ବାଂଲାଦେଶରେ ହିନ୍ଦୁ ଭୟଭୀତ: ୫ ଜଣଙ୍କୁ ହତ୍ୟା ଓ ଯୌନ ନିର୍ଯାତନା ମାମଲା ନେଇ ତୀବ୍ର ପ୍ରତିକ୍ରିୟା

ଢାକା: ବାଂଲାଦେଶରେ ହିନ୍ଦୁମାନଙ୍କ ଉପରେ ଚରମପନ୍ଥୀଙ୍କ ଆକ୍ରମଣ ଜାରି ରହିଛି। ଅଗଷ୍ଟ ୫ ତାରିଖରେ ଶେଖ ହସିନା ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବା ପରେ ବାଂଲାଦେଶରେ ଦେଖାଦେଇଥିବା ବିଶୃଙ୍ଖଳା ଓ ଅରାଜକତା ଭିତରେ ହିନ୍ଦୁଙ୍କ ଉପରେ ୨୦୦ରୁ ଅଧିକ ଟାର୍ଗେଟ୍ ଆକ୍ରମଣ ହୋଇଛି। ଏଥିରେ ୫ ଜଣ ହିନ୍ଦୁଙ୍କୁ ହତ୍ୟା କରାଯାଇଥିବା ବେଳେ ଅନେକ ଯୌନ ନିର୍ଯାତନା ମାମଲା ସାମ୍ନାକୁ ଆସିବା ନେଇ ଦେଶବ୍ୟାପୀ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ମୁସଲମାନ ବହୁଳ ବାଂଲାଦେଶରେ ହିନ୍ଦୁମାନେ ଏଭଳି ‘ସଫ୍ଟ ଟାର୍ଗେଟ’ ପାଲଟିବା ନେଇ ସମଗ୍ର ବିଶ୍ବରେ ଉଦ୍‌ବେଗ ପ୍ରକାଶ ପାଇଥିବା ବେଳେ ମହମ୍ମଦ ୟୁନୁସ୍‌ଙ୍କ ନେତୃତ୍ବାଧୀନ ଅନ୍ତରୀଣ ସରକାର ବିଭିନ୍ନ କାରଣରୁ ଦଙ୍ଗାକାରୀଙ୍କୁ କଠୋର ହସ୍ତରେ ନିୟନ୍ତ୍ରଣ ନକରିବା ଚିନ୍ତାର କାରଣ ପାଲଟିଛି।

ବାଂଲାଦେଶରେ ଏବେ ଚରମପନ୍ଥୀ ଇସ୍‌ଲାମିକ ଗୋଷ୍ଠୀ ସକ୍ରିୟ ହୋଇଉଠିଥିବାରୁ ସେମାନେ ସଂଖ୍ୟାଲଘୁ, ବିଶେଷ କରି ହିନ୍ଦୁମାନଙ୍କ ଉପରେ ଆକ୍ରମଣ କରିବାକୁ ସୁଯୋଗ ଖୋଜୁଛନ୍ତି। ଏପରିକି ଆୱାମୀ ଲିଗ୍ ଶାସନ ସମୟରେ ମଧ୍ୟ ହିନ୍ଦୁମାନଙ୍କ ଉପରେ ଆକ୍ରମଣ ହୋଇଥିଲା। ସାମ୍ପ୍ରଦାୟିକ ହିଂସାର ଶିକାର ହେଉଥିବା ହିନ୍ଦୁମାନେ ଏବେ ନିଜ ସୁରକ୍ଷା ପାଇଁ ରାସ୍ତାକୁ ଓହ୍ଲାଇଥିବା ବେଳେ ଲକ୍ଷାଧିକ ହିନ୍ଦୁଙ୍କ ବିକ୍ଷୋଭ ୟୁନୁସ୍‌ ସରକାରକୁ କଡ଼ା ବାର୍ତ୍ତା ଦେଇଛି। ହିନ୍ଦୁଙ୍କ ଘର, ମନ୍ଦିର ଉପରେ ଆକ୍ରମଣ, ହିନ୍ଦୁମାନଙ୍କ ମାଲିକାନାରେ ଥିବା ଦୋକାନଗୁଡ଼ିକୁ ଟାର୍ଗେଟ କରି ଲୁଟ୍ ଏବଂ ସେମାନଙ୍କ ସମ୍ପତ୍ତି ଜବରଦଖଲରୁ ଜଣାପଡୁଛି ଯେ କିଛି ଧାର୍ମିକ ଭିତ୍ତିରେ ହିଂସା ପାଇଁ ବହୁତ ବଡ଼ ଷଡ଼୍‌ଯନ୍ତ୍ର ହୋଇଛି। ଯେଉଁ ପାଞ୍ଚ ଜଣ ହିନ୍ଦୁଙ୍କୁ ହତ୍ୟା କରାଯାଇଛି ସେମାନଙ୍କ ମଧ୍ୟରୁ ଅତି କମରେ ତିନି ଜଣଙ୍କର ରାଜନୀତି କିମ୍ବା ପୁଲିସ ବାହିନୀ ସହିତ କୌଣସି ସମ୍ପର୍କ ନଥିଲା। ଜଣେ ସ୍କୁଲ ଶିକ୍ଷୟିତ୍ରୀ ମୃଣାଳ କାନ୍ତି ଚକ୍ରବର୍ତ୍ତୀଙ୍କୁ ହତ୍ୟା କରାଯାଇଥିବା ବେଳେ ତାଙ୍କ ପତ୍ନୀ ଓ ଝିଅ ଗୁରୁତର ଆହତ ହୋଇଛନ୍ତି। ବାଂଲାଦେଶ ହିନ୍ଦୁ-ବୌଦ୍ଧ-ଖ୍ରୀଷ୍ଟିଆନ ଏକତା ପରିଷଦ ଦ୍ୱାରା ପ୍ରସ୍ତୁତ ଏକ ତାଲିକା ଅନୁଯାୟୀ ଅଗଷ୍ଟ ୫ରୁ ୮ ପର୍ଯ୍ୟନ୍ତ ତିନି ଦିନ ମଧ୍ୟରେ ବାଂଲାଦେଶରେ ହିନ୍ଦୁଙ୍କ ଉପରେ ଆକ୍ରମଣର ୨୦୫ଟି ଘଟଣା ଘଟିଛି। ତେବେ ଏଗୁଡ଼ିକ କେବଳ ୨୦୫ଟି ଘଟଣା ନୁହେଁ ଏଥିରେ ହଜାର ହଜାର ପରିବାର ଓ ସେମାନଙ୍କ ପ୍ରତିଷ୍ଠାନ ଉପରେ ଆକ୍ରମଣ ମାମଲା ରହିଛି।

ବାଂଲାଦେଶର ଜନସଂଖ୍ୟାରେ ହିନ୍ଦୁଙ୍କ ସଂଖ୍ୟା ୧୯୫୧ରେ ୨୨% ଥିବାବେଳେ ୨୦୨୨ରେ ଏହା ପ୍ରାୟ ୮%କୁ ଖସି ଆସିଛି। ସେହିପରି ଜନସଂଖ୍ୟାରେ ମୁସଲମାନଙ୍କ ସଂଖ୍ୟା ୧୯୫୧ରେ ୭୬%ରୁ ୯୧%କୁ ବୃଦ୍ଧି ପାଇଛି। ଗ୍ରାମୀଣ ହିନ୍ଦୁମାନେ ଏବେ ବାଂଲାଦେଶରେ ଅଧିକ ନିର୍ଯାତନାର ଶିକାର ହେଉଛନ୍ତି ଏବଂ ସେମାନଙ୍କ ସମ୍ପତ୍ତି ଲୁଟ୍‌ ହେଉଛି। ବାଂଲାଦେଶରେ ଧାର୍ମିକ ନିର୍ଯାତନା ଯୋଗୁଁ ପ୍ରତିବର୍ଷ ହଜାର ହଜାର ହିନ୍ଦୁ ଦେଶ ଛାଡ଼ୁଥିବା ବେଳେ ଏବେ ପରିସ୍ଥିତି ଅତି ଉଦ୍‌ବେଗଜନକ ରହିଛି।