ମହାରାଷ୍ଟ୍ରର ମହିଳା ଓ ଶିଶୁ ବିକାଶ ବିଭାଗର ୬୩୦୦ କୋଟି ଟଙ୍କାର ଠିକାକୁ ରଦ୍ଦ କରିଲେ ସୁପ୍ରିମ୍ କୋର୍ଟ
ମୁମ୍ବାଇ: ସୁପ୍ରିମ୍ କୋର୍ଟ ମହାରାଷ୍ଟ୍ରର ମହିଳା ଓ ଶିଶୁ ବିକାଶ ମନ୍ତ୍ରୀ ପଙ୍କଜା ମୁଣ୍ଡେଙ୍କୁ ଏକ ବଡ଼ ଝଟକା ଦେଇଛନ୍ତି। ତାଙ୍କ ବିରୁଦ୍ଧରେ ଯେଉଁ ଦୁର୍ନୀତି ଅଭିଯୋଗ ଆସିଥିଲା ତାହା ଉପରେ ଏକ ଆଦେଶ ଦେଇଛନ୍ତି। ତାହା ଅନୁଯାୟୀ ମହିଳା ଓ ଶିଶୁ ବିକାଶ ପକ୍ଷରୁ ଦିଆଯାଇଥିବା ୬୩୦୦ କୋଟି ଟଙ୍କାର ଠିକାକୁ ରଦ୍ଦ କରିଛନ୍ତି ସୁପ୍ରିମ୍ କୋର୍ଟ । ଏହି ଠିକା ୨୦୧୬ରେ ଶିଶୁ ଏବଂ ମହିଳାମାନଙ୍କୁ ଆହାର ଯୋଗାଇବାଲାଗି ଦିଆଯାଇଥିଲା।
ଏହା ପୂର୍ବରୁ ମହାରାଷ୍ଟ୍ରର ମହିଳା ଓ ଶିଶୁ ବିକାଶ ମନ୍ତ୍ରୀ ପଙ୍କଜା ମୁଣ୍ଡେଙ୍କ ବିରୁଦ୍ଧରେ ତାଙ୍କର ଦାଦାପୁଅ ଭାଇ ତଥା ଏନସିପି ନେତା ଧନଞ୍ଜୟ ମୁଣ୍ଡେ ୧୦୬ କୋଟି ଟଙ୍କାର ଦୁର୍ନୀତି ଅଭିଯୋଗ ଆଣିଥିଲେ। ବିଧାନ ପରିଷଦରେ ବିରୋଧୀ ଦଳ ନେତା ଧନଞ୍ଜୟ ମୁଣ୍ଡେଙ୍କ ଅଭିଯୋଗ ଅନୁଯାୟୀ ପାନାସୋନିକ୍ ଏଲୁଗା-୧୭ ମୋବାଇଲ୍ ଫୋନ୍ର ଅନ୍ଲାଇନ ମୂଲ୍ୟ ୬ ହଜାରରୁ ୬ ହଜାର ୪ଶହ ଟଙ୍କା ଭିତରେ ରହିଛି। କିନ୍ତୁ ପଙ୍କଜା ମୁଣ୍ଡେ ଏହାକୁ ୮,୭୭୭ ଟଙ୍କାରେ କିଣିଥିଲେ।
Sambad is now on WhatsApp
Join and get latest news updates delivered to you via WhatsApp
ପଙ୍କଜା ମୁଣ୍ଡେ ୩୦ଟି ଜିଲ୍ଲାରେ ୮୫,୪୫୨ଟି ଅଙ୍ଗନବାଡି କେନ୍ଦ୍ର ପାଇଁ ୧.୦୨ ଲକ୍ଷ ମୋବାଇଲ୍ ଫୋନ୍ କିଣିଥିଲେ। ଏହି ଫୋନଗୁଡିକ ଅଙ୍ଗନବାଡି କର୍ମଚାରୀଙ୍କୁ ସିମ୍କାର୍ଡ ଓ ଇଣ୍ଟରନେଟ୍ ପ୍ୟାକ୍ ସହିତ ଦିଆଯାଇଥିଲା। ମହିଳା ଓ ଶିଶୁ ବିକାଶ ବିଭାଗ ବେଙ୍ଗଲୁରୁସ୍ଥିତ ମେସର୍ସ ସିଷ୍ଟେକ୍ ଆଇଟି ସଲ୍ୟୁସେନ୍ ପ୍ରାଇଭେଟ୍ ଲିମିଟେଡଠାରୁ ୫ ହଜାର ୧୦୦ ଅତିରିକ୍ତ ମୋବାଇଲ୍ ହ୍ୟାଣ୍ଡସେଟ୍ ମଧ୍ୟ କିଣିଥିଲେ । ଏହି ଦୁର୍ନୀତିର ତଦନ୍ତ ଦାବି କରି ଥିଲେ ଧନଞ୍ଜୟ ମୁଣ୍ଡେ।