ଦିଲ୍ଲୀରେ ସ୍ବେଚ୍ଛାସେବୀ ସଂଗଠନର ଅଭିଯୋଗ : ବୈଜୟନ୍ତ ଓ ଜାଗି ପଣ୍ଡାଙ୍କ ମାଲିକାନାରେ ଥିବା କମ୍ପାନିରେ ବ୍ୟାପକ ଆର୍ଥିକ ହେରଫେର
ନୂଆଦିଲ୍ଲୀ: ପୂର୍ବତନ ସାଂସଦ ବୈଜୟନ୍ତ ପଣ୍ଡା ଓ ତାଙ୍କ ପତ୍ନୀ ଜାଗିମଙ୍ଗତ ପଣ୍ଡାଙ୍କ ମାଲିକାନାରେ ଥିବା କମ୍ପାନିଗୁଡ଼ିକରେ ବ୍ୟାପକ ଆର୍ଥିକ ହେରଫେର କରାଯାଉଥିବା ଅଭିଯୋଗ ଆଣିଛନ୍ତି ଦିଲ୍ଲୀର ଆଇନଜୀବୀ ଅତୁଲ ଗୁଲେରିଆ । ସୋମବାର ନୂଆଦିଲ୍ଲୀର ପ୍ରେସ କ୍ଲବ ଅଫ୍ ଇଣ୍ଡିଆରେ ସ୍ବେଚ୍ଛାସେବୀ ସଂଗଠନ ‘ପାଥ୍’ ପକ୍ଷରୁ କରାଯାଇଥିବା ଏକ ସାମ୍ବାଦିକ ସମ୍ମିଳନୀରେ ଗୁଲେରିଆ ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡାଙ୍କ ନାମରେ ଏଭଳି ଅଭିଯୋଗ କରିଛନ୍ତି। ସେ କହିଛନ୍ତି, ବୈଜୟନ୍ତ ପଣ୍ଡା ଓ ଜାଗି ମଙ୍ଗତ ପଣ୍ଡାଙ୍କ ମାଲିକାନାରେ ଥିବା କମ୍ପାନିଗୁଡ଼ିକରେ ବିପୁଳ ପରିମାଣର ଅର୍ଥ ହେରଫେର କରାଯାଉଛି।
Sambad is now on WhatsApp
Join and get latest news updates delivered to you via WhatsApp
ସଂଗଠନ ପକ୍ଷରୁ କରାଯାଇଥିବା ଅଭିଯୋଗ ଅନୁସାରେ ଜାଗି ଓ ବୈଜୟନ୍ତ ପଣ୍ଡା ଆୟକର ଚୋରି ଓ ସିଏସଆର ପାଣ୍ଠି ହେରଫେରରେ ସାମିଲ ଅଛନ୍ତି । ବାହାମାସ ଦ୍ୱୀପରେ ଥିବା ତିନୋଟି ଜାଲି କମ୍ପାନି ଜରିଆରେ ଏହି ଆର୍ଥିକ ହେରଫେର ହେଉଥିବା କହିଛି ସଂଗଠନ । ‘ପାଥ୍’ର ଅଭିଯୋଗ ଅନୁସାରେ ବାହାମାସରୁ ଯେଉଁ ତିନୋଟି କମ୍ପାନିରୁ ଭାରତ ଟଙ୍କା ଆସୁଥିଲା ସେହି କମ୍ପାନିଗୁଡିକୁ ବୈଜୟନ୍ତ ଓ ଜାଗି ପଣ୍ଡାଙ୍କର ଦୁଇଟି କମ୍ପାନି (ପଣ୍ଡା ଇନଭେଷ୍ଟମେଣ୍ଟ୍ ପ୍ରାଇଭେଟ୍ ଲିମିଟେଡ୍ ଓ ମେଟ୍ରୋ ସ୍କାଇ ଲାଇଟ୍ ପ୍ରାଇଭେଟ୍ ଲିମିଟେଡ୍) ନିୟନ୍ତ୍ରଣ କରନ୍ତି । ବାହାମାସର ଏହି କମ୍ପାନିରୁ ଆସୁଥିବା ଟଙ୍କା ମଂଜୁଳା ଦେବୀ ଟ୍ରଷ୍ଟକୁ ଯାଇଥାଏ ବୋଲି ସଂଗଠନ ଅଭିଯୋଗ କରିଛି ।
ଏ ନେଇ ଫେବ୍ରୁଆରି ମାସରେ ଦିଲ୍ଲୀ ହାଇକୋର୍ଟରେ ‘ପାଥ୍’ ପକ୍ଷରୁ ଏକ ମାମଲା ଦାୟର କରାଯାଇଥିଲା । ହାଇକୋର୍ଟ ଏହା ମନି ଲଣ୍ଡ୍ରିଂ ମାମଲା ଭଳି ମନେ ହେଉଥିବା କହିବା ସହିତ ତଦନ୍ତ ଆଦେଶ ଦେଇଥିଲେ । ତେବେ ଫେବ୍ରୁଆରି ମାସରୁ ତଦନ୍ତ ଆଦେଶ ଦିଆଯାଇଥିଲେ ମଧ୍ୟ ଏ ପର୍ଯ୍ୟନ୍ତ କୌଣସି ଅଗ୍ରଗତି ହୋଇନାହିଁ । ତେଣୁ ତଦନ୍ତକୁ ତ୍ୱାରାନ୍ୱିତ କରିବାକୁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଆଦେଶ ଦିଅନ୍ତୁ ବୋଲି ସଂଗଠନ ଦାବି କରିଛି ।