ଏଭରଗ୍ରୀନ ଜାହାଜ ଫସିବା ଘଟଣାରେ ୪ ହଜାର କୋଟି ଟଙ୍କାର ଜରିମାନା ମାଗିଲେ ସୁଏଜ କେନାଲ କର୍ତ୍ତୃପକ୍ଷ
ନୂଆଦିଲ୍ଲୀ: ଦୁଇ ମାସ ତଳେ ସୁଏଜ କେନାଲରେ ଜାହାଜ ଏଭରଗ୍ରୀନ ଫସିରହିଥିବା ଘଟଣା ବାବଦରେ ଆପଣ ଅଳ୍ପବହୁତେ ଜାଣିଥିବେ | ଯାହାଦ୍ୱାରା ବିଶ୍ୱରେ ବାଣିଜ୍ୟିକ କାରବାର ପ୍ରଭାବିତ ହୋଇଥିଲା | ତେବେ ବର୍ତ୍ତମାନ ଇଜିପ୍ଟର ସୁଏଜ କେନାଲ ପ୍ରାଧିକରଣ ଜାପାନ କମ୍ପାନୀକୁ ୫୫୦ ମିଲିୟନ ଡଲାର (ପ୍ରାୟ ଚାରି ହଜାର କୋଟି ଟଙ୍କା) ଜରିମାନା ବାବଦକୁ ମାଗିଛି। କମ୍ପାନୀର ଜାହାଜ ଏଭରଗ୍ରୀନ ମାର୍ଚ୍ଚରେ ସୁଏଜ କେନାଲରେ ଅଟକି ଯାଇଥିଲା ଏବଂ ୬ ଦିନ ପର୍ଯ୍ୟନ୍ତ ଜାହାଜ ଚଳାଚଳ ବନ୍ଦ ରହିଥିଲା।
Sambad is now on WhatsApp
Join and get latest news updates delivered to you via WhatsApp
ଏଥିପାଇଁ ଶହ ଶହ ଜାହାଜକୁ ସମୁଦ୍ରରେ ଅଟକାଇବାକୁ ପଡିଥିଲା। ସୁଏଜ କେନାଲ ପ୍ରାଧିକରଣ ପ୍ରଥମେ ପ୍ରାୟ ୯୨ ମିଲିୟନ୍ ଡଲାର୍ ଜରିମାନା ସ୍ୱରୂପ ମାଗିଥିଲେ | ସୁଏଜ୍ କେନାଲ କର୍ତ୍ତୃପକ୍ଷ କହିଛନ୍ତି ଯେ କାଦୁଅରେ ଅଟକି ରହିଥିବା ଜାହାଜକୁ ପୁଣି କାର୍ଯ୍ୟକ୍ଷମ କରାଇ ପାଣିରେ ଓହ୍ଲାଇବାକୁ ୬ ଶହ କର୍ମଚାରୀ କାମ କରିଥିଲେ। ଏଥିରେ ଜଣେ କର୍ମଚାରୀଙ୍କର ମୃତ୍ୟୁ ମଧ୍ୟ ହୋଇଥିଲା |
ତେବେ ପଶ୍ଚିମ ଜାପାନର ଏହାଇମ ପ୍ରଦେଶରେ ରହୁଥିବା ଜାହାଜ ମାଲିକ ଶୋ କିସେନ ୧୫୦ ମିଲିୟନ୍ ଡଲାର କ୍ଷତିପୂରଣ ପ୍ରଦାନ କରିବାକୁ ରାଜି ହୋଇଛନ୍ତି | ତେବେ ସୁଏଜ୍ କେନାଲ କର୍ତ୍ତୃପକ୍ଷ କହିଛନ୍ତି ଯେ କ୍ଷତିପୂରଣ ପ୍ରଦାନ ନହେବା ପର୍ଯ୍ୟନ୍ତ ଜାହାଜ ଏଭରଗ୍ରୀନ ଇଜିପ୍ଟରେ ରହିବ। ମାର୍ଚ୍ଚ ୨୯ ରେ ୧୫ଟି ଟଗ୍ ବୋଟ (ଶକ୍ତିଶାଳୀ ଡଙ୍ଗା) ସାହାଯ୍ୟରେ ଜାହାଜକୁ ପୁଣି ସମୁଦ୍ରକୁ ପଠାଯାଇଥିଲା | ଏହା ପରେ ହିଁ ଅନ୍ୟ ଜାହାଜମାନେ ସୁଏଜ କେନାଲ ଦେଇ ଯାଇପାରିଥିଲେ |