ଶ୍ରୀଲଙ୍କା ବୋମା ବିସ୍ଫୋରଣ ଘଟଣା : ଇସ୍ତଫା ଦେଲେ ପ୍ରତିରକ୍ଷା ସଚିବ ଓ ପୁଲିସ ମୁଖ୍ୟ
କଲମ୍ବୋ : ଶ୍ରୀଲଙ୍କାରେ ଗତ ରବିବାରଦିନ ହୋଇଥିବା ସିରିଜ ବୋମା ବିସ୍ଫୋରଣ ଘଟଣା ଲାଗି ନିଜକୁ ଦାୟୀ କରି ଇସ୍ତଫା ଦେଇଛନ୍ତି ଦେଶର ପ୍ରତିରକ୍ଷା ସଚିବ ହେମସିରି ଫର୍ଣ୍ଣାଣ୍ଡୋ । ଏହା ସହିତ ପୁଲିସ ଆଇଡି ପୁଜିଥ ଜୟସୁନ୍ଦର ମଧ୍ୟ ଇସ୍ତଫା ଦେଇଛନ୍ତି । ଦେଶରେ ହୋଇଥିବା ଏତେ ବଡ଼ ଆତଙ୍କବାଦୀ କାଣ୍ଡକୁ ଅଟକେଇବାରେ ଅସଫଳ ହେବାରୁ ସେମାନଙ୍କୁ ଇସ୍ତଫା ଦେବାକୁ ରାଷ୍ଟ୍ରପତି ମୈତ୍ରୀପାଳ ସିରିସେନା ନିର୍ଦ୍ଦେଶ ଦେଇଥିଲେ । ଉଭୟ ଅଧିକାରୀ ଗୁରୁବାରଦିନ ନିଜ ନିଜର ଇସ୍ତଫାପତ୍ର ରାଷ୍ଟ୍ରପତିଙ୍କ ନିକଟକୁ ପଠାଇଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗତ ରବିବାରଦିନ ଇଷ୍ଟରପର୍ବ ଅବସରରେ କଲମ୍ବୋରେ ଲଗାତାର୯ଟି ବୋମା ବିସ୍ଫୋରଣ ଘଟି ମୋଟ ପ୍ରାୟ ୩୬୦ ବ୍ୟକ୍ତି ପ୍ରାଣ ହରାଇଥିଲେ । ଅନ୍ୟପକ୍ଷରେ ଶ୍ରୀଲଙ୍କାର ଗୁଇନ୍ଦା ବିଭାଗ ଆଗକୁ ଆହୁରି ବିସ୍ଫୋରଣର ହେବାର ଆଶଙ୍କା ବ୍ୟକ୍ତ କରୁଥିବାରୁ କଲମ୍ବୋରେ ଏବେ ମଧ୍ୟ ହାଇଆଲର୍ଟ ଜାରି କରାଯାଇଛି । ଗୁରୁବାରଦିନ ରାଜଧାନୀ କଲମ୍ବୋଠାରୁ ୪୦ କିଲୋମିଟର ଦୂର ପୁଗୋଡା ଟାଉନରେ ଆଉ ଏକ ଛୋଟ ଧରଣର ବିସ୍ଫୋରଣ ହୋଇଛି । ଏଥିରେ କୌଣସି ଜନଜୀବନ ହାନୀ ହୋଇନାହିଁ ।