ନୂଆଦିଲ୍ଲୀ: ବିଶ୍ବର ୪ଟି ଦେଶର ୪ଜଣ ମହାକାଶଚାରୀଙ୍କୁ ନେଇ ଶନିବାର ରାତିରେ ‘କେନେଡି ସ୍ପେସ୍‌ ସେଣ୍ଟର୍‌’ରୁ  ‘ସ୍ପେସ୍‌ଏକ୍ସ’ର ଏକ ରକେଟ୍‌ ଆନ୍ତର୍ଜାତିକ ମହାକାଶ ଗବେଷଣା କେନ୍ଦ୍ର ଅଭିମୁଖେ ଯାତ୍ରା କରିଥିବା କଥା ‘ସିଏନ୍‌ଏନ୍‌’ ରିପୋର୍ଟ କରିଛି।

Advertisment

ଶନିବାର ରାତି ୩.୨୭ରେ ‘କେନେଡି ସ୍ପେସ୍‌ ସେଣ୍ଟର୍‌’ର ‘ଲଞ୍ଚ୍‌ ପ୍ୟାଡ୍‌ ୩୯-ଏ’ରୁ ‘ଫାଲ୍‌କନ୍‌ ରକେଟ୍‌ ୯’ ‘କ୍ରୁ-ସେଭେନ୍‌’ ନାମକ ‘ଡ୍ରାଗନ୍‌ ଏଡ୍ୟୁରାନ୍‌ସ୍‌’ କ୍ୟାପ୍‌ସୁଲ୍‌ରେ ଉକ୍ତ ମହାକାଶଚାରୀମାନଙ୍କୁ ନେଇ ମହାକାଶକୁ ଯାତ୍ରା କରିଛି।

୪ଜଣ ମହାକାଶଚାରୀଙ୍କ ମଧ୍ୟରୁ ମିସନ୍‌ କମାଣ୍ଡର୍‌ ଭାବେ ସେଥିରେ ଅଛନ୍ତି ‘ନାସା’ର ଜାସ୍‌ମିନ୍‌ ମୋଗ୍‌ବେଲି,‘ୟୁରୋପୀୟ ମହାକାଶ ଏଜେନ୍‌ସି’ର ପ୍ରତିନିଧି ଡେନ୍‌ମାର୍କର ଏଣ୍ଡ୍ରିଏସ୍‌ ମଗେନ୍‌ସେନ୍‌, ‘ଜାପାନ ଏରୋସ୍ପେସ୍ ଏକ୍ସପ୍ଲୋରେସନ୍‌ ଏଜେନ୍‌ସି’ର ସାତୋଶି ଫୁରୁକାୱା ଏବଂ ‘ରସ୍‌କସ୍‌ମସ୍‌’ର ରୁଷୀୟ ମହାକାଶଚାରୀ କନ୍‌ଷ୍ଟାଣ୍ଟିନ୍‌ ବୋରିସୋଭ୍‌।

publive-image Image Courtesy of Orlando Sentinel

କକ୍ଷପଥରେ ପହଞ୍ଚିବା ପରେ ‘କ୍ରୁ ଡ୍ରାଗନ୍‌ କ୍ୟାପ୍‌ସୁଲ୍‌’ ‘ଫାଲ୍‌କନ୍‌-୯’ ରକେଟ୍‌କୁ ପୃଥକ୍‌ ହୋଇ କକ୍ଷପଥରେ ଏକାକୀ ପରିକ୍ରମା ଆରମ୍ଭ କରିଛି। ମହାକାଶ ଗବେଷଣା କେନ୍ଦ୍ରକୁ ଯିବା ଆଗରୁ ଏହା ଆହୁରି ୨୪ ଘଣ୍ଟାରୁ ଅଧିକ ସମୟ ଧରି ଘୂରି ଧୀରେ ଧୀରେ କକ୍ଷପଥ ପରିବର୍ତ୍ତନ କରିବ।

ଏଥିରେ ଥିବା ମହାକାଶଚାରୀମାନେ ରବିବାର ସକାଳ ୮.୩୯ (ସ୍ଥାନୀୟ ସମୟ) ମିନିଟ୍‌ରେ ମହାକାଶ କେନ୍ଦ୍ରରେ ଅବତରଣ କରିବ। ତା’ପରେ ଏଥିରେ ଯାଇଥିବା ମହାକାଶଚାରୀ ମୋଗ୍‌ବେଲି, ମଗେନ୍‌ସେନ୍‌, ଫୁରୁକାୱା ଓ ବୋରିସୋଭ୍‌ ଉକ୍ତ ଘୂର୍ଣ୍ଣିୟମାନ ମହାକାଶ ଗବେଷଣା କେନ୍ଦ୍ରରେ ପୂର୍ବରୁ ଅବସ୍ଥାପିତ ୭ଜଣ ମହାକାଶଚାରୀଙ୍କୁ ଭେଟିବେ।

ପରବର୍ତ୍ତୀ ୫ ଦିନ ସେମାନେ ଉକ୍ତ ମହାକାଶଚାରୀଙ୍କ ହାତରୁ ସେମାନେ ଚଳାଇଥିବା ଅଭିଯାନର ଦାୟିତ୍ବ ଗ୍ରହଣ କରିବେ। ସୂଚନାଯୋଗ୍ୟ ‘ସ୍ପେସ୍‌ଏକ୍ସ୍‌-୬’ରେ ଯାଇଥିବା ଉକ୍ତ ମହାକାଶଚାରୀମାନେ ଗତ ମାର୍ଚ ମାସରୁ ସେଠାରେ ଅବସ୍ଥାନ କରି ଗବେଷଣା ଚଳାଇଛନ୍ତି।