ଏନଡିଏ ପ୍ରବେଶିକା ପରୀକ୍ଷାରେ ସାମିଲ ହୋଇପାରିବେ ମହିଳା: ସୁପ୍ରିମକୋର୍ଟ
ନୂଆଦିଲ୍ଲୀ: ମହିଳାମାନେ ଏବେ ଜାତୀୟ ପ୍ରତିରକ୍ଷା ଏକାଡେମି (ଏନଡିଏ) ପ୍ରବେଶିକା ପରୀକ୍ଷାରେ ସାମିଲ ହୋଇପାରିବେ। ଆଜି ଏ ନେଇ ରାୟ ଶୁଣାଇଛନ୍ତି ସୁପ୍ରିମକୋର୍ଟ । ମହିଳାମାନଙ୍କୁ ଏନଡିଏ ପ୍ରବେଶିକା ପରୀକ୍ଷାରେ ଭାଗ ନେବାର ସୁଯୋଗ ଦେଉନଥିବାରୁ ବୁଧବାର ସୁପ୍ରିମକୋର୍ଟ ଭାରତୀୟ ସେନାକୁ ନିନ୍ଦା କରିଛନ୍ତି। ସେନାର ନୀତିଗତ ନିଷ୍ପତ୍ତିକୁ ଲିଙ୍ଗଗତ ଭେଦଭାବ ବୋଲି କହିଛନ୍ତି ସୁପ୍ରିମକୋର୍ଟ ।
Sambad is now on WhatsApp
Join and get latest news updates delivered to you via WhatsApp
ତେଣୁ ସେପ୍ଟେମ୍ବର ୫ରେ ଧାର୍ଯ୍ୟ ହୋଇଥିବା ଏନଡିଏ ପରୀକ୍ଷା ଦେବାକୁ କୋର୍ଟ ମହିଳାମାନଙ୍କୁ ଅନୁମତି ଦେଇଛନ୍ତି। ସୁପ୍ରିମକୋର୍ଟ କହିଛନ୍ତି ଯେ, ନାଁ ଲେଖା କୋର୍ଟର ଅନ୍ତିମ ନିର୍ଦ୍ଦେଶ ଅନୁଯାୟୀ ହେବ। ଜଷ୍ଟିସ ସଂଜୟ କିଶନ କୌଲ ଓ ଜଷ୍ଟିସ ହୁର୍ଷିକେଶ ରାୟଙ୍କ ଖଣ୍ଡପୀଠ କୁଶ କାଲରାଙ୍କ ରିଟ୍ ପିଟିସନ ଉପରେ ଶୁଣାଣି କରି ଏଭଳି ନିଷ୍ପତ୍ତି ଶୁଣାଇଛନ୍ତି । ଏହା ପୂର୍ବରୁ ବି ଅନେକ ଥର ମହିଳାଙ୍କୁ ଏହି ପ୍ରବେଶିକା ପରୀକ୍ଷା ପାଇଁ ଅନୁମତି ଦେବାକୁ ଦାବି ହୋଇ ଆସୁଥିଲା ।
କୁଶ କାଲରା ନିଜ ରିଟ୍ ପିଟିସନ କହିଥିଲେ କି, ମହିଳାମାନଙ୍କୁ ଏନଡିଏ ପ୍ରବେଶିକା ପରୀକ୍ଷାରେ ବସିବାର ସୁଯୋଗ ନଦେବା ସମ୍ବିଧାନର ଅନୁଚ୍ଛେଦ ୧୪,୧୫,୧୬ ଓ ୧୯ ର ଉଲ୍ଲଂଘନ। ଏହାସହ ସେ କହିଥିଲେ ଯେ, ଦ୍ୱାଦଶ ପରୀକ୍ଷାରେ ପାସ କରିଥିବା ଅବିବାହିତ ପୁରୁଷ ଆଶାୟୀଙ୍କୁ ଏନଡିଏ ଓ ନୌସେନା ଏକାଡେମି ପରୀକ୍ଷାରେ ବସିବାକୁ ଅନୁମତି ଦେଉଛି ମାତ୍ର ଯୋଗ୍ୟ ଆଶାୟୀ ମହିଳାଙ୍କୁ ଲିଙ୍ଗ ବୈଷ୍ୟମତା ଆଧାରରେ ଅନୁମତି ଦେଉ ନାହିଁ । ଏନେଇ ସମ୍ବିଧାନରେ କୌଣସି ଉଚିତ କାରଣ ନଥିବା ନେଇ କୁଶ କାଲରା ନିଜ ପିଟିସନରେ କହିଥିଲେ ।