ତାମିଲନାଡ଼ୁ ବ୍ୟକ୍ତିର ମୃତ୍ୟୁଦଣ୍ଡକୁ ୨୦ ବର୍ଷିଆ ଜେଲଦଣ୍ଡରେ ପରିବର୍ତ୍ତନ କଲେ ସୁପ୍ରିମ୍କୋର୍ଟ
ନୂଆଦିଲ୍ଲୀ: ୨୦୦୯ରେ ଜଣେ ୭ ବର୍ଷର ବାଳକକୁ ଅପହରଣ କରି ହତ୍ୟା କରିବା ଅଭିଯୋଗରେ ମୃତ୍ୟୁଦଣ୍ଡ ପାଇଥିବା ଜଣେ ତାମିଲନାଡ଼ୁ ବ୍ୟକ୍ତିର ଦଣ୍ଡ କୋହଳ କରି ସୁପ୍ରିମ୍କୋର୍ଟ ତାକୁ ୨୦ ବର୍ଷର ଜେଲଦଣ୍ଡାଦେଶ ଦେଇଛନ୍ତି। ପ୍ରଧାନବିଚାରପତି ଡିୱାଇ ଚନ୍ଦ୍ରଚୂଡ଼ ଏବଂ ଜଷ୍ଟିସ୍ ହିମା କୋହଲି ଓ ପିଏସ୍ ନରସିଂହଙ୍କ ତିନିଜଣିଆ ବେଞ୍ଚ ଦୋଷୀସାବ୍ୟସ୍ତ ସୁନ୍ଦରରାଜନର ରିଭ୍ୟୁ ପିଟିସନର ଶୁଣାଣି କରି ଉପରୋକ୍ତ ରାୟ ଦେଇଛନ୍ତି। ସୁନ୍ଦରରାଜନ ୨୦୦୯ରେ ଜଣେ ୭ ବର୍ଷର ବାଳକକୁ ତା’ ମା ଦେହ ଖରାପ, ତାକୁ ଡାକ୍ତରଖାନା ଯିବାକୁ ପଡ଼ିବ କହି ବାଇକରେ ବସାଇ ଅପହରଣ କରି ନେଇଥିଲା। ବାଳକଟି ତାଙ୍କ ବାପାମାଆଙ୍କର ଏକମାତ୍ର ପୁତ୍ର।
Sambad is now on WhatsApp
Join and get latest news updates delivered to you via WhatsApp
ସୁନ୍ଦରରାଜନ ବାଳକର ବାପାଙ୍କୁ ପୁଅର ଜୀବନ ବିନିମୟରେ ୫ ଲକ୍ଷ ଟଙ୍କା ମାଗିଥିଲା। ସେ ଟଙ୍କା ଦେଇ ନ ପାରିବାରୁ ସୁନ୍ଦରରାଜନ ବାଳକକୁ ତଣ୍ଟିଚିପି ହତ୍ୟା କରିଥିଲା। ଦୋଷୀ ସାବ୍ୟସ୍ତ ହେବା ପରେ ତାକୁ ମୃତ୍ୟୁଦଣ୍ଡାଦେଶ ହୋଇଥିଲା। ୨୦୧୩ରେ ମଧ୍ୟ ସୁପ୍ରିମ୍କୋର୍ଟ ଦଣ୍ଡାଦେଶକୁ କାଏମ୍ ରଖିଥିଲେ। ଏହାର ୫ ବର୍ଷ ପରେ ସୁପ୍ରିମ୍କୋର୍ଟ ସୁନ୍ଦରରାଜନର ରିଭ୍ୟୁ ପିଟିସନର ଶୁଣାଣି କରିବାକୁ ରାଜି ହୋଇଥିଲେ। ଶେଷରେ ମଙ୍ଗଳବାର ପ୍ରଧାନବିଚାରପତିଙ୍କ ସମେତ ତିନିଜଣିଆ ବେଞ୍ଚ ଦଣ୍ଡ କୋହଳ କରି ମୃତ୍ୟୁଦଣ୍ଡକୁ ୨୦ ବର୍ଷିଆ ଜେଲଦଣ୍ଡରେ ପରିଣତ କରିଛନ୍ତି।