋବିନ୍ଦଙ୍କ କାର୍ଯ୍ୟକାଳ ଜୁଲାଇ ୨୪ ରେ ଶେଷ ହେବ ଏବଂ ତାଙ୍କ ପରବର୍ତ୍ତୀ ରାଷ୍ଟ୍ରପତି ପାଇଁ ଜୁଲାଇ ୧୮ ରେ ନିର୍ବାଚନ ହେବ। ବୁଧବାର ଦିନ ରାଷ୍ଟ୍ରପତି ନିର୍ବାଚନ ପାଇଁ ନାମାଙ୍କନପତ୍ର ଦାଖଲ ପ୍ରକ୍ରିୟା ଆରମ୍ଭ ହେବ। ସୂଚନା ଥାଉ କି ଜୁନ୍ ୧୫ରେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ, ନ୍ୟାସନାଲ ଡେମୋକ୍ରାଟିକ୍ ଆଲାଇନ୍ସ (ଏନଡିଏ) ବିରୋଧରେ ମିଳିତ ପ୍ରାର୍ଥୀ ଦେବାକୁ ଏକ ବୈଠକ ଡାକିଥିଲେ | ସେହିପରି ଏନସିପି ସୁପ୍ରିମୋ ଶରଦ ପାୱାର ଜୁନ୍ ୨୦-୨୧ ରେ ମୁମ୍ବାଇରେ ବିରୋଧୀ ଦଳର ଦ୍ୱିତୀୟ ବୈଠକ ଡାକିଛନ୍ତି।
ଶିବସେନା କହିଛି,ଯେ “ଯଦି ପାୱାର ରାଷ୍ଟ୍ରପତି ପ୍ରାର୍ଥୀ ହେବେ ନାହିଁ, ତେବେ କିଏ ପ୍ରାର୍ଥୀ ହେବେ? ଯଦି ଏହି ପ୍ରଶ୍ନର ଉତ୍ତର ଖୋଜିବା କାର୍ଯ୍ୟ ଛଅ ମାସ ପୂର୍ବେ ହୋଇଥାନ୍ତା, ତେବେ ଏହି ନିର୍ବାଚନ ପ୍ରତି ବିରୋଧୀଙ୍କ ଗମ୍ଭୀରତା ଦେଖାଯାଇଥାନ୍ତା। ଯଦି ବିରୋଧୀ ଦଳ ରାଷ୍ଟ୍ରପତି ନିର୍ବାଚନ ପାଇଁ ଜଣେ ଯୋଗ୍ୟ ପ୍ରାର୍ଥୀ ଚୟନ କରିପାରିବେ ନାହିଁ, ତେବେ ୨୦୨୪ରେ ଜଣେ ଦକ୍ଷ ପ୍ରଧାନମନ୍ତ୍ରୀ କିପରି ଦେଇପାରିବେ? ଏହି ପ୍ରଶ୍ନ ନିଶ୍ଚିତ ଭାବରେ ଲୋକଙ୍କ ମନରେ ଆସିବ ବୋଲି ଶିବସେନା ପକ୍ଷରୁ କୁହାଯାଇଛି |