ଶିଶୁ ଉପରେ ଶୁକ୍ରାଣୁ କିମ୍ବା ଡିମ୍ବାଣୁଦାତାଙ୍କ ଅଧିକାର ନାହିଁ : ବମ୍ବେ ହାଇକୋର୍ଟ

ମୁମ୍ବାଇ: ଶୁକ୍ରାଣୁ ଓ ଡିମ୍ବାଣୁଦାତାମାନେ ସେମାନଙ୍କ ଠାରୁ ଜନ୍ମ ହୋଇଥିବା ସନ୍ତାନ ଉପରେ ଆଇନଗତ ଅଧିକାର ଦାବି କରିପାରିବେ ନାହିଁ ବୋଲି ବମ୍ବେ ହାଇକୋର୍ଟ ରାୟ ଦେଇଛନ୍ତି। କୋର୍ଟ ଜଣେ ୪୨ ବର୍ଷୀୟା ମହିଳାଙ୍କୁ ତାଙ୍କ ପାଞ୍ଚ ବର୍ଷର ଯାଆଁଳା ଝିଅଙ୍କୁ ଭେଟିବାକୁ ଅନୁମତି ଦେଇ କହିଛନ୍ତି ଯେ ଯେଉଁମାନେ ଶୁକ୍ରାଣୁ ଏବଂ ଡିମ୍ବାଣୁ ଦାନ କରିଛନ୍ତି ସେମାନେ କେବଳ ଜେନେଟିକ୍ ପିତାମାତା ହୋଇପାରନ୍ତି, କିନ୍ତୁ ପ୍ରାକୃତିକ କିମ୍ବା ଆଇନଗତ ପିତାମତା ନୁହନ୍ତି ।

ଆବେଦନକାରୀ ମହିଳା ଅଦାଲତଙ୍କୁ କହିଥିଲେ ଯେ ତାଙ୍କ ଯାଆଁଳା ଝିଅ ସରୋଗେସି ମାଧ୍ୟମରେ ଜନ୍ମ ହୋଇଥିଲେ, ଯେଉଁଥିପାଇଁ ତାଙ୍କ ସାନ ଭଉଣୀ ଅଣ୍ଡା ଦାନ କରିଥିଲେ। ଆବେଦନକାରୀ ମହିଳାଙ୍କ ସ୍ୱାମୀ ଦାବି କରିଛନ୍ତି ଯେ ପିଲାମାନଙ୍କ ଉପରେ ତାଙ୍କ ପତ୍ନୀଙ୍କର କୌଣସି ଅଧିକାର ନାହିଁ ଏବଂ ପତ୍ନୀଙ୍କ ସାନ ଭଉଣୀ ଜଣେ ଡିମ୍ବାଣୁ ଦାତା ଏବଂ ତେଣୁ ତାଙ୍କୁ ଯାଆଁଳା ସନ୍ତାନର ପ୍ରାକୃତିକ ମା' ଭାବରେ ବିବେଚନା କରାଯିବା ଉଚିତ୍ ।

ଆବେଦନକାରୀ ମହିଳାଙ୍କ ସ୍ୱାମୀଙ୍କ ଆବେଦନକୁ ବମ୍ବେ ହାଇକୋର୍ଟ ଗ୍ରହଣ କରିନଥିଲେ। ଅଦାଲତ କହିଛନ୍ତି ଯେ ଡିମ୍ବାଣୁଦାତା ମହିଳା ପିଲାଙ୍କ ପ୍ରାକୃତିକ ମା' ହୋଇପାରିବେ ନାହିଁ। କାରଣ ସେ ସ୍ବେଚ୍ଛାକୃତ ଭାବେ ଏପରି କରିଥିଲେ। ତାଙ୍କୁ ଜେନେଟିକ୍ ମା' ବୋଲି ବିବେଚନା କରାଯାଇପାରେ। କୋର୍ଟ ଏହା ମଧ୍ୟ କହିଛନ୍ତି ଯେ ଡିମ୍ବାଣୁଦାତା ମହିଳାଙ୍କୁ ଝିଅମାନଙ୍କ ଉପରେ ତାଙ୍କର ସମସ୍ତ ଅଧିକାର ତ୍ୟାଗ କରିବାକୁ ପଡିବ । ଆବେଦନକାରୀ ମହିଳା ଏବଂ ତାଙ୍କ ସ୍ୱାମୀ ହେଉଛନ୍ତି ଝିଅମାନଙ୍କର ଏକମାତ୍ର ପିତାମାତା ।