ଜୀବନ-ମୃତ୍ୟୁର ଖେଳ ! ଆମ୍ବୁଲାନ୍ସରେ ପୁଅ ଦେଖିଲା ମା’ ଶରୀରରେ ପ୍ରାଣ ନାହିଁ; କିଛି ସମୟ ପରେ ପୁଣି ଚାଲିଲା ନିଶ୍ବାସ, ମା’ ଖୋଲିଲା ଆଖି
ଲକ୍ଷ୍ନୌ: ଉତ୍ତରପ୍ରଦେଶର ଦେଓରିଆ ଜିଲ୍ଲାରେ ଏକ ଅଜବ ଘଟଣା ସାମ୍ନାକୁ ଆସିଛି । ଡାକ୍ତରଖାନାରୁ ଫେରିବା ବାଟରେ ପୁଅ ଭାବିଲା ମା’ ଚାଲିଗଲେ। ଫଳରେ ସେ ସମସ୍ତଙ୍କୁ ମୃତ୍ୟୁ ସମ୍ପର୍କରେ ସୂଚନା ଦେଇଦେଲା ଏବଂ ଘରେ ଶୋକକୁଳ ପରିସ୍ଥିତି ସୃଷ୍ଟି ହୋଇଗଲା । ଏହା ପରେ ମହିଳାଙ୍କ ପରିବାର ସଦସ୍ୟ ମହିଳାଙ୍କ ଅନ୍ତିମ ସଂସ୍କାର ପାଇଁ ପ୍ରସ୍ତୁତି ଆରମ୍ଭ କରିଥିଲେ । ମୃତଦେହକୁ ରଖିବା ପାଇଁ ବାଉଁଶ କାଠ ସଂଗ୍ରହ କରିଦେଇଥିଲେ ଏବଂ ଘରେ ଗ୍ରାମବାସୀ ମଧ୍ୟ ଏକାଠି ହୋଇଯାଇଥିଲେ । ଏହିସବୁ ଚାଲିଥିବା ବେଳେ ପୁଣି ଖବର ଆସିଲା ସେ ବଞ୍ଚିଛନ୍ତି।
Sambad is now on WhatsApp
Join and get latest news updates delivered to you via WhatsApp
ମହୁଆଡିହ ଥାନା ଅଞ୍ଚଳର ବେଲୱା ବଜାରର ବାସିନ୍ଦା କହ୍ନେୟାଙ୍କ ପତ୍ନୀ ମୀନା ଦେବୀ (ବୟସ ୫୫) ଶ୍ଵାସଜନିତ ରୋଗରେ ଗୁରୁତର ଥିଲେ । ହଠାତ୍ ମୀନାଙ୍କ ସ୍ୱାସ୍ଥ୍ୟ ଖରାପ ହେବାରୁ ନିକଟସ୍ଥ ସରକାରୀ ଡାକ୍ତରଖାନାକୁ ନେଇଥିଲେ ପରିବାର ସଦସ୍ୟ । ଯେଉଁଠାରୁ ଡାକ୍ତରମାନେ ତାଙ୍କୁ ଜିଲ୍ଲା ମୁଖ୍ୟ ଡାକ୍ତରଖାନାକୁ ପଠାଇଦେଲେ । ଏଠାରେ ଡାକ୍ତରମାନେ ପ୍ରାଥମିକ ଚିକିତ୍ସା ଦେଇ ତାଙ୍କୁ ଗୋରଖପୁର ବିଆରଡି ମେଡିକାଲ କଲେଜ ହସ୍ପିଟାଲକୁ ପଠାଇ ଦେଇଥିଲେ, ଯେଉଁଠାରେ ମୀନାଙ୍କୁ ଆଇସିୟୁରେ ଭର୍ତ୍ତି କରାଯାଇଥିଲା । ସେଠାରେ ଚିକିତ୍ସା ପରେ ଡାକ୍ତରମାନେ ମୀନା ଦେବୀଙ୍କୁ ଡିସଚାର୍ଜ କରି ତାଙ୍କୁ ଘରକୁ ନେଇ ସେବା କରିବାକୁ କହିଥିଲେ ।
ଏହା ପରେ, ମହିଳାଙ୍କ ପୁଅ ଟିଙ୍କୁ ଏକ ଘରୋଇ ଆମ୍ବୁଲାନ୍ସରେ ମାଆଙ୍କୁ ନେଇ ଗାଁକୁ ଯିବା ବାଟରେ ଅନୁଭବ କଲା ଯେ, ତାଙ୍କ ମା’ଙ୍କର ନିଶ୍ୱାସ ବନ୍ଦ ହୋଇଯାଇଛି ଏବଂ ସେ ଆଉ ଏହି ଦୁନିଆରେ ନାହାନ୍ତି । ଟିଙ୍କୁ ପରିବାର ସଦସ୍ୟଙ୍କୁ ଫୋନ କରି କହିଦେଲା ଯେ, ମା’ଙ୍କର ମୃତ୍ୟୁ ହୋଇଯାଇଛି ଏବଂ ସେ ମୃତଦେହ ଧରି ଘରକୁ ଆସୁଛି । ଏହି ଖବର ଶୁଣିବା ପରେ ଅନ୍ତିମ ସଂସ୍କାର ପାଇଁ ଏଠାରେ ପ୍ରସ୍ତୁତି ଚାଲିଥିବା ବେଳେ ଟିଙ୍କୁ ପୁନର୍ବାର ଫୋନ୍ କରି କହିଥିଲେ ଯେ, ମା ନିଶ୍ୱାସ ନେଉଛନ୍ତି ଏବଂ ଲାଗୁଛି ଯେ ସେ ଜୀବିତ ଅଛନ୍ତି । ଏହା ପରେ ମୀନା ଦେବୀଙ୍କୁ ଏକ ଘରୋଇ ଡାକ୍ତରଖାନାଙ୍କୁ ନିଆ ଯାଇଥିଲା ଓ ସେଠାରେ ମା’ଙ୍କ ସ୍ୱାସ୍ଥ୍ୟାବସ୍ଥା ଠିକ୍ ଥିବାରୁ ଘରକୁ ଫେରିଥିଲେ ।