ବାପଘରକୁ ଯାଉଥିବା ବେଳେ ଧକ୍କା ‌ଦେଲା ଟ୍ରକ: ଚାଲିଗଲା ଭାଇ ଓ ଭଉଣୀଙ୍କ ଜୀବନ

ନୂଆଦିଲ୍ଲୀ: ଉତ୍ତରପ୍ରଦେଶର ସୁଲତାନପୁରରୁ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ବାଇକ‌ରେ ଯାଉଥିବା ଭାଇଭଉଣୀଙ୍କୁ ଦ୍ରୁତଗତିରେ ଆସୁଥିବା ଏକ ଟ୍ରକ ଧକ୍କା ଦେବାରୁ ଘଟଣାସ୍ଥଳରେ ଦୁହିଁଙ୍କ ମୃତ୍ୟୁ ହୋଇଯାଇଥିବା ଜଣାପଡ଼ିଛି। ପୁଲିସ ଭାଇ ଓ ଭଉଣୀ ଦୁହିଁଙ୍କ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇ ଦେଇ ଯାଞ୍ଚ କରୁଛି।

ପୁଲିସ ସୂତ୍ରରୁ ପ୍ରକାଶ, ଭାଇ କୃଷ୍ଣା କୁମାର ଭଉଣୀ ପୂଜାଙ୍କୁ ତାଙ୍କ ଶାଶୁଘରୁ ବାଇକେ ଯୋଗେ ବାପଘରକୁ ନେଉଥିଲେ। ଏହି ସମୟରେ ଦୁହିଁଙ୍କ ପଛରୁ ଦ୍ରୁତଗତିରେ ଆସୁଥିବା ଏକ ଟ୍ରକ ବାଇକକୁ ଧକ୍କା ଦେଇଥିଲା।

ଏହି ଧକ୍କାରେ ଭାଇ କୃଷ୍ଣା ଓ ପୂଜା ରାସ୍ତାକୁ ଛିଟିକି ପଡ଼ିଥିଲେ। ଘଟଣାସ୍ଥଳରେ କୃଷ୍ଣାଙ୍କ ମୃତ୍ୟୁ ହୋଇଥିବା ବେଳେ ପୂଜାଙ୍କୁ ସ୍ଥାନୀୟଲୋକ ଗୁରୁତର ଅବସ୍ଥାରେ ଉଦ୍ଧାର କରି ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରିଥିଲେ। କିନ୍ତୁ ଦୁଃଖର ବିଷୟ ଡାକ୍ତର ପୂଜାଙ୍କୁ ମୃତଘୋଷଣା କରିଥିଲେ।

ମୃତ ପୂଜାଙ୍କ ୨୦୨୯ରେ ବିବାହ ହୋଇଥିଲା। ତାଙ୍କର ଦୁଇବର୍ଷର କନ୍ୟା ସନ୍ତାନ ରହିଛି। ସେହିପରି କୃଷ୍ଣା ଘରର ଏକମାତ୍ର ପୁଅ ଥିଲେ। ସଡ଼କ ଦୁର୍ଘଟଣାରେ ପୁଅ ଓ ଝିଅ ଦୁହିଁଙ୍କୁ ଏକାଠି ହରାଇ ବାପା ଓ ମା’ ଭାଙ୍ଗି ପଡ଼ିଛନ୍ତି। ସେପଟେ ପୂଜାଙ୍କ ଛୋଟ ଝିଅ ବି ମା’ଙ୍କୁ ଅନେକ ସମୟ ହେବ ନପାଇ ରାହା ଧରି କାନ୍ଦୁଛି। ପୂଜାଙ୍କ ସ୍ବାମୀ ବି ଏ ଘଟଣାର ଖବର ପାଇବା ପରେ ସ୍ତବ୍ଧ ହୋଇଯାଇଛନ୍ତି।