ମୋଦୀଙ୍କ ଅଫିସରୁ ଆସିଲା ଫୋନ, ସ୍ଥଗିତ ରଖ ଏହି ଜିଲ୍ଲାପାଳଙ୍କ ବଦଳି: କିଭଳି ପ୍ରଧାନମନ୍ତ୍ରୀଙ୍କର ମନ ଜିତିଛନ୍ତି ଏହି ଆଇଏଏସ ଜାଣନ୍ତୁ
୨୪ ଘଣ୍ଟା ଭିତରେ ଆସିଲା ପିଏମଓରୁ ଫୋନ
ବାରଣାସୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସଂସଦୀୟ ନିର୍ବାଚନମଣ୍ଡଳୀ ବାରାଣାସୀର ଜିଲ୍ଲାପାଳ କୌଶଳ ରାଜ ଶର୍ମାଙ୍କ ବଦଳି ନିର୍ଦ୍ଦେଶ ସ୍ଥଗିତ ହୋଇଯାଇଛି | କୁହାଯାଉଛି ଯେ ପ୍ରଧାନମନ୍ତ୍ରୀଙ୍କ ହସ୍ତକ୍ଷେପ ପରେ ଏହି ବଦଳି ନିର୍ଦ୍ଦେଶକୁ ସ୍ଥଗିତ ରଖାଯାଇଛି | ଶୁକ୍ରବାର ଦିନ କୌଶଳ ରାଜ ଶର୍ମାଙ୍କୁ ପ୍ରୟାଗରାଜକୁ ବଦଳି କରାଯାଇଥିଲା | ତେବେ ମାତ୍ର ୨୪ ଘଣ୍ଟା ମଧ୍ୟରେ ସରକାର ଏହି ନିଷ୍ପତ୍ତି ପ୍ରତ୍ୟାହାର କରିନେଇଛନ୍ତି । ବର୍ତ୍ତମାନ ପ୍ରଶ୍ନ ଉଙ୍କି ମାରୁଛି ଯେ ୨୪ ଘଣ୍ଟା ମଧ୍ୟରେ ଏମିତି କଣ ହେଲା ଯେ କୌଶଳ ରାଜ ଶର୍ମାଙ୍କ ବଦଳି ନିର୍ଦ୍ଦେଶକୁ ବାତିଲ କରାଗଲା | କୁହାଯାଉଛି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବାରାଣାସୀ ଜିଲ୍ଲାପାଳ କୌଶଳ ରାଜ ଶର୍ମାଙ୍କୁ ବହୁତ ପସନ୍ଦ କରନ୍ତି | କୌଶଳ ହରିୟାଣାର ଭିବାନୀ ଜିଲ୍ଲାର ହୋଇଥିବାବେଳେ ୨୦୦୬ ରେ ସେ ଆଇଏଏସ ପରୀକ୍ଷାରେ ଉତ୍ତୀର୍ଣ୍ଣ ହୋଇ ୟୁପି କ୍ୟାଡରରେ ଯୋଗ ଦେଇଥିଲେ। ଏହାପୂର୍ବରୁ ସେ ଟେକ୍ସଟାଇଲ୍ ଇଞ୍ଜିନିୟରିଂରେ ଏମଟେକ ପଢିଥିଲେ | ଅତି ଶାନ୍ତ ପ୍ରକୃତିର କୌଶଳ ରାଜ ଶର୍ମା କାର୍ଯ୍ୟରେ ଖୁବ ନିପୁଣ ବୋଲି ବିବେଚନା କରାଯାଏ | ବାରାଣାସୀ ପୂର୍ବରୁ ସେ ପ୍ରୟାଗରାଜ, କାନପୁର ଭଳି ବଡ ଜିଲ୍ଲାରେ ଜିଲ୍ଲାପାଳ ରହିଥିଲେ।
Sambad is now on WhatsApp
Join and get latest news updates delivered to you via WhatsApp
ନଭେମ୍ବର ୨, ୨୦୧୯ ରେ ଯେତେବେଳେ ଲୋକସଭା ନିର୍ବାଚନରେ ଜିତିବା ପରେ ବିଜେପି ପୁନର୍ବାର କ୍ଷମତାକୁ ଆସିଲା, ସେତେବେଳେ ସରକାର କୌଶଳ ରାଜ ଶର୍ମାଙ୍କୁ ପ୍ରଧାନମନ୍ତ୍ରୀ ମୋଦୀଙ୍କ ସଂସଦୀୟ ନିର୍ବାଚନମଣ୍ଡଳୀ ବାରାଣାସୀକୁ ବଦଳି କରିଥିଲେ | ସେବେଠାରୁ ସେ କେନ୍ଦ୍ର ଓ ରାଜ୍ୟ ସରକାରଙ୍କ ଅନେକ ପ୍ରକଳ୍ପ ଆଗକୁ ବଢାଇଥିଲେ । ୨୦୧୯ରେ ଯେତେବେଳେ କୌଶଳ ରାଜ ଶର୍ମା ବାରାଣାସୀର ଡିଏମ ଭାବରେ ଦାୟିତ୍ୱ ଗ୍ରହଣ କଲେ, ସେତେବେଳେ ବିଜେପି ସରକାର ଅନେକ ବିବାଦରେ ଛନ୍ଦି ହୋଇଥିଲେ। ଲୋକଙ୍କ ସହ ଜଡିତ ସମସ୍ୟାର ସମାଧାନ ସମ୍ପର୍କରେ ସରକାରଙ୍କ ଉପରେ ମଧ୍ୟ ପ୍ରଶ୍ନ ଉଠିଥିଲା। ଏହି କ୍ଷେତ୍ର ଖୋଦ ପ୍ରଧାନମନ୍ତ୍ରୀଙ୍କର ହୋଇଥିବାରୁ ଏଭଳି ପରିସ୍ଥିତିରେ ସରକାର ଏହି ପ୍ରସଙ୍ଗଗୁଡିକ ଦ୍ୱାରା ଘେରି ରହିଥିଲେ। କୌଶଳ ରାଜ ଶର୍ମା ଏହାପରେ କେନ୍ଦ୍ର ଓ ରାଜ୍ୟ ସରକାରଙ୍କ ସମସ୍ତ ପ୍ରକଳ୍ପ ତ୍ୱରାନ୍ୱିତ କରିବାକୁ କାର୍ଯ୍ୟ କରିଥିଲେ।
କାଶୀ ବିଶ୍ୱନାଥ କରିଡର ହେଉ କିମ୍ବା ବାରାଣାସୀର ରାସ୍ତା ପ୍ରଶସ୍ତିକରଣ ହେଉ, ଜିଲ୍ଲାପାଳ କଠିନ ପରିଶ୍ରମ କରିଥିଲେ। ଆଉ ଜିଲ୍ଲାପାଳଙ୍କ ଏହି କାର୍ଯ୍ୟଗୁଡ଼ିକ ଦ୍ୱାରା ମୋଦୀ ମଧ୍ୟ ବହୁତ ପ୍ରଭାବିତ ହୋଇଥିଲେ। ୨୦୨୨ ମସିହାରେ କୌଶଳ ରାଜ ଶର୍ମା ମଧ୍ୟ ପ୍ରଧାନମନ୍ତ୍ରୀ ଉତ୍କର୍ଷ ପୁରସ୍କାର ଗ୍ରହଣ କରିଥିଲେ | ତେବେ ସୂଚନା ରହିଛି କି କୌଶଳ ରାଜ ଶର୍ମାଙ୍କୁ ଶୁକ୍ରବାର ଦିନ ବଦଳି କରାଯାଇଥିଲା । ତାଙ୍କୁ ପ୍ରୟାଗରାଜର ନୂତନ କମିଶନର କରାଯାଇଥିଲା। ତେବେ ୨୪ ଘଣ୍ଟା ମଧ୍ୟରେ ସରକାରଙ୍କୁ ଏହି ନିଷ୍ପତ୍ତି ପ୍ରତ୍ୟାହାର କରିବାକୁ ପଡିଛି। ନିର୍ଭରଯୋଗ୍ୟ ସୂତ୍ର ଅନୁଯାୟୀ, ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ କୌଶଳଙ୍କ ବଦଳି ନ କରିବାକୁ କହିଥିଲା । ପ୍ରଧାନମନ୍ତ୍ରୀ ମୋଦୀଙ୍କ ସଂସଦୀୟ ନିର୍ବାଚନମଣ୍ଡଳୀ ବାରାଣାସୀରେ ଏହି ଅଧିକାରୀଙ୍କ ବଦଳି ପୂର୍ବରୁ ପିଏମଓକୁ ଜଣାଇବାକୁ ରାଜ୍ୟ ସରକାରଙ୍କୁ ମଧ୍ୟ କୁହାଯାଇଛି।