କେହି ଜଣେ ଭେଟିବାକୁ ଆସୁଛି, ହଇରାଣ କରିବନି; ମୃତ୍ୟୁ ପୂର୍ବରୁ ଶିଷ୍ୟଙ୍କୁ ଏଭଳି କହିଥିଲେ ମହନ୍ତ ନରେନ୍ଦ୍ର ଗିରି
ନୂଆଦିଲ୍ଲୀ: ଉତ୍ତରପ୍ରଦେଶର ପ୍ରୟାଗରାଜରେ ଅଖିଳ ଭାରତୀୟ ଆଖଡା ପରିଷଦର ଅଧ୍ୟକ୍ଷ ନରେନ୍ଦ୍ର ଗିରିଙ୍କ ସନ୍ଦେହଜନକ ମୃତ୍ୟୁ ମାମଲାରେ ତିନି ଜଣଙ୍କୁ ଗିରଫ କରାଯାଇଛି । ଏହି ଘଟଣାକୁ ନେଇ ୩ଜଣଙ୍କୁ ଗିରଫ କରାଯିବା ସହ ଶିଷ୍ୟ ଆନନ୍ଦ ଗିରିଙ୍କ ନାଁରେ ମାମଲା ରୁଜୁ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ତେବେ ଏସବୁ ଭିତରେ ସୋମବାରର ପୂରା ଘଟଣାକ୍ରମ ବାବଦରେ ଜାତୀୟ ଗଣମାଧ୍ୟମରେ ମୁହଁ ଖୋଲିଛନ୍ତି ନରେନ୍ଦ୍ର ଗିରିଙ୍କ ଆଉ ଜଣେ ଶିଷ୍ୟ ନିର୍ଭୟ ଦ୍ୱିବେଦୀ । ନିର୍ଭୟଙ୍କ କହିବା ଅନୁଯାୟୀ, ପ୍ରତିଦିନ ଭଳି ସୋମବାର ମଧ୍ୟ ସକାଳ ୫ଟାରୁ ନରେନ୍ଦ୍ର ଗିରିଙ୍କ ଦିନ ଆରମ୍ଭ ହୋଇଥିଲା । ୫ଟା ବେଳେ ଚା’ ପିଇବା ପରେ ୭ଟା ବେଳକୁ ସେ ତଳ ଘରକୁ ଆସିଥିଲେ । ମୁଁ ସାଢେ ୭ଟାରୁ ୮ଟା ମଧ୍ୟରେ ଉଠିବା ପରେ ଗୁରୁଜୀଙ୍କୁ ନମସ୍କାର କରି ମନ୍ଦିର ଚାଲି ଯାଇଥିଲି । ମନ୍ଦିରରୁ ଫେରିବା ବେଳେ ଜାଣିଲି ମହାରାଜ ନରେନ୍ଦ୍ର ଗିରି ସମସ୍ତଙ୍କ ସହ ମଧ୍ୟାହ୍ନ ଭୋଜନ କରି ଉପରକୁ ଯାଇଛନ୍ତି । ଉପର ଘରେ କିଛି ସମୟ ରହିବା ପରେ ପୁଣିଥରେ ଆରାମ କରିବାକୁ ତଳ ଘରକୁ ଆସିଥିଲେ ।
ତଳ ଘରେ ଆରାମ କରିବା ପୂର୍ବରୁ ନରେନ୍ଦ୍ର ଗିରି କହିଥିଲେ ଯେ, ମୋତେ କେହି ଭେଟିବାକୁ ଆସୁଛନ୍ତି, ତେଣୁ ମୁଁ ତଳ ଘରେ ରହିବି । ମୋତେ କେହି ଆଜି ହଇରାଣ କରିବନି । କେହି ତାଙ୍କୁ ଭେଟିବାକୁ ଆସୁଥିବାରୁ ସମସ୍ତଙ୍କୁ ନିଜ ପାଖରୁ ଦୂରେଇ ରଖିଥିଲେ ଅଧ୍ୟକ୍ଷ ନରେନ୍ଦ୍ର ଗିରି। କିନ୍ତୁ କିଏ ନରେନ୍ଦ୍ରଙ୍କୁ ଭେଟିବାକୁ ଆସିବ, ସେ ବିଷୟରେ କାହାକୁ ମଧ୍ୟ ଜଣାନଥିଲା । ତେବେ ନରେନ୍ଦ୍ରଙ୍କ ଝୁଲନ୍ତା ଶବ ଉଦ୍ଧାର ବେଳେ ଏକ ସୁଇସାଇଟ ନୋଟ ଜବତ କରାଯାଇଛି ଯେଉଁଥିରେ ଶିଷ୍ୟ ଆନନ୍ଦ ଗିରିଙ୍କ ନାଁ ରହିଛି ।
ସେପଟେ ଆନନ୍ଦ ଗିରି କହିଛନ୍ତି, ସେ ସବୁପ୍ରକାରର ତଦନ୍ତର ସାମ୍ନା କରିବାକୁ ପ୍ରସ୍ତୁତ ଅଛନ୍ତି । ତାଙ୍କ ବିରୋଧରେ ଷଡଯନ୍ତ୍ର କରାଯାଉଛି ବୋଲି ସେ ଅଭିଯୋଗ କରିଛନ୍ତି । ଆନନ୍ଦ ଗିରିଙ୍କୁ ପଚରାଉଚରା ପାଇଁ ହରିଦ୍ୱାର ଯାଇଛି ଉତରପ୍ରଦେଶ ପୁଲିସ । ସେପଟେ ଆଜି ନରେନ୍ଦ୍ର ଗିରିଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ପ୍ରୟାଗରାଜ ଯିବେ ଉତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ।