ଶ୍ରୀଲଙ୍କା ଆର୍ଥିକ ସଂକଟ : ଦିନକୁ ୧୩ ଘଣ୍ଟା ପାଓ୍ବାର କଟ୍, ଷ୍ଟ୍ରିଟ୍ ଲାଇଟ୍ ଲିଭାଇବାକୁ ନିର୍ଦ୍ଦେଶ
କଲମ୍ବୋ : ଶ୍ରୀଲଙ୍କାରେ ଆର୍ଥିକ ସଂକଟ ଦିନକୁ ଦିନ ଅଧିକ ଉତ୍କଟ ହେଲାଣି । ଖାଦ୍ୟ, ଔଷଧ, ପେଟ୍ରୋଲିୟମ ଓ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ପାଇଁ ଏହି ଦେଶର ଲୋକମାନେ ସଂଘର୍ଷ କରୁଛନ୍ତି । କୋଇଲା ଆମଦାନୀ ପାଇଁ ବୈଦେଶିକ ମୁଦ୍ରା ନଥିବାରୁ ବିଜୁଳି ସଂକଟ ଦେଖାଦେଇଛି । ଏଥିପାଇଁ ଦିନକୁ ୧୩ ଘଣ୍ଟା ବିଜୁଳି କାଟ ହେଉଛି । ପୁଣି ଏହି କାରଣରୁ ଷ୍ଟ୍ରିଟ୍ ଲାଇଟ୍ ଲିଭାଇବାକୁ ଶ୍ରୀଲଙ୍କା ସରକାର ନିଷ୍ପତ୍ତି ନେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଶ୍ରୀଲଙ୍କାର ଶକ୍ତିମନ୍ତ୍ରୀ ପବିତ୍ରା ଓ୍ବାନିରାଚ୍ଚି କହିଛନ୍ତି ଯେ ଶକ୍ତି ସଂଚୟ ପାଇଁ ଷ୍ଟ୍ରିଟ୍ ଲାଇଟ ସବୁ ଲିଭାଇବାକୁ ନିର୍ଦ୍ଦେଶ ଦିଆଯାଇଛି । ଗ୍ରୀଷ୍ଣ ଋତୁ ଯୋଗୁଁ ଦେଶର ଜଳଭଣ୍ଡାର ଗୁଡ଼ିକ ଶୁଷ୍କ ହୋଇଯାଇଛି । ଆସନ୍ତା ମେ ମାସ ଶେଷ ବେଳକୁ ବର୍ଷା ହେଲେ ଜଳଭଣ୍ଡାରରେ ପାଣି ଆସିବ । ସେତେପର୍ଯ୍ୟନ୍ତ ଦେଶରେ ପାଓ୍ବାର କଟ୍ ଜାରି ରହିବ । ଆମେ ଏବେ କିଛି କରିପାରିବୁ ନାହିଁ ।
ବର୍ଷା ଅଭାବ ଯୋଗୁଁ ଶ୍ରୀଲଙ୍କାର ନଦୀଗୁଡ଼ିକ ଶୁଷ୍କ ହୋଇଯାଇଛି । ଜଳଭଣ୍ଡାର ଗୁଡ଼ିକରେ ଜଳସ୍ତର ରେକର୍ଡ ନିମ୍ନକୁ ଖସିଯାଇଛି । ଏଥିପାଇଁ ଜଳବିଦ୍ୟୁତ ଉତ୍ପାଦନ ପ୍ରଭାବିତ ହୋଇଛି । ସେପଟେ କୋଇଲା ଆମଦାନୀ ପାଇଁ ବୈଦେଶିକ ମୁଦ୍ରା ନଥିବାରୁ ତାପଜ ବିଦ୍ୟୁତ ଉତ୍ପାଦନ ବି ପ୍ରଭାବିତ ହୋଇଛି । ଏଥିପାଇଁ ଦେଶରେ ବିଜୁଳି ସଂକଟ ଦେଖାଦେଇଛି । ଦିନକୁ ପ୍ରାୟ ୧୩ ଘଣ୍ଟା ପାଓ୍ବାର କଟ ହେଉଥିବାବେଳେ ଷ୍ଟକ ଏକ୍ସଚେଞ୍ଜରେ ଦିନକୁ ମାତ୍ର ୨ ଘଣ୍ଟା ପାଇଁ ଟ୍ରେଡିଂ ହେଉଛି ।