ନୂଆଦିଲ୍ଲୀ : ଦେଶରେ ଆସନ୍ତା କାଲି ମଧ୍ୟରାତ୍ରୀରେ ୨୧ ଦିନିଆ ଲକଡାଉନ ଅବଧି ଶେଷ ହେଉଛି । ଏପର୍ଯ୍ୟନ୍ତ ଏହି ଲକଡାଉନ ଅବଧ#ବୃଦ୍ଧି ସଂପର୍କରେ କେନ୍ଦ୍ର ସରକାର ସରକାରୀଭାବେ କୌଣସି ଘୋଷଣା କରିନଥିବାବେଳେ ଆସନ୍ତା କାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏ ସଂପର୍କରେ ଘୋଷଣା କରିବାର ସମ୍ଭାବନା ରହିଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ସରକାର ଆଉ ଦୁଇ ସପ୍ତାହ ଲକଡାଉନ ଅବଧି ବଢାଇବାର ସମ୍ଭାବନା ଥିବାବେଳେ ଏହି ସମୟରେ କେତେକ ଜରୁରୀ କ୍ଷେତ୍ର, ଶିଳ୍ପ ସଂସ୍ଥା, ପରିବହନ ଆଦିକୁ ପର୍ଯ୍ୟାୟକ୍ରମେ ଖୋଲିବାକୁ ପଦକ୍ଷେପ ନେଇପାରନ୍ତି ।
ଆଜି କେନ୍ଦ୍ର ଗୃହ ମନ୍ତ୍ରାଳୟର ଯୁଗ୍ମ ସଚିବ ପୁଣ୍ୟ ସଲିଲା ଶ୍ରୀବାସ୍ତବ କହିଛନ୍ତି ଯେ ଦେଶରେ ଘୋଷିତ ଲକଡାଉନକୁ ପାଳନ କରିବାକୁ ରାଜ୍ୟ ସରକାରମାନେ ପଦକ୍ଷେପ ନେଉଛନ୍ତି । ରାଜ୍ୟ ରାଜ୍ୟ ମଧ୍ୟରେ ଓ ରାଜ୍ୟ ମଧ୍ୟରେ ଅତ୍ୟାବଶ୍ୟକ ସାମଗ୍ରୀ ଓ ସାଧାରଣ ପରିବହନ ନେଇ କୌଣସି କଟକଣା ଜାରି କରାଯାଇନାହିଁ । ଅନ୍ତଃରାଜ୍ୟ ଟ୍ରକ ପରିବହନ ଜାରି ରହିଛି ବୋଲି ସେ କହିଛନ୍ତି । ଟ୍ରକ ଚାଳକ ଓ କ୍ଲିନର ଯେପରି ଘରୁ ଟ୍ରକ ପର୍ଯ୍ୟନ୍ତ ଯାଇପାରିବେ ସେଥିପ୍ରତି ପ୍ରଶାସନ ଦୃଷ୍ଟି ଦେବା ଆବଶ୍ୟକ । ଯେଉଁ ଶିଳ୍ପ ସଂସ୍ଥାଗୁଡ଼ିକୁ ଲକଡାଉନରୁ ଛାଡ଼ କରାଯାଇଛି ସେମାନଙ୍କ କର୍ମଚାରୀଙ୍କ ଗମନାଗମନରେ ଯେପରି ପ୍ରତିବନ୍ଧକ ନହୁଏ ତାହା ଦୃଷ୍ଟି ଦିଆଯାଉଛି । ଯେଉଁ କ୍ଷୁଦ୍ର ଓ ମଧ୍ୟମ ଉଦ୍ୟୋଗ ଅତ୍ୟାବଶ୍ୟକ ଖାଦ୍ୟ ସାମଗ୍ରୀ ଯଥା ଅଟା, ଡାଲି, ଖାଇବା ତେଲ ଉତ୍ପାଦନରେ ନିୟୋଜିତ ଅଛନ୍ତି ସେମାନଙ୍କ କାର୍ଯ୍ୟରେ କୌଣସି ପ୍ରତିବନ୍ଧକ ସୃଷ୍ଟି ନକରିବାକୁ କେନ୍ଦ୍ର ସରକାର ଗାଇଡଲାଇନ ଜାରି କରିଛନ୍ତି । ସେହିପରି ରେଳ,ବନ୍ଦର, ଏୟାରପୋର୍ଟ, କଷ୍ଟମ୍ସ ଆଦି ବିଭାଗର ଅଧିକାରୀମାନଙ୍କୁ ପାସ ଦେବା ପାଇଁ ଅଧିକୃତ କରାଯାଇଛି ।