ୟୁପିରେ ଟୋଲ ପ୍ଲାଜା କର୍ମଚାରୀଙ୍କୁ ଧକ୍କା ଦେଲା ଦ୍ରୁତଗାମୀ ଗାଡି, କ୍ୟାମେରାରେ କଏଦ ହେଲା ଘଟଣା

ନୂଆଦିଲ୍ଲୀ: ଉତ୍ତରପ୍ରଦେଶର ହାପୁର ଜିଲ୍ଲା ଅନ୍ତର୍ଗତ ଦିଲ୍ଲୀ-ଲକ୍ଷ୍ନୌ ରାଜପଥର ଏକ ଟୋଲ୍‌ ବୁଥ୍‌ରେ ଦ୍ରୁତ ଗତିରେ ଆସୁଥିବା ଏକ କାର୍‌ ଧକ୍କାରେ ଜଣେ ଟୋଲ୍‌ ପ୍ଲାଜା କର୍ମଚାରୀ ଗୁରୁତର ଆହତ ହୋଇଛନ୍ତି। ଗୁରୁବାର ବିଳମ୍ବିତ ରାତିରେ ଏହି ଘଟଣା ଘଟିଥିବା କୁହାଯାଉଛି।

ଘଟଣାର ସିସିଟିଭି ଫୁଟେଜରେ ପିଲଖୁୱାର ଛଜରସି ଟୋଲ ପ୍ଲାଜାରେ ଜଣେ କର୍ମଚାରୀ ସୁରକ୍ଷା ପାଇଁ ବୁଲୁଥିବା ଦେଖିବାକୁ ମିଳିଛି।

ଏହାର କିଛି ସମୟ ପରେ ଦ୍ରୁତଗାମୀ କାରଟି ଟୋଲ ବୁଥ୍‌ରେ ଥିବା ବ୍ୟକ୍ତିଙ୍କୁ ଧକ୍କା ଦେଇଥିଲା ଏବଂ ଧକ୍କା ଏତେ ଜୋରରେ ହୋଇଥିଲା ଯେ ଗାଡିଟି ଭାରସାମ୍ୟ ହରାଇ ଥିଲା ଓ କାରର ସମ୍ମୁଖ ଭାଗ ଖସି ପଡ଼ିଥିଲା।
ଟୋଲ ପ୍ଲାଜା କର୍ମଚାରୀଙ୍କୁ ଗୁରୁତର ଅବସ୍ଥାରେ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ଏହି ଘଟଣାକୁ ଦୃଷ୍ଟିରେ ରଖି ପୁଲିସ ତଦନ୍ତ ଆରମ୍ଭ କରିଛି।