ଖାଉଟି ବ୍ୟାପାର ବିଭାଗର ସ୍ବତନ୍ତ୍ର ପରିଚ୍ଛନ୍ନତା ଅଭିଯାନ: ଡିଜିଟାଇଜେସନ ପରେ ୭୦୬୧ କାଗଜ ଫାଇଲ ନଷ୍ଟ
ନୂଆଦିଲ୍ଲୀ : କେନ୍ଦ୍ର ସରକାରଙ୍କ ଖାଉଟି ବ୍ୟାପାର ବିଭାଗ ପକ୍ଷରୁ ଏକ ସ୍ୱତନ୍ତ୍ର ଅଭିଯାନ ୨.୦ ମାଧ୍ୟମରେ ଦପ୍ତର ଓ ଏହାର ପରିସରର ସ୍ୱଚ୍ଛତା ରକ୍ଷା, ସଫେଇ ଓ ଶୋଭାବର୍ଦ୍ଧନ କାର୍ଯ୍ୟ ଦେଶବ୍ୟାପୀ କରାଯାଇଛି । ଏହି ଅଭିଯାନ କାଳରେ ବ୍ୟୁରୋ ଅଫ ଷ୍ଟାଣ୍ଡାର୍ଡ, ଜାତୀୟ ଟେଷ୍ଟ ହାଉସ, ଜାତୀୟ ଖାଉଟି ସମବାୟ ମହାସଂଘ ଓ ଜାତୀୟ ଖାଉଟି ଆୟୋଗର କାର୍ଯ୍ୟାଳୟ ସହିତ ମୋଟ ୭୩ଟି ଦପ୍ତରରେ ସ୍ୱଚ୍ଛତା ଓ ପରିଚ୍ଛନ୍ନତା ରକ୍ଷା କାର୍ଯ୍ୟକ୍ରମ ହାତକୁ ନିଆଯାଇ ତାହାକୁ ସମ୍ପୂର୍ଣ୍ଣ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ଗାନ୍ଧୀ ଜୟନ୍ତୀରୁ ଆରମ୍ଭ ହୋଇଥିବା ଏହି କାର୍ଯ୍ୟ ଆନୁଷ୍ଠାନିକଭାବେ ଆସନ୍ତା ୩୧ ତାରିଖରେ ଶେଷ ହେବ। ଏହି ଅଭିଯାନ କାଳରେ ରେକର୍ଡ ପରିଚାଳନା ଉପରେ ଗୁରୁତ୍ୱ ପ୍ରଦାନ କରାଯାଇଥିଲା । ଏଥିରେ ୧୫,୨୮୫ କାଗଜପତ୍ର ଫାଇଲକୁ ଚିହ୍ନଟ କରାଯାଇ ସେଗୁଡ଼ିକର ସମୀକ୍ଷା କାମ ହାତକୁ ନିଆଯାଇଥିଲା। ସମୀକ୍ଷା ହୋଇଥିବା ମୋଟ ୧୩୧୩୧ ଫାଇଲ ମଧ୍ୟରୁ ୭୦୬୧ଟିକୁ ଡିଜିଟାଇଜ କରାଯିବା ପରେ ମୂଳ କାଗଜ ଫାଇଲଗୁଡିକୁ ନଷ୍ଟ କରି ଦିଆଯାଇଛି ।
ସେହିଭଳି ୬୦୨ ଇ-ଫାଇଲକୁ ସମୀକ୍ଷା କରାଯାଇ ଇ-ଅଫିସ ବର୍ଗରେ ୪୭୩ଟିକୁ ବନ୍ଦ କରାଯାଇଛି। ଚିହ୍ନଟ ହୋଇଥିବା ରେକର୍ଡ ପତ୍ର ମଧ୍ୟରୁ ୮୬%କୁ ସବୁଦିନ ପାଇଁ ବନ୍ଦ କରିଦିଆଯାଇଛି। ଏହି ଅଭିଯାନ କାଳରେ ପୁରୁଣା ଫାଇଲ, ରେକର୍ଡପତ୍ର ଓ ଅନ୍ୟାନ୍ୟ ଅଫିସ ଆବର୍ଜନାକୁ ୨,୩୮, ୨୬୮ ଟଙ୍କାରେ ବିଭାଗ ବିକ୍ରି କରିଛି । ପୁରୁଣା ଫାଇଲ ଓ କାଗଜପତ୍ର ସବୁକୁ ହଟାଇବା ପରେ ବିଭିନ୍ନ ଦପ୍ତରରେ ମୋଟ ୫୧୨୧ ବର୍ଗଫୁଟ ସ୍ଥାନ ମୁକ୍ତ ହୋଇଛି ।
ଏଥି ସହିତ ବିଭାଗ ପକ୍ଷରୁ ସଦର କାର୍ଯ୍ୟାଳୟ ସମେତ ବିଭିନ୍ନ ବିଭାଗୀୟ ଦପ୍ତର ପରିସରରେ ବୃକ୍ଷରୋପଣ ଓ ଶୋଭାବର୍ଦ୍ଧନ କାର୍ଯ୍ୟକ୍ରମକୁ ହାତକୁ ନିଆଯାଇଥିଲା । ଏଥିରେ ଦେଶବ୍ୟାପୀ ବିଭିନ୍ନ ଦପ୍ତର ପରିସରରେ ୫୦୦ ଚାରା ରୋପଣ କରାଯାଇଛି।