କୋଲକାତା: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ପୂର୍ବତନ ରାଜ୍ୟପାଳ ଜଗଦୀପ ଧନଖଡ଼ଙ୍କ ମଧ୍ୟରେ ଥିବା ମତପାର୍ଥକ୍ୟ କାହାକୁ ଅଛପା ନାହିଁ | ଉଭୟ ଅନେକ ସମୟରେ ଖୋଲାଖୋଲି ଭାବେ ମୁହାଁମୁହିଁ ହୋଇଛନ୍ତି। ମମତା ଅନେକ ସମୟରେ ଧନଖଡ଼ଙ୍କ କାର୍ଯ୍ୟଶୈଳୀକୁ ନେଇ ପ୍ରଶ୍ନ ଉଠାଇଥିବାବେଳେ ଧନଖଡ଼ ମଧ୍ୟ ମମତା ସରକାରର ଦୋଷ ତ୍ରୁଟି ବାବଦରେ ଖୁଲମଖୁଲା କହିଥିଲେ | ଏପରିକି ବିଶ୍ୱବିଦ୍ୟାଳୟର କୁଳପତି ପଦବୀକୁ ନେଇ ଉଭୟଙ୍କ ମଧ୍ୟରେ ବିବାଦ ଏତେ ବଢିଯାଇଥିଲା ଯେ ମମତା ସରକାରଙ୍କ ତରଫରୁ ରାଜ୍ୟପାଳଙ୍କ ବିରୋଧରେ ବିଧାନସଭାରେ ଏକ ସଂକଳ୍ପ ମଧ୍ୟ ଅଣାଯାଇଥିଲା। ବର୍ତ୍ତମାନ ଜଗଦୀପ ଧନଖଡ଼ ଉପରାଷ୍ଟ୍ରପତି ଭାବରେ ମନୋନୀତ ହୋଇଥିବାବେଳେ ମଣିପୁର ରାଜ୍ୟପାଳ ଏଲ ଗଣେଶନଙ୍କୁ ପଶ୍ଚିମବଙ୍ଗର ରାଜ୍ୟପାଳ ଭାବେ ଅତିରିକ୍ତ ଦାୟିତ୍ୱ ଦିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ଏହି ସମୟରେ ମମତା ସରକାରର ମନ୍ତ୍ରୀ ଶୋଭନଦେବ ଚାଟାର୍ଜୀଙ୍କ ଏକ ବିବୃତ୍ତି ସାମ୍ନାକୁ ଆସିଛି, ଯେଉଁଥିରେ ସେ ରାଜ୍ୟପାଳ ପଦକୁ ସମାପ୍ତ କରିବାକୁ ଚାହୁଁଛନ୍ତି। ଶୋଭନଦେବ ଚାଟାର୍ଜୀ କହିଛନ୍ତି, ମୁଁ ଭାବୁଛି ରାଜ୍ୟର ମୁଖ୍ୟ ବିଚାରପତି ରାଜ୍ୟପାଳଙ୍କ ଦାୟିତ୍ୱ ଗ୍ରହଣ କରିବା ଉଚିତ୍ | ମୁଖ୍ୟ ବିଚାରପତି ଆଇନର ସେହି ଦିଗଗୁଡ଼ିକୁ ସମ୍ଭାଳି ପାରିବେ, ଯାହା ରାଜ୍ୟପାଳ କରନ୍ତି। ସେ ଆହୁରି କହିଛନ୍ତି, ମୁଁ ପୂର୍ବରୁ ମଧ୍ୟ ଏଭଳି ପରାମର୍ଶ ଦେଇଛି। ଏହି ପରାମର୍ଶ ଅନେକ ସରକାରୀ ଆୟୋଗରେ ମଧ୍ୟ ଅନ୍ତର୍ଭୁକ୍ତ କରାଯାଇଛି।
ସେ କହିଛନ୍ତି, ଏହି ପ୍ରସ୍ତାବ କେବଳ ପଶ୍ଚିମବଙ୍ଗ ପାଇଁ ସୀମିତ ହେବା ଉଚିତ ନୁହେଁ | ଦେଶରେ ବହୁଦଳୀୟ ବ୍ୟବସ୍ଥା ଅଛି | ବେଳେବେଳେ ଏକ ନିର୍ଦ୍ଦିଷ୍ଟ ଦଳ କେନ୍ଦ୍ରରେ ରହୁଥିବାବେଳେ ଅନ୍ୟ ଦଳମାନେ ରାଜ୍ୟର କ୍ଷମତା ଗ୍ରହଣ କରନ୍ତି | ଉଭୟଙ୍କ ମଧ୍ୟରେ ପାର୍ଥକ୍ୟ ବିକାଶ କାର୍ଯ୍ୟକୁ ପ୍ରଭାବିତ କରିଥାଏ | ସେ କହିଛନ୍ତି, ବିଚାରପତି ଜଣେ ଅଣ-ରାଜନୈତିକ ବ୍ୟକ୍ତି ଏବଂ ସେ ଆଇନକୁ ଭଲ ଭାବରେ ଜାଣନ୍ତି | ଏଭଳି ପରିସ୍ଥିତିରେ ସେ ରାଜ୍ୟପାଳଙ୍କ ଦାୟିତ୍ୱ ଗ୍ରହଣ କରିବା ଉଚିତ୍।