‘ସୋରେନ ବନାମ ସୋରେନ’ ଲଢ଼େଇ

ଦୁମକା: ଝାଡ଼ଖଣ୍ଡର ଦୁମକା ନିର୍ବାଚନ ମଣ୍ଡଳୀରେ ସୋରେନ ବନାମ ସୋରେନ ଲଢ଼େଇ ଚଳିତ ନିର୍ବାଚନର ଅନ୍ୟତମ ଚର୍ଚ୍ଚାର ପ୍ରସଙ୍ଗ ରହିଛି। ଆସନ୍ତାକାଲି ଶେଷ ପର୍ଯ୍ୟାୟରେ ଏଠାରେ ଭୋଟ୍ ହେବ। ଶିବୁ ସୋରେନଙ୍କ ବୋହୂ ସୀତା ସୋରେନଙ୍କୁ ଭାରତୀୟ ଜନତା ପାର୍ଟି (ବିଜେପି) ପ୍ରାର୍ଥୀ କରିଥିବା ବେଳେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମ୍ଏମ୍)ର ବରିଷ୍ଠ ନେତା ତଥା ୬ ଥର ବିଧାୟକ ହୋଇଥିବା ନଳିନ ସୋରେନ୍ ତାଙ୍କ ବିପକ୍ଷରେ ନିର୍ବାଚନ ଲଢ଼ୁଛନ୍ତି। ଗତ କିଛି ବର୍ଷ ହେବ ସୋରେନ ପରିବାରରେ ଅଶାନ୍ତି ଲାଗି ରହିଥିବା ବେଳେ ନିଜ ପରିବାରକୁ ଚ୍ୟାଲେଞ୍ଜ କରିବା ପାଇଁ ସୀତା ସୋରେନ ବିଜେପିରେ ଯୋଗ ଦେଇଥିଲେ। ଦୀର୍ଘ ଦିନ ଧରି ଜେଏମ୍‌ଏମ୍‌ର ସଦସ୍ୟ ତଥା ତିନିଥର ବିଧାୟିକା ଥିବା ସୀତା ସୋରେନ ମାର୍ଚ୍ଚ ମାସରେ ବିଜେପିରେ ଯୋଗ ଦେଇଥିଲେ।

ବିଜେପିରେ ଯୋଗ ଦେବା ପରେ ସୀତା ଅଭିଯୋଗ କରିଥିଲେ ଯେ ଜେଏମ୍‌ଏମ୍‌ ଦ୍ୱାରା ତାଙ୍କୁ ଅବହେଳା କରାଯାଇଥିଲା ଏବଂ ୨୦୦୯ରେ ତାଙ୍କ ସ୍ୱାମୀ ଦୁର୍ଗା ସୋରେନଙ୍କ ଦେହାନ୍ତ ପରେ ସେ ଏକାନ୍ତବାସରେ ରହୁଥିଲେ। ସୀତା ସୋରେନ କହିଥିଲେ, ଝାଡ଼ଖଣ୍ଡ ଆନ୍ଦୋଳନର ଜଣେ ପ୍ରମୁଖ ବ୍ୟକ୍ତିତ୍ୱ ମୋ ସ୍ୱାମୀଙ୍କ ଦେହାନ୍ତ ପରେ ମୁଁ ଓ ମୋ ପରିବାର ନିରନ୍ତର ଅବହେଳାର ସମ୍ମୁଖୀନ ହୋଇଛୁ। ଆମେ ଉଭୟ ଦଳ ଓ ପରିବାରଠାରୁ ଅଲଗା ଅନୁଭବ କରୁଛୁ, ଯାହା ଅତ୍ୟନ୍ତ ଦୁଃଖଦାୟକ। ଏହା ମଧ୍ୟ କୁହାଯାଉଛି ଯେ ନିର୍ବାଚନ ଜିତିବା ସତ୍ତ୍ୱେ ସୀତା ସୋରେନଙ୍କୁ ଜେଏମ୍‌ଏମ୍‌ ନେତୃତ୍ୱାଧୀନ ଝାଡ଼ଖଣ୍ଡ କ୍ୟାବିନେଟରେ ସ୍ଥାନ ମିଳି ନ ଥିଲା। ଦୁର୍ଗା ସୋରେନ ସର୍ବଦା ଜେଏମ୍‌ଏମ୍‌ର ନେତୃତ୍ୱ ନେବେ ବୋଲି ବିଶ୍ୱାସ କରାଯାଉଥିଲା, କିନ୍ତୁ ୨୦୦୯ରେ ତାଙ୍କ ମୃତ୍ୟୁ ହେମନ୍ତଙ୍କୁ ଦାୟିତ୍ୱ ନେବାପାଇଁ ବାଟ ତିଆରି କରିଥିଲା। ଦୁମକା ଏକଦା ଜେଏମ୍‌ଏମ୍‌ର ପାରମ୍ପରିକ ଆସନ ଥିଲା ଯେଉଁଠାରେ ଶିବୁ ସୋରେନ ୮ ଥର ଜିତିଥିଲେ। ୨୦୧୯ ନିର୍ବାଚନରେ ବିଜେପି ପ୍ରାର୍ଥୀ ସୁନୀଲ ସୋରେନ ଶିବୁ ସୋରେନଙ୍କୁ ୪୭,୫୯୦ ଭୋଟ୍ ବ୍ୟବଧାନରେ ପରାସ୍ତ କରିଥିଲେ। ସରକାର ବିରୋଧୀ ଲହରରେ ଜେଏମ୍‌ଏମ୍‌ ଶିକାରୀପଡ଼ାର ବିଧାୟକ ନଳିନ ସୋରେନଙ୍କୁ ପ୍ରାର୍ଥୀ କରିଛି। ସେ ଲଗାତାର ୭ ଥର ବିଧାନସଭା ଆସନ ଜିତିଛନ୍ତି। ଜେଏମ୍‌ଏମ୍‌ରୁ ବିଜେପିରେ ଯୋଗ ଦେବା ପରେ ଏହି ଆସନରୁ ଜିତିବା ସୀତାଙ୍କ ପାଇଁ ସମ୍ମାନର ପ୍ରଶ୍ନ।