ପରୀକ୍ଷା ପରେ କମ୍ ମାର୍କ ଦେବାରୁ ଶିକ୍ଷକଙ୍କୁ ଆମ୍ବ ଗଛରେ ବାନ୍ଧି ୯ମ ଶ୍ରେଣୀ ଛାତ୍ରମାନେ ପିଟିଲେ
ଡୁମକା: କମ ମାର୍କ ଦେବାରୁ ଶିକ୍ଷକଙ୍କୁ ବାନ୍ଧି ପିଟିଲେ ଛାତ୍ର। ପ୍ରଥମେ ପରୀକ୍ଷା ଖାତା ଦେଖାଇବାକୁ କହିବା ସହ ଏଭଳି ନହେବାରୁ ରାଗରେ ୯ମ ଶ୍ରେଣୀ ଛାତ୍ରମାନେ ସ୍କୁଲ ଭିତରେ ଥିବା ଏକ ଆମ୍ବ ଗଛରେ ଶିକ୍ଷକ ଓ କ୍ଲର୍କଙ୍କୁ ବାନ୍ଧି ପିଟିଥିବା ଜଣାପଡ଼ିଛି। ତେବେ କିଛି ସମୟରେ ସେମାନଙ୍କୁ ଖୋଲାଯାଇଥିବା ବେଳେ ଶିକ୍ଷକମାନେ ଯାଇ ନିଜର ଚିକିତ୍ସା କରାଇଥିବା ସାମ୍ନାକୁ ଆସିଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଝାଡଖଣ୍ଡର ଡୁମକା ଜିଲ୍ଲାର ଗୋପିକନ୍ଦର ଅନୁସୂଚିତ ଜାତି ଆବାସିକ ଉଚ୍ଚ ବିଦ୍ୟାଳୟର ଛାତ୍ରମାନେ ଏଭଳି କାଣ୍ଡ କରିଛନ୍ତି। ୯ମ ଶ୍ରେଣୀର ଛାତ୍ରମାନେ କହିଛନ୍ତି ଯେ ୩୬ଜଣ ଛାତ୍ର ୯ମ ପରୀକ୍ଷା ଦେଇଥିଲେ। ଶନିବାର ଦିନ ଫଳାଫଳ ଆସିଥିଲା ଯେଉଁଥିରେ ୧୧ଜଣ ଛାତ୍ର ଦୁଇଟି ବିଷୟରେ ଡି ଗ୍ରେଡ୍ ପାଇଥିଲେ। ଏନେଇ ଛାତ୍ରମାନେ ସୋମବାର ବିଦ୍ୟାଳୟର ପ୍ରଧାନ ଶିକ୍ଷକ ରାମଦେବ ପ୍ରସାଦ କେଶରୀଙ୍କୁ ଭେଟିଥିଲେ। ପ୍ରଧାନ ଶିକ୍ଷକ ଛାତ୍ରଙ୍କ ସମସ୍ୟା ଶୁଣି ଶିକ୍ଷକ କୁମାର ସୁମନ ସେମାନଙ୍କୁ ନମ୍ବର ଦେଇଥିବା କହିଥିଲେ। ତା’ପରେ ଛାତ୍ରମାନେ ଶିକ୍ଷକ କୁମାର ସୁମନଙ୍କ ନିକଟକୁ ଯାଇଥିଲେ। ଏହା ପରେ ଶିକ୍ଷକ କୁମାର ସୁମନ ଏବଂ ଛାତ୍ରମାନଙ୍କ ମଧ୍ୟରେ ଯୁକ୍ତିତର୍କ ଆରମ୍ଭ ହୋଇଥିଲା। ତା’ପରେ ଛାତ୍ର କ୍ଲର୍କ ସୋନେରାମ ଚୌଡେଙ୍କୁ ଭେଟିଥିଲେ। ସୋନେରାମ ଚୌଡେ ମଧ୍ୟ ଛାତ୍ରଙ୍କୁ ପରୀକ୍ଷା ଖାତା ଦେଖାଇବାକୁ ମନା କରିଦେବାରୁ ଛାତ୍ରମାନେ ସେମାନଙ୍କୁ ଆଣି ଗଛରେ ବାନ୍ଧି ପିଟିଥିଲେ।
ଏହି ଘଟଣାର ଖବର ପାଇବା ମାତ୍ରେ ବିଡିଓ ଅନନ୍ତ କୁମାର ଝା, ଏସଏଚ୍ଓ ନିତ୍ୟାନନ୍ଦ ଭୋକ୍ତା ଏବଂ ବିଇଓ ସୁରେନ୍ଦ୍ର ହେମ୍ବ୍ରମ ବିଦ୍ୟାଳୟରେ ପହଞ୍ଚିଥିଲେ। ସେ ଏହି ବିଷୟରେ ବିଦ୍ୟାଳୟର ପ୍ରଧାନଶିକ୍ଷକ ରାମଦେବ ପ୍ରସାଦ କେଶରୀ ଏବଂ ଅନ୍ୟ ଶିକ୍ଷକମାନଙ୍କୁ ପଚରାଉଚରା କରିଥିଲେ। ତା’ପରେ ଛାତ୍ରମାନଙ୍କୁ ମଧ୍ୟ ପଚରାଉଚରା କରାଯାଇଥିଲା। ଛାତ୍ରମାନେ କହିଥିଲେ ଯେ ସେମାନଙ୍କୁ ପ୍ରାକ୍ଟିକାଲରେ ମାର୍କ ଦିଆଯାଇନଥିବାରୁ ସେମାନେ ପରୀକ୍ଷାରେ ଫେଲ୍ ହୋଇଛନ୍ତି। ଦୁଇ ପକ୍ଷର କଥା ଶୁଣିବା ପରେ ଏବେ ତଦନ୍ତ ଆରମ୍ଭ କରିଛି ପୁଲିସ।