ଗୋଲାପୀ ନ ଦିଶିଲେ ବି ଏପ୍ରିଲ୍ ୭ ତାରିଖ ଦିନ ଉଇଁବ ‘ସୁପର୍ ପିଙ୍କ୍ ମୁନ୍’
ନୂଆଦିଲ୍ଲୀ: ଏପ୍ରିଲ୍ ୭ ତାରିଖ ରାତ୍ରୀ ଆକାଶରେ ଦୃଶ୍ୟମାନ ହେବ “ସୁପର୍ ପିଙ୍କ୍ ମୁନ୍’ । “ସୁପର୍ ପିଙ୍କ୍ ମୁନ୍’ ହୋଇଥିଲେ ବି ସେଦିନ ପୃଥିବୀର ଉପଗ୍ରହ ଜହ୍ନ ଗୋଲାପୀ ଦିଶିବ ନାହିଁ। କିନ୍ତୁ, ବର୍ଷର ଅନ୍ୟାନ୍ୟ ପୂର୍ଣ୍ଣିମାର ଜହ୍ନ ଠାରୁ ଯଥେଷ୍ଟ ବଡ଼ ଦିଶିବ ।
Sambad is now on WhatsApp
Join and get latest news updates delivered to you via WhatsApp
ପୂର୍ଣ୍ଣମୀ ଦିନ ଜହ୍ନ ପୃଥିବୀର ଅପେକ୍ଷାକୃତ ନିକଟରେ ଥିବା ତା’ର କକ୍ଷପଥ ଗୋଟିଏ ମୁଣ୍ଡ ଦେଇ ଅତିକ୍ରମ କରୁଥିବା ବେଳେ ଟିକେ ବଡ଼ ଓ ଉଜ୍ଜ୍ୱଳ ଦେଖାଯାଏ । ଏହାକୁ ହିଁ “ସୁପର୍ ମୁନ୍’ କହନ୍ତି । ପୃଥିବୀ ଓ ଜହ୍ନ ମଧ୍ୟରେ ହାରାହାରି ଦୂରତ୍ୱ ୩୮୪, ୪୦୦ କିଲୋମିଟର ହୋଇଥିବା ବେଳେ ଏହି ସମୟରେ ଦୂରତ୍ୱ ଥାଏ ୩୫୬, ୯୦୭ କିଲୋମିଟର୍ । ସାଧାରଣ ପୂର୍ଣ୍ଣମୀ ଜହ୍ନ ଅପେକ୍ଷା ସୁପର୍ ମୁନ୍ ୩୦% ବଡ଼ ଦିଶେ ।
୭ ତାରିଖରେ ଦୃଶ୍ୟମାନ ହେବାକୁ ଥିବା “ସୁପର୍ ମୁନ୍’କୁ “ସୁପର୍ ପିଙ୍କ୍ ମୁନ୍’ କୁହାଯିବାର ଅନ୍ୟ କାରଣ ରହିଛି । ଏହି ସମୟରେ ଉତ୍ତର ଆମେରିକାରେ ଆରମ୍ଭ ହୋଇଥାଏ ଆଦ୍ୟ ବସନ୍ତ । ସେହି ସମୟରେ ସେଠାରେ “କ୍ରିପିଙ୍ଗ୍ ଫ୍ଲୋକ୍ସ’ ନାମରେ ଏକ ପ୍ରକାର ଗୋଲାପୀ ରଙ୍ଗର ବଣୁଆ ଫୁଲ ଫୁଟେ । ସେହି କାରଣରୁ ଏହି ବାସନ୍ତିକ ପୂର୍ଣ୍ଣମୀ ଜହ୍ନକୁ “ସୁପର୍ ପିଙ୍କ୍ ମୁନ୍’ ବା “ବଡ଼ ଗୋଲାପୀ ଜହ୍ନ’ କୁହାଯାଏ ।