ମୁମ୍ବାଇ: ଭୀମା କୋରେଗାଓଁ ହିଂସା ମାମଲାରେ ମାଓବାଦୀ ଲିଙ୍କ୍ ନେଇ ଗିରଫ ହୋଇଥିବା ୫ ସାମାଜିକ କର୍ମୀଙ୍କୁ ସୁପ୍ରିମକୋର୍ଟ ଗୃହବନ୍ଦୀ ଆଦେଶ ଦେଇଥିବା ବେଳେ ଆଜି ମହାରାଷ୍ଟ୍ର ସରକାର ଏ ବାବଦରେ କିଛି ଦସ୍ତାବିଜ ଦାଖଲ କରିଛନ୍ତି। ଉକ୍ତ ୫ ସାମାଜିକ କର୍ମୀଙ୍କ ଗୃହବନ୍ଦୀ ନିର୍ଦ୍ଦେଶ ବାତିଲ୍ କରାଯାଉ ଏବଂ ଏମାନଙ୍କୁ ପୁଲିସ ତଦନ୍ତ ଅନ୍ତର୍ଭୁକ୍ତ କରାଯାଉ ବୋଲି ସୁପ୍ରିମକୋର୍ଟଙ୍କୁ ସରକାର ଅନୁରୋଧ କରିଛନ୍ତି। ମହାରାଷ୍ଟ୍ର ସରକାର କହିଛନ୍ତି, ଗିରଫ ହୋଇଥିବା ୫ ସାମାଜିକ କର୍ମୀ ସିପିଆଇ (ମାଓବାଦୀ) ଗୋଷ୍ଠୀର ଜଣେ ଜଣେ ସକ୍ରିୟ କର୍ମୀ। ଏମାନେ ଦେଶ ବିରୋଧରେ ବଡ଼ ଧରଣର ହିଂସା ଏବଂ ସଶସ୍ତ୍ର ବିଦ୍ରୋହର ଷଡ଼ଯନ୍ତ୍ର କରୁଥିଲେ।
Sambad is now on WhatsApp
Join and get latest news updates delivered to you via WhatsApp
ଉକ୍ତ ୫ ସାମାଜିକ କର୍ମୀ ବରବରା ରାଓ, ଆଇନଜୀବୀ ସୁଧା ଭରଦ୍ୱାଜ, ସାମାଜିକ କର୍ମୀ ଅରୁଣ ଫେରେଇରା, ଭେର୍ନନ୍ ଗନସାଲଭେସ୍ ଏବଂ ଗୌତମ ନବଲଖାଙ୍କୁ ଗୃହବନ୍ଦୀ ରଖାଗଲେ ସେମାନେ ବିଭିନ୍ନ ବଳିଷ୍ଠ ପ୍ରମାଣକୁ ନଷ୍ଟ କରିବା ଆଶଙ୍କା ରହିଛି । ତାହାକୁ ଦୃଷ୍ଟିରେ ରଖି ସେମାନଙ୍କ ଗୃହବନ୍ଦୀକୁ ବାତିଲ କରାଯାଉ ବୋଲି ମହାରାଷ୍ଟ୍ର ସରକାର ସୁପ୍ରିମକୋର୍ଟଙ୍କୁ ଅନୁରୋଧ କରିଛନ୍ତି। ରାଜ୍ୟ ସରକାର କହିଛନ୍ତି, ଉକ୍ତ ୫ ଜଣ ସାମାଜିକ କର୍ମୀଙ୍କ ବିରୋଧରେ ବଳିଷ୍ଠ ପ୍ରମାଣ ରହିଛି। ଗତ ଏପ୍ରିଲ୍ ଏବଂ ଜୁନ୍ ମାସରେ ଭୀମା କୋରେଗାଓଁ ହିଂସା ମାମଲାରେ ଗିରଫ ହୋଇଥିବା ୫ ଜଣଙ୍କ ବାସଭବନରେ ଚଢ଼ଉ ବେଳେ ଜବତ ହୋଇଥିବା ଲ୍ୟାପ୍ଟପ୍ ଏବଂ ପେନ୍ଡ୍ରାଇଭ୍ରୁ ଏ ସଂକ୍ରାନ୍ତ ପ୍ରମାଣ ମିଳିଛି।