ଇମ୍ରାନଙ୍କ ଭାରତ ବିରୋଧୀ ମନ୍ତବ୍ୟ ପାଇଁ ସୋନିଆ, ମନମୋହନ ଦାୟୀ : ବିଜେପି
ନୂଆଦିଲ୍ଲୀ : ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁ ଗତ କାଲି ଜାତିସଂଘ ସାଧାରଣ ପରିଷଦ ବୈଠକରେ ଭାରତ ବିରୋଧରେ ଯେତେ କଥା କହିଲେ ସେଥିପାଇଁ କଂଗ୍ରେସକୁ ଦାୟୀ କରିଛି ବିଜେପି । ବିଜେପି ମୁଖପାତ୍ର ସଂବିତ ପାତ୍ର କହିଛନ୍ତି ଯେ ଇମ୍ରାନଙ୍କ ଭାରତ ବିରୋଧୀ ବକ୍ତବ୍ୟ ପାଇଁ ସୋନିଆ ଗାନ୍ଧି, ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ ଦାୟୀ । ସୋନିଆ, ମନମୋହନ ଓ ତତକାଳୀନ ଗୃହମନ୍ତ୍ରୀ ସୁଶୀଲ କୁମାର ସିନ୍ଦେ ଏଥିପାଇଁ ଦେଶବାସୀଙ୍କୁ କ୍ଷମାମାଗନ୍ତୁ ବୋଲି ସେ ଦାବି କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
କଂଗ୍ରେସ ସରକାର ଅମଳରେ ଗୃହମନ୍ତ୍ରୀଙ୍କ ବକ୍ତବ୍ୟକୁ ଉଦ୍ଧାର କରି ଇମ୍ରାନ ଖାଁ ଗତକାଲି ଜାତିସଂଘ ସାଧାରଣ ପରିଷଦ ବୈଠକରେ କହିଥିଲେ ଯେ ଭାରତରେ ଆରଏସଏସ ପକ୍ଷରୁ ଆତଙ୍କବାଦୀ କ୍ୟାମ୍ପ ଖୋଲାଯାଇ ତାଲିମ ଦିଆଯାଉଛି । ଏହାକୁ ନେଇ କଂଗ୍ରେସ ଏକ ଅସୁବିଧାଜନକ ସ୍ଥିତିରେ ପହଞ୍ଚିଯାଇଛି । ସୂଚନାଯୋଗ୍ୟ ଯେ ସୁଶୀଲ କୁମାର ସିନ୍ଦେ ଗୃହମନ୍ତ୍ରୀ ଥିବାବେଳେ କଂଗ୍ରେସ ପକ୍ଷରୁ ପ୍ରଥମ ଥର ପାଇଁ ହିନ୍ଦୁ ଆତଙ୍କବାଦ ଶବ୍ଦର ପ୍ରୟୋଗ କରାଯାଇଥିଲା । ମାଲେଗାଁଓ, ସମଝୌତା ଏକ୍ସପ୍ରେସ ବିସ୍ଫୋରଣ ପାଇଁ ହିନ୍ଦୁ ଆତଙ୍କବାଦୀଙ୍କୁ ଦାୟୀ କରାଯାଇଥିଲା । ଏହା ପରେ ପି.ଚିଦାମ୍ବରମ ଗୃହମନ୍ତ୍ରୀ ଥିବାବେଳେ ସେ ଏହି ପ୍ରସଙ୍ଗକୁ ଆହୁରି ଆଗକୁ ନେଇଥିଲେ ।