ଉତ୍ତର କୋରିଆର ଡ୍ରୋନ୍‌କୁ ଘଉଡ଼ାଇବାକୁ ଯାଇ ଖସିପଡ଼ିଲା ଦକ୍ଷିଣ କୋରିଆ ଯୁଦ୍ଧବିମାନ

ସିଓଲ : ଉତ୍ତର କୋରିଆର କେତେକ ଡ୍ରୋନ୍ ଦକ୍ଷିଣ କୋରିଆର ବାୟୁସୀମାରେ ପ୍ରବେଶ କରିବା ପରେ ଦକ୍ଷିଣ କୋରିଆ ଯୁଦ୍ଧବିମାନ ଉଡ଼ାଇବା ଓ ଗୋଳାମାଡ଼ କରିବା ମାଧ୍ୟମରେ ଏହାର ପ୍ରତ୍ୟୁତ୍ତର ଦେଇଛି। କିନ୍ତୁ ଦୁର୍ଭାଗ୍ୟକୁ ଦକ୍ଷିଣ କୋରିଆର ଯୁଦ୍ଧବିମାନଟି ମଝି ଆକାଶରୁ ତଳକୁ ଖସିପଡ଼ିଥିଲା।

ସୂଚନାଯୋଗ୍ୟ, ସୋମବାର ଦିନ ସ୍ଥାନୀୟ ସମୟ ଦିନ ପ୍ରାୟ ସାଢ଼େ ୧୦ଟା ବେଳେ ଉତ୍ତର କୋରିଆର କେତେକ ଡ୍ରୋନ୍ ଦକ୍ଷିଣ କୋରିଆର ସୀମା ଭିତରେ ପ୍ରବେଶ କରି ପଶ୍ଚିମ ସୀମା ନିକଟରେ ଥିବା ଗିମ୍ପୋ ସହର ଉପରେ ଉଡ଼ିବାର ଦେଖିବାକୁ ମିଳିଥିଲା। ସେମାନଙ୍କୁ ଘଉଡ଼ାଇବା ପାଇଁ ଦକ୍ଷିଣ କୋରିଆ ତୁରନ୍ତ ଏକ ଜେଟ୍‌ କେଏ-୧ ପଠାଇଥିଲା। କିନ୍ତୁ ଯୁଦ୍ଧବିମାନଟି ଓଞ୍ଜୁ ବିମାନଘାଟିରୁ ଉଡ଼ାଣ ଆରମ୍ଭ କରିବା ପରେ ପରେ କୌଣସି ତ୍ରୁଟି ଯୋଗୁ ତଳକୁ ଖସିପଡ଼ିଥିଲା। ତେବେ ଏହାର ଦୁଇଜଣ ପାଇଲଟ ପାରାସୁଟ୍ ସାହାଯ୍ୟରେ ବାହାରି ଆସି ଜୀବନ ବଞ୍ଚାଇବାରେ ସକ୍ଷମ ହୋଇଛନ୍ତି। ସେମାନେ ଏବେ ହସ୍ପିଟାଲରେ ଚିକିତ୍ସିତ ହେଉଛନ୍ତି।