୩ଦିନ ମଧ୍ୟରେ କରୋନା ଟିକାର ୫୧ଲକ୍ଷ ଡୋଜ ଗ୍ରହଣ କରିବ ରାଜ୍ୟ: ସ୍ୱାସ୍ଥ୍ୟ ମନ୍ତ୍ରାଳୟ
ନୂଆଦିଲ୍ଲୀ: ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳରେ ୧.୮୪ କୋଟିରୁ ଅଧିକ କରୋନା ଟିକାର ଡୋଜ ଉପଲବ୍ଧ ଥିବାବେଳେ ଆସନ୍ତା ତିନି ଦିନ ମଧ୍ୟରେ ପ୍ରାୟ ୫୧ ଲକ୍ଷ ଡୋଜ ରାଜ୍ୟମାନେ ଶୀଘ୍ର ଗ୍ରହଣ କରିବେ ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ କୁହାଯାଇଛି |
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର କହିଛି ଯେ, ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳମାନଙ୍କୁ ୨୦କୋଟିରୁ ଅଧିକ ଡୋଜ (୨୦,୨୮,୦୯,୨୫୦) ମାଗଣାରେ ଯୋଗାଇ ଦିଆଯାଇଛି। ଏଥିମଧ୍ୟରୁ, ଶନିବାର ଦିନ ସନ୍ଧ୍ୟା ୭ଟା ପର୍ଯ୍ୟନ୍ତ ଉପଲବ୍ଧ ତଥ୍ୟ ଅନୁଯାୟୀ, ଅପଚୟ ସମେତ ହାରାହାରି ୧୮,୪୩,୬୭,୭୭୨ ଡୋଜ ବ୍ୟବହାର କରାଯାଇଛି |
ତେବେ ଦେଶର ବିଭିନ୍ନ ରାଜ୍ୟରେ ଟିକାର ଅଭାବ ଦେଖାଯାଇଥିବା ବେଳେ ୫୧ଲକ୍ଷ ଡୋଜ ଦିଆଯିବା ଖବରକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି | ୫୧ଲକ୍ଷ ଡୋଜ ଆସିବା ପରେ ଟିକାର ଅଭାବ କେତେକାଂଶରେ କମ ହେବ ବୋଲି ଆଶା କରାଯାଉଛି |
ଉଲ୍ଲେଖଯୋଗ୍ୟ, ରବିବାର ସକାଳ ୮ଟା ସୁଦ୍ଧା ସମଗ୍ର ଦେଶରେ ୨୪ ଘଣ୍ଟା ମଧ୍ୟରେ ୩,୧୧,୧୭୦ କରୋନାଭାଇରସ୍ଜନିତ ନୂତନ ସଂକ୍ରମଣ ଓ ୪,୦୭୭ ମୃତ୍ୟୁ ରେକର୍ଡ କରାଯାଇଛି। ଏହି ତଥ୍ୟକୁ ମିଶାଇ ଭାରତରେ ସମୁଦାୟ କୋଭିଡ୍ ସଂକ୍ରମଣ ମାମଲା ୨,୪୬,୮୪,୦୭୭ ଓ ମୃତ୍ୟୁସଂଖ୍ୟା ୨,୭୦,୨୮୪ରେ ପହଞ୍ଚିଛି। ସେହିଭଳି ଗତ ୨୪ ଘଣ୍ଟା ମଧ୍ୟରେ ୩,୬୨,୪୩୭ ଆକ୍ରାନ୍ତ ସୁସ୍ଥ ହୋଇ ଫେରିବା ସହ ସମୁଦାୟ ସୁସ୍ଥତାସଂଖ୍ୟା ୨,୦୭,୯୫,୩୩୫ରେ ପହଞ୍ଚିଛି। ଏହା ବ୍ୟତିରେକେ, ଏବେ ଦେଶରେ ସମୁଦାୟ ସକ୍ରିୟ ଆକ୍ରାନ୍ତଙ୍କ ସଂଖ୍ୟା ହେଉଛି ୩୬,୧୮,୪୫୮।