ସ୍କୁଲ ଶିକ୍ଷୟିତ୍ରୀରୁ ପୁଲିସ ଅଫିସରର ଯାତ୍ରା: ପରୀକ୍ଷା ଦେବାବେଳେ ପୁନମଙ୍କ ଗର୍ଭରେ ଥିଲା ୯ ମାସର ଶିଶୁ

ସଫଳତା ପାଇବାକୁ ହେଲେ କୌଣସି ସହଜ ବାଟ ନଥାଏ | ସଫଳତା ତାଙ୍କୁ ହିଁ ମିଳିଥାଏ, ଯିଏ କଠିନ ପରିଶ୍ରମ କରିଥାନ୍ତି | ଆଜି ଆମେ ଆପଣଙ୍କୁ ପୁନମ ଦଲାଲ ନାମ୍ନୀ ଅଫିସରଙ୍କ ବାବଦରେ କହିବୁ ଯିଏ ଏମିତି ଏକ ଉଦାହରଣ ସୃଷ୍ଟି କରିଛନ୍ତି ଯାହାକି ପରିଶ୍ରମ ଓ ଇଛାଶକ୍ତିକୁ ପ୍ରମାଣିତ କରେ | ଏହି ମହିଳାଙ୍କ ସଂଘର୍ଷଭରା ଜୀବନ କାହାଣୀ ମଧ୍ୟବିତ୍ତ ଘରର ପ୍ରତିଟି ଝିଅଙ୍କୁ ଆଗକୁ ବଢିବାକୁ ପ୍ରେରଣା ଦେଇଥାଏ |

ହରିୟାଣାର ଝଜ୍ଜାର ଗାଁର ଏକ ମଧ୍ୟବିତ୍ତ ପରିବାରର ମୂଳ ବାସିନ୍ଦା ହୋଇଥିବା ପୁନମ ଦଲାଲଙ୍କର ଜନ୍ମ ଦିଲ୍ଲୀରେ ହୋଇଥିବାବେଳେ ଯୁକ୍ତ ଦୁଇ ପାସ କରିବା ପରେ ପୁନମ ଏକ ପ୍ରାଥମିକ ବିଦ୍ୟାଳୟରେ ଶିକ୍ଷୟତ୍ରୀ ଭାବେ ଯୋଗ ଦେଇଥିଲେ | ପାର୍ଟଟାଇମ ଶିକ୍ଷୟତ୍ରୀ ଭାବେ ପିଲାଙ୍କୁ ପାଠ ପଢାଉଥିବାବେଳେ ସେ ଦିଲ୍ଲୀ ବିଶ୍ୱବିଦ୍ୟାଳୟରୁ ସ୍ନାତକ ଶିକ୍ଷା ସମ୍ପୂର୍ଣ୍ଣ କରିଥିଲେ | ସ୍ନାତକ ଶିକ୍ଷା ସମାପ୍ତ ପରେ ପୁନମ, ଅନେକ ପ୍ରବେଶିକା ପରୀକ୍ଷା ଦେଇଥିଲେ | ଆଉ ବହୁ ପରୀକ୍ଷା ଦେବା ପରେ ସେ ଏସବିଆଇର ପ୍ରବେଶନାରୀ ଅଫିସର ପାଇଁ ମନୋନୀତ ହୋଇଥିଲେ | ଶେଷରେ ୨୦୧୫ ମସିହାରେ ପୁନମ ୟୁପିଏସସି ପରୀକ୍ଷା ପାଇଁ ଫର୍ମ ପୂରଣ କରିଥିଲେ | ଏହାକୁ ନେଇ ପୁନମଙ୍କ କହିବା କଥା ଯେ, ୟୁପିଏସସି ପାଇଁ ତାଙ୍କର ବିଳମ୍ବ ହୋଇଯାଇଥିଲା, କାରଣ ଯୁକ୍ତ ଦୁଇ ପରେ କିଭଳି କ୍ୟାରିୟର କରିହେବ ସେ ନେଇ ମାର୍ଗଦର୍ଶନ ଦେବାକୁ କେହି ନଥିଲେ | ଅଗଷ୍ଟ ୨୦୧୫ରେ ଯେତେବେଳେ ପୁନମ ୟୁପିଏସସି ର ପ୍ରିଲିମ ପରୀକ୍ଷା ଦେଲେ ସେତେବେଳେ ସେ ୯ ମାସର ଗର୍ଭବତୀ ଥିଲେ | ଆଉ ଡିସେମ୍ବରରେ ଯେତେବେଳେ ମେନ୍ସ ପରୀକ୍ଷା ଦେଲେ ସେତେବେଳେ ଘରେ ତିନି ମାସର କନ୍ୟା ସନ୍ତାନ ଥିଲା |

୨୦୦୭ରେ ଦିଲ୍ଲୀର ଅସୀମ ଦହିୟାଙ୍କ ସହ ପୁନମଙ୍କର ବିବାହ ହୋଇଥିଲା | ଆୟକର ବିଭାଗରେ ଚାକିରି କରୁଥିବା ତାଙ୍କ ସ୍ୱାମୀ ସବୁବେଳେ ପୁନମଙ୍କୁ ଆଗକୁ ବଢିବାର ପ୍ରେରଣା ଦେଉଥିଲେ | ୨୦୧୦ ମସିହାରେ ହରିୟାଣା ପିଏସସି ପରୀକ୍ଷାରେ ପାସ ହେବା ପରେ ୨୦୧୧ରେ ହରିୟାଣା ପୁଲିସରେ ଡ଼ିଏସପି ଭାବେ ଯୋଗ ଦେଲେ | ଏହି ସମୟରେ ପୁନମ ୟୁପିଏସସି ପରୀକ୍ଷା ପାଇଁ ଆବେଦନ କରିଥିଲେ ବି ଅସଫଳ ହୋଇଥିଲେ | ଏହା ପରେ ୨୦୧୫ ମସିହାରେ ପୁଣି ଥରେ ଆବେଦନ କରିଥିଲେ | ସେତେବେଳେ କିନ୍ତୁ ପୁନମ ଗର୍ଭବତୀ ଥିବାବେଳେ ପୁଲିସ ଚାକିରି କରୁଥିବାରୁ ସବୁବେଳେ ଆଲର୍ଟ ରହିବାକୁ ପଡୁଥିଲା | ଏହା ସହ ବି ପୁନମ କଠିନ ପରିଶ୍ରମ କରିଥିଲେ | ଆଉ ୟୁପିଏସସି ପରୀକ୍ଷାରେ ସର୍ବ ଭାରତୀୟ ସ୍ତରରେ ୩୦୮ ରାଙ୍କ ପାଇଥିଲେ | ଏହା ପରେ ଜଣେ ଆଇପିଏସ ଅଫିସର ଭାବେ ସେ ଯୋଗ ଦେଇଥିଲେ |