ମୃତବ୍ୟକ୍ତିଙ୍କୁ ଜୀବନ ଦେଲା ସ୍ପିଡ୍‌ବ୍ରେକର!

କୋହ୍ଲାପୁର: ଦୁର୍ଘଟଣା କମାଇବାକୁ ସ୍ପିଡ୍‌ବ୍ରେକର (ହମ୍ପ୍‌ସ) ନିର୍ମାଣ କରାଯାଇଥାଏ। ତେବେ ଅନେକ ସମୟରେ ଯୋଜନାବିହୀନ ଭାବେ ନିର୍ମାଣ କରାଯାଇଥିବା ସ୍ପିଡ୍‌ବ୍ରେକର ଦୁର୍ଘଟଣା କମାଇବା ପରିବର୍ତେ ଦୁର୍ଘଟଣା ବଢ଼ାଇଥାଏ। ଏଭଳି ଏକ ଯୋଜନାବିହୀନ ଭାବେ ନିର୍ମାଣ କରାଯାଇଥିବା ସ୍ପିଡ୍‌ବ୍ରେକର ଯେ ଜଣେ ମୃତ ବ୍ୟକ୍ତିର ଜୀବନ ଫେରାଇଦେବ, ସେକଥା ଶୁଣିଲେ ଯେ କେହି ଆଶ୍ଚର୍ଯ୍ୟ ନହୋଇ ରହିପାରିବ ନାହିଁ। 

ପଶ୍ଚିମ ମହାରାଷ୍ଟ୍ର କୋହ୍ଲାପୁର ଜିଲ୍ଲା କାସବା-ବାୱଡାର ବାସିନ୍ଦା ପାଣ୍ଡୁରଙ୍ଗ ଉଲପି (୬୫) ଗତ ଡିସେମ୍ବର ୧୬ରେ ହୃଦ୍‌ଘାତର ଶିକାର ହୋଇଥିଲେ। ତାଙ୍କୁ ଏକ ଘରୋଇ ହସ୍‌ପିଟାଲ୍‌ରେ ଭର୍ତ୍ତି କରାଯାଇଥିଲ। ସେଠାରେ ତାଙ୍କର ମୃତ୍ୟୁ ଘଟିଥିଲା। ହସ୍‌ପିଟାଲ୍‌ରୁ ଉଲପିଙ୍କ ମୃତଦେହ ନେଇ ଏକ ଆମ୍ବୁଲାନ୍‌ସ ଫେରୁଥିଲା। ଘର ନିକଟରେ  ଶୋକସନ୍ତପ୍ତ ପରିବାର ସଦସ୍ୟ, ସମ୍ପର୍କୀୟମାନେ ଅପେକ୍ଷା କରି ରହିଥିଲେ ଏବଂ ଶେଷକୃତ୍ୟ ପାଇଁ ପ୍ରସ୍ତୁତି ଆରମ୍ଭ ହୋଇଯାଇଥିଲା। କିନ୍ତୁ ରାସ୍ତାରେ ଆଶ୍ଚର୍ଯ୍ୟଜନକ ଘଟଣା ଘଟିଲା।  ରାସ୍ତା ଉପରେ ଥିବା ଏକ ହମ୍ପ୍‌ସରେ ଧକ୍କା ଦେଇ ଦ୍ରୁତଗତିରେ ଆସୁଥିବା ଆମ୍ବୁଲାନ୍‌ସଟି ସାଂଘାତିକ ଭାବେ ଥରି ଉଠିଥିଲା। କିନ୍ତୁ ଏହି ଧକ୍କା ମୃତ ଉଲପିଙ୍କୁ ଜୀବନ ଦେଇଥିଲା। ଉଲପିଙ୍କ ପତ୍ନୀ କହିଛନ୍ତି, ଏହାପ‌ରେ ତାଙ୍କ ସ୍ବାମୀଙ୍କ ନିଶ୍ଚଳ ଶରୀରରେ ପ୍ରତିକ୍ରିୟା ସୃଷ୍ଟି ହୋଇଥିଲା। ହାତର ଅଙ୍ଗୁଳିଗୁଡ଼କ ଉଠାଇଥିଲେ। ପରେ ତାଙ୍କୁ ଆଉ ଏକ ଘରୋଇ ହସ୍‌ପିଟାଲ୍‌ରେ ଭର୍ତ୍ତି କରାଯାଇଥିଲା। ସେଠାରେ ଆଞ୍ଜିଓପ୍ଲାଷ୍ଟି କରାଯାଇଥିଲା। ୧୫ ଦିନ ରହିବା ପରେ ସୋମବାର ସେ ଘରକୁ ଜୀବିତ ଓ ସୁସ୍ଥ ହୋଇ ଫେରିଛନ୍ତି।