ପ୍ରବାସୀ ଶ୍ରମିକଙ୍କ ଦୁର୍ଦ୍ଦଶାକୁ ନେଇ ନିଜ ଆଡ଼ୁ ମାମଲା ରୁଜୁ କଲେ ସୁପ୍ରିମକୋର୍ଟ, କେନ୍ଦ୍ର ଓ ରାଜ୍ୟ ସରକାରଙ୍କୁ ନୋଟିସ ଜାରି କଲେ
ନୂଆଦିଲ୍ଲୀ : ଦେଶରେ ଲକଡାଉନ ହେବା ପରେ ସବୁଠାରୁ ଅଧିକ ହିନସ୍ଥା ହେଉଛନ୍ତି ପ୍ରବାସୀ ଶ୍ରମିକ ବର୍ଗ । ଟ୍ରେନ, ବସ ଚଳାଚଳ ବନ୍ଦ ଥିବାରୁ ଲକ୍ଷ ଲକ୍ଷ ଶ୍ରମିକ ଶହ କିଲୋମିଟର ପାଦରେ ଚାଲି ଚାଲି ବା ସାଇକେଲରେ ନିଜ ରାଜ୍ୟକୁ ଫେରୁଛନ୍ତି । ବାଟରେ ଆସିବା ବେଳେ ଭୋକ ଓପାସରେ ନାନା ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି । ଏ ନେଇ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ସୁପ୍ରିମକୋର୍ଟ ଏ କ୍ଷେତ୍ରରେ ହସ୍ତକ୍ଷେପ କରିଛନ୍ତି । ଶୀର୍ଷ ଅଦାଲତ ନିଜଆଡ଼ୁ ମାମଲା ରୁଜୁ କରି କେନ୍ଦ୍ର ସରକାର ଓ ସମସ୍ତ ରାଜ୍ୟର ସରକାରଙ୍କୁ ନୋଟିସ୍ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ପ୍ରବାସୀ ଶ୍ରମିକଙ୍କ ସହାୟତା ପାଇଁ କଣ ପଦକ୍ଷେପ ନିଆଯାଉଛି ସେ ସଂପର୍କରେ ଜଣାଇବାକୁ ସୁପ୍ରିମକୋର୍ଟ କେନ୍ଦ୍ର ସରକାର ଓ ରାଜ୍ୟ ସରକାରମାନଙ୍କୁ ନୋଟିସ ଜାରି କରିଛନ୍ତି । ସୋଲିସିଟର ଜେନେରାଲ ତୁଷାର ମେହେତାଙ୍କୁ ମଧ୍ୟ କୋର୍ଟ ନୋଟିସ ଜାରି କରି ଜବାବ ତଲବ କରିଛନ୍ତି । କେନ୍ଦ୍ର ସରକାରଙ୍କ ପକ୍ଷ ରଖିବାକୁ ତାଙ୍କୁ ନିର୍ଦେଶ ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ଗୁରୁବାରଦିନ ହେବ ।
ଜଷ୍ଟିସ ଅଶୋକ ଭୁଷଣ, ଜଷ୍ଟିସ ସଂଜୟ କିଶୋର କୋଲ ଓ ଜଷ୍ଟିସ ଏମଆର ଶାହାଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରୁଛନ୍ତି । ଆଜି ଶୁଣାଣି ବେଳେ ଖଣ୍ଡପୀଠ କହିଛନ୍ତି ଯେ ଗଣମାଧ୍ୟମ ରିପୋର୍ଟରୁ ପ୍ରବାସୀ ଶ୍ରମିକଙ୍କ ଦୁର୍ଦ୍ଦଶା ଜଣାପଡ଼ୁଛି । ସରକାର ସେମାନଙ୍କ ସହାୟତା ପାଇଁ କେତେକ ପଦକ୍ଷେପ ନେଇଥିଲେ ମଧ୍ୟ ସେମାନଙ୍କ ଦୁର୍ଦ୍ଦଶା ସରୁନାହିଁ । ଏହି ପରିସ୍ଥିତିର ମୁକାବିଲା କରିବା ଲାଗି ଏକ ସମନ୍ୱିତ ଉଦ୍ୟମ ଲୋଡ଼ା ବୋଲି କୋର୍ଟ ମତ ଦେଇଛନ୍ତି ।