ବିନା ଦର୍ଶକରେ ଦିଲ୍ଲୀରେ ଖୋଲିପାରିବ ଷ୍ଟାଡିୟମ, ବନ୍ଦ ରହିବ ସିନେମା ହଲ

ନୂଆଦିଲ୍ଲୀ: ନୂଆଦିଲ୍ଲୀରେ କରୋନା ମହାମାରୀ କ୍ରମାଗତ ଭାବେ ହ୍ରାସ ପାଉଥିବାରୁ ଏହାକୁ ଦୃଷ୍ଟିରେ ରଖି ଦିଲ୍ଲୀ ସରକାର ଜୁଲାଇ ୫ ତାରିଖରୁ ବିନା ଦର୍ଶକରେ ଷ୍ଟାଡିୟମ ଏବଂ କ୍ରୀଡା କମ୍ପ୍ଲେକ୍ସ ଖୋଲିବାକୁ ଅନୁମତି ଦେଇଛନ୍ତି। ତେବେ ସିନେମା ହଲ୍, ମଲ୍ଟିପ୍ଲେକ୍ସ, ସୁଇମିଂ ପୁଲ୍ ବନ୍ଦ ରହିବ। ଦିଲ୍ଲୀ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଡିଡିଏମ୍ଏ) ଦ୍ୱାରା ଜାରି କରାଯାଇଥିବା ନିର୍ଦ୍ଦେଶ ଅନୁଯାୟୀ ସରକାରଙ୍କ ଅନ୍ୟାନ୍ୟ ନିର୍ଦ୍ଦେଶାବଳୀକୁ କଡାକଡି ପାଳନ କରିବାକୁ ପଡିବ ଏବଂ ଷ୍ଟାଡିୟମ୍ ଖୋଲିବାବେଳେ କରୋନା ନିୟମର ଅନୁପାଳନ ନିଶ୍ଚିତ ଭାବେ କରାଯିବ |

ଡିଡିଏମଏ ନିର୍ଦ୍ଦେଶରେ କୁହାଯାଇଛି ଯେ ସିନେମା ହଲ, ମଲ୍ଟିପ୍ଲେକ୍ସ, ସୁଇମିଂ ପୁଲ, ସ୍ପା, ସ୍କୁଲ ଏବଂ କଲେଜ, ସାମାଜିକ, ରାଜନୈତିକ, ସାଂସ୍କୃତିକ, ଧାର୍ମିକ ସମାବେଶ ବନ୍ଦ ରହିବ। ଏଥିରେ କୁହାଯାଇଛି ଯେ ଦିଲ୍ଲୀ ମେଟ୍ରୋ ଟ୍ରେନ୍ ଏବଂ ସାଧାରଣ ପରିବହନ ବସ୍ ୫୦ ପ୍ରତିଶତ କ୍ଷମତା ସହିତ କାର୍ଯ୍ୟ ଜାରି ରଖିବ। ଗତ ସପ୍ତାହରେ, ଡିଡିଏମ୍ଏ ଜିମ୍ ଏବଂ ଯୋଗ କେନ୍ଦ୍ରଗୁଡ଼ିକୁ ସେମାନଙ୍କର କ୍ଷମତାର ଅଧା ଖୋଲିବାକୁ ଅନୁମତି ଦେଇଥିଲା | ଏହା ସହ ବିବାହ ହଲ୍ ଏବଂ ହୋଟେଲଗୁଡିକର ୫୦ ପ୍ରତିଶତ କ୍ଷମତା ସୀମା ସହିତ ଖୋଲିବାକୁ ଅନୁମତି ଦେଇଥିଲା |

ଏହି ନିର୍ଦ୍ଦେଶରେ କୁହାଯାଇଛି ଯେ ପ୍ରତିବନ୍ଧକ ଜୁଲାଇ ୧୨ ତାରିଖ ସକାଳ ୫ଟା ପର୍ଯ୍ୟନ୍ତ ଜାରି ରହିବ। ଉଲ୍ଲେଖନୀୟ କଥା ହେଉଛି, ଦିଲ୍ଲୀରେ ଏପ୍ରିଲ ୧୯ ରୁ ମେ ୩୦ ପର୍ଯ୍ୟନ୍ତ ଲକଡାଉନ ରହିଥିଲା, ଯାହା ପରେ ରାଜଧାନୀରେ ପର୍ଯ୍ୟାୟ ଅନୁଯାୟୀ ଅନଲକ୍ ପ୍ରକ୍ରିୟା ଚାଲିଛି।