ନୂଆଦିଲ୍ଲୀ: ଜଣାଶୁଣା ୟୁଟ୍ୟୁବର୍‌ ଜ୍ୟୋତି ମାଲହୋତ୍ରା ପାକିସ୍ତାନ ପାଇଁ ଗୁଇନ୍ଦାଗିରି କରିଥିବା ଅଭିଯୋଗରେ ଗିରଫ ହୋଇଛନ୍ତି। ଜ୍ୟୋତି ୟୁଟ୍ୟୁବ ଏବଂ ଇନଷ୍ଟାଗ୍ରାମ୍‌ରେ ବିପୁଳ ଲୋକପ୍ରିୟତା ହାସଲ କରିଛନ୍ତି ଏବଂ ଚଳିତ ବର୍ଷ ଆରମ୍ଭରେ ସେ ବିଭିନ୍ନ ପଡ଼ୋଶୀ ରାଷ୍ଟ୍ରକୁ ଗସ୍ତ କରିବାର ଫଟୋ, ଭିଡିଓ ସେୟାର କରିଛନ୍ତି। ପାକିସ୍ତାନ ଗୁଇନ୍ଦା ସଂସ୍ଥା ଆଇଏସ୍‌ଆଇ ଏବଂ ପାକିସ୍ତାନୀ ଏଜେଣ୍ଟ୍‌ମାନଙ୍କୁ ଦେଶର ସମ୍ବେଦନଶୀଳ ସୂଚନା ପ୍ରଦାନ କରିଥିବା ଅଭିଯୋଗରେ ହରିୟାଣାର ଜ୍ୟୋତି ଏବଂ ଅନ୍ୟ ୬ ଜଣ ଗିରଫ ହୋଇଛନ୍ତି। ‌ଜ୍ୟୋତିଙ୍କ ୟୁଟ୍ୟୁବ ଚ୍ୟାନେଲ୍‌ ନାଁ ହେଉଛି ‘ଟ୍ରାଭେଲ୍‌ ୱିଥ୍‌ ଜୋ’ ଏବଂ ତାଙ୍କର ୩,୭୭,୦୦୦ ଅନୁଗାମୀ ଅଛନ୍ତି। ତାଙ୍କ ଇନ୍‌ଷ୍ଟା ଆକାଉଣ୍ଟ୍‌ରେ ମଧ୍ୟ ୧,୩୨,୦୦୦ ଅନୁଗାମୀ ଅଛନ୍ତି। ତାଙ୍କ ଆକାଉଣ୍ଟ୍‌ରୁ ଏହା ଜଣାପଡ଼ୁଛି ଯେ ସେ ଇଣ୍ଡୋନେସିଆ, ଚୀନ୍‌ ସମେତ ଅନେକ ବିଦେଶ ରାଷ୍ଟ୍ରକୁ ଗସ୍ତ କରିଛନ୍ତି। ଜ୍ୟୋତିଙ୍କ ଘର ହିସାର୍‌ରେ। ସେ ଲଗାତାର ଆଇଏସ୍‌ଆଇ ସହ ଯୋଗାଯୋଗରେ ରହି ଦେଶର ସମ୍ବେଦନଶୀଳ ସୂଚନା ପ୍ରଦାନ କରିଛନ୍ତି ବୋଲି ପୁଲିସ କହିଛି। କେବଳ ସେ ଏକା ନୁହନ୍ତି, ଗିରଫ ହୋଇଥିବା ଅନ୍ୟ ୬ ଜଣ ବି ଆଇଏସ୍‌ଆଇକୁ ଗୁପ୍ତ ସୂଚନା ପ୍ରଦାନ କରିଛନ୍ତି। ୬ ଜଣଙ୍କ ମଧ୍ୟରୁ ଜଣେ ହରିୟାଣାର କଇଥଲ୍‌, ଜଣେ ପାନିପତ, ଜଣେ ନୁହରୁ ଅଞ୍ଚଳରୁ ଗିରଫ ହୋଇଛନ୍ତି। ହରିୟାଣାରୁ ଅନ୍ୟ ଜଣେ ଛାତ୍ର ମଧ୍ୟ ଗୁଇନ୍ଦାଗିରି ଅଭିଯୋଗରେ ଗିରଫ ହୋଇଛନ୍ତି। ତାଙ୍କ ନାଁ ଦେବେନ୍ଦ୍ର ସିଂହ। ଏହା ପୂର୍ବରୁ ଅନ୍ୟ ୨ ଜଣ ଏହି ମାମଲାରେ ପଞ୍ଜାବରୁ ଗିରଫ ହୋଇଥିଲେ। 

Advertisment

ଟ୍ରାଭେଲ୍‌ ବ୍ଲଗର୍‌ ଜ୍ୟୋତି ତାଙ୍କ ଭିଡିଓ ମାଧ୍ୟମରେ ପାକିସ୍ତାନକୁ ଅନେକ ଥର ପ୍ରଶଂସା କରି ଭାରତୀୟଙ୍କୁ ବିଭ୍ରାନ୍ତ କରିବାକୁ ପ୍ରୟାସ କରିଛନ୍ତି। ସୋସିଆଲ୍‌ ମିଡିଆ ବ୍ୟକ୍ତିତ୍ବ ଭାବେ ତାଙ୍କର ପ୍ରଭାବ ରହିଥିବାରୁ ବିଦେଶୀ ଏଜେଣ୍ଟ୍‌ମାନେ ତାଙ୍କୁ ପ୍ରଚାର ଉଦ୍ଦେଶ୍ୟରେ ଏଭଳି ଭିଡିଓ ବହୁଳ ଭାବେ ପୋଷ୍ଟ୍‌ କରିବା ପାଇଁ ଉତ୍ସାହିତ କରୁଥିଲେ। ଜ୍ୟୋତି ରେକର୍ଡ କରିଥିବା ଭିଡିଓରେ ସେ ଅଟାରୀ-ୱାଘା ସୀମା ଅତିକ୍ରମ କରିବା, ଲାହୋରର ଅନାରକଲି ବଜାର ବୁଲିବା, ବସ୍‌ ଯାତ୍ରା କରିବା ଏବଂ ପାକିସ୍ତାନରେ ସବୁଠାରୁ ବଡ଼ ହିନ୍ଦୁ ମନ୍ଦିର ବୁଲିବା ଦେଖିବାକୁ ମିଳିଛି। ଇନ୍‌ଷ୍ଟାଗ୍ରାମରେ ପୋଷ୍ଟ୍ କରିଥିବା ଏକ ଫଟୋ‌ରେ ସେ ଉର୍ଦ୍ଦୁରେ ଏକ କ୍ୟାପସନ୍‌ ରଖିଛନ୍ତି ଏବଂ ତାହା ହେଉଛି ‘ଇସ୍କ ଲାହୋର’। ସେ ମଧ୍ୟ ପାକିସ୍ତାନୀ ଖାଦ୍ୟର ବିଷୟବସ୍ତୁ ଉଲ୍ଲେଖ କରିବା ସହ ଦୁଇ ରାଷ୍ଟ୍ରର ସଂସ୍କୃତି ମଧ୍ୟରେ ତୁଳନା କରିଛନ୍ତି। ଗତବର୍ଷ ଜ୍ୟୋତି କାଶ୍ମୀର ଯାଇଥିଲେ ଏବଂ ଡାଲ୍‌ ହ୍ରଦରେ ନୌକାବିହାର କରିଥିଲେ। ତଦନ୍ତକାରୀ ଅଧିକାରୀଙ୍କ ଅନୁଯାୟୀ ଜ୍ୟୋତି ମାଲହୋତ୍ରା ୨୦୨୩ରେ କମିସନ୍‌ ଏଜେଣ୍ଟ୍‌ଙ୍କ ଦ୍ବାରା ଭିସା ପାଇବା ପରେ ପାକିସ୍ତାନ ଯାଇଥିଲେ। ହରିୟାଣା ପୁଲିସର ସୂଚନା ମୁତାବକ ଜ୍ୟୋତି ପାକିସ୍ତାନକୁ ୩ ଥର ଯାଇଛନ୍ତି। ପୁଲିସ ତାଙ୍କ ପାସ୍‌ପୋର୍ଟ ଜବତ କରିଛି। ଜ୍ୟୋତିଙ୍କ ପାକିସ୍ତାନ ଗସ୍ତ ଅବସରରେ ସେ ଏହସାନ ଉର୍‌ ରହିମ୍‌ ଓରଫ୍‌ ଡାନିସ୍‌ଙ୍କୁ ଭେଟିଥିଲେ। ଡାନିସ୍‌ ହେଉଛନ୍ତି ନୂଆଦିଲ୍ଲୀସ୍ଥିତ ପାକିସ୍ତାନ ହାଇକମିସନ୍‌ରେ ଅବସ୍ଥାପିତ ଜଣେ ଅଧିକାରୀ। ‌ଖୁବ୍‌ଶୀଘ୍ର ‌ସେମାନଙ୍କ ମଧ୍ୟରେ ବନ୍ଧୁତା ହୋଇଥିଲା ଏବଂ ଡାନିସ୍‌ ତାଙ୍କୁ ପାକିସ୍ତାନର ଗୁଇନ୍ଦା ଅଧିକାରୀଙ୍କ ସହ ପରିଚୟ କରାଇଥିଲେ। ଉଲ୍ଲେଖ‌‌ଯୋଗ୍ୟ ଯେ ଚଳିତ ମାସ ଆରମ୍ଭରେ ଭାରତ ଡାନିସ୍‌ଙ୍କୁ ‘ଅଲୋଡ଼ା’ ଘୋଷଣା କରିବା ସହ ତାଙ୍କୁ ଭାରତ ଛାଡ଼ିବାକୁ ନିର୍ଦ୍ଦେଶ ଦେଇଥିଲେ।

ଶ୍ରୀକ୍ଷେତ୍ର ଆସିଥିଲେ, ସଂପର୍କରେ ଅଛନ୍ତି ପୁରୀ ଯୁବତୀ

ଭୁବନେଶ୍ୱର: ପାକିସ୍ତାନ ପାଇଁ ଗୁଇନ୍ଦାଗିରି କରି ଗିରଫ ହୋଇଥିବା ଜ୍ୟୋତି ମାଲହୋତ୍ରା ୯ ମାସ ତଳେ ପୁରୀ ଆସି ମହାପ୍ରଭୁଙ୍କ ଦର୍ଶନ କରିଥିଲେ। ସିଂହଦ୍ବାରରେ ଫଟୋ ଓ ଭିଡିଓ ଉତ୍ତୋଳନ କରିଥିଲେ। ପୁରୀ ବେଳାଭୂମି ବୁଲିବା ସହ ସେଠାରେ ବି ଭିଡିଓ ଓ ଫଟୋ ଉତ୍ତୋଳନ କରିଥିଲେ। ଯାହାର ଭିଡିଓ ଓ ଫଟୋକୁ ସେ ନିଜ ଇନ୍‌ଷ୍ଟାଗ୍ରାମ ଆଇଡି ‘ଟ୍ରାଭେଲ୍‌ ୱିଥ୍‌ ଜୋ’ରେ ଛାଡ଼ିଛନ୍ତି। ଜ୍ୟୋତି ଆଜି ପୁଲିସ ଦ୍ବାରା ଗିରଫ ହେବା ପରେ ତାଙ୍କ ପୁରୀ ଆସିବା ନେଇ ଚର୍ଚ୍ଚା ଜୋର୍‌ ଧରିଛି। ଉଭୟ କେନ୍ଦ୍ର ଓ ରାଜ୍ୟ ଗୁଇନ୍ଦା ବିଭାଗ ଏହାର ଖୋଳତାଡ଼ ଆରମ୍ଭ କରିଛି। ସେ କେବେ ଆସିଥିଲେ, ହୋଟେଲରେ ରହିଥିଲେ କି ଅନ୍ୟ କେଉଁଠି ରହିଥିଲେ, ଯଦି ହୋଟେଲରେ ରହିଥିଲେ, ତେବେ କେଉଁ ହୋଟେଲରେ ରହିଥିଲେ, କେତେ ଦିନ ରହିଥିଲେ, କାହା ସହିତ ଆସିଥିଲେ, କିଏ ଭିଡିଓ ଓ ଫଟୋ ଉତ୍ତୋଳନ କରୁଥିଲା, ସବୁଦିଗକୁ ଅନୁଧ୍ୟାନ କରାଯାଉଛି। ବଡ଼କଥା ହେଉଛି, ପୁରୀ କାଳିକାଦେବୀସାହିର ଜଣେ ଯୁବତୀ ଜ୍ୟୋତିଙ୍କ ସଂପର୍କରେ ଥିଲେ। ଜ୍ୟୋତିଙ୍କ ସହ ତାଙ୍କର ଘନିଷ୍ଠ ବନ୍ଧୁତା ଥିଲା। ଗତ ଜାନୁଆରିରେ ଦୁଇଜଣ ସାଙ୍ଗ ହୋଇ ପାକିସ୍ତାନର କର୍ତ୍ତାରପୁର କରିଡର୍‌ ଯାଇଥିଲେ। ଯାହାର ଫଟୋ ସଂପୃକ୍ତ ଯୁବତୀ ନିଜ ସୋସିଆଲ୍‌ ଆଇଡିରେ ଛାଡ଼ିଛନ୍ତି। ଏଣୁ ସଂପୃକ୍ତ ଯୁବତୀଙ୍କୁ ରାଜ୍ୟ ଗୁଇନ୍ଦା ଓ ଜିଲ୍ଲା ପୁଲିସ ପକ୍ଷରୁ ପଚରାଉଚରା ଆରମ୍ଭ ହୋଇଥିବା ଜଣାପଡ଼ିଛି।

ଆଗକୁ ବିଶ୍ବପ୍ରସିଦ୍ଧ ରଥଯାତ୍ରା। ପ୍ରତିବର୍ଷ ଭଳି ଚଳିତବର୍ଷ ବି ୧୦ଲକ୍ଷରୁ ଅଧିକ ଶ୍ରଦ୍ଧାଳୁଙ୍କ ସମାଗମ ହେବାର ସମ୍ଭାବନା ରହିଛି। ଏଭଳି ସ୍ଥିତିରେ ଗୁଇନ୍ଦାଗିରି ପାଇଁ ଜ୍ୟୋତିଙ୍କ ଗିରଫ ପୁଲିସର ମୁଣ୍ଡବଥା ବଢ଼ାଇ ଦେଇଛି। ସେପଟେ ଗୁଇନ୍ଦା ବିଭାଗ ପକ୍ଷରୁ ଶ୍ରୀମନ୍ଦିର ଓ ପୁରୀ ଡିଆର୍‌ଡିଓ କାର୍ଯ୍ୟାଳୟର ସୁରକ୍ଷାକୁ ଆହୁରି ବଢ଼ାଇବା ଉପରେ ଜିଲ୍ଲା ପୁଲିସକୁ ପରାମର୍ଶ ଦିଆଯାଇଛି। ଜ୍ୟୋତି ଜଣେ ଟ୍ରାଭେଲ୍‌ ବ୍ଲଗର୍‌ ଓ ୟୁଟ୍ୟୁବର୍‌। ସେ ବିଭିନ୍ନ ରାଜ୍ୟର ବିଭିନ୍ନ ସ୍ଥାନ ବୁଲି ନିଜ ବ୍ଲଗ୍‌, ୟୁଟ୍ୟୁବ୍‌, ଇନ୍‌ଷ୍ଟାଗ୍ରାମ ଭଳି ସୋସିଆଲ୍‌ ସାଇଟ୍‌ରେ ଛାଡ଼ିଥାନ୍ତି। ଜ୍ୟୋତି ‌୨୦୨୪ ସେପ୍ଟେମ୍ବର ୨୯ ତାରିଖରେ ନିଜ ଇନ୍‌ଷ୍ଟାଗ୍ରାମରେ ଶ୍ରୀମନ୍ଦିରର ଦୁଇଟି ଭିଡିଓ ଛାଡ଼ିଛନ୍ତି। ସେହିଭଳି ୨୦୨୪ ସେପ୍ଟେମ୍ବର ୨୭ ତାରିଖରେ ପୁରୀ ବେଳାଭୂମିରେ ବୁଲିବାର କିଛି ଫଟୋ ଇନ୍‌ଷ୍ଟାଗ୍ରାମରେ ଛାଡ଼ିଛନ୍ତି। ଜ୍ୟୋତି ଯେହେତୁ ପାକିସ୍ତାନ ଆଇଏସ୍‌ଆଇ ପାଇଁ ଗୁଇନ୍ଦାଗିରି କରୁଥିବା ଅଭିଯୋଗ ହୋଇଛି, ତେଣୁ ପୁରୀ ଆସିବା ପଛରେ ସେଭଳି କିଛି ମନ୍ଦ ଉଦ୍ଦେଶ୍ୟ ନାହିଁ ତ’? ତାହାର ଖୋଳତାଡ଼ ଆରମ୍ଭ କରିଛି କେନ୍ଦ୍ର ଓ ରାଜ୍ୟ ଗୁଇନ୍ଦା ବିଭାଗ।