‘ପଦ୍ମାବତୀ’ର ଆପତ୍ତିଜନକ ଦୃଶ୍ୟକୁ ବାଦ୍ ଲାଗି ହୋଇଥିବା ଆବେଦନକୁ ଖାରଜ କଲେ ସୁପ୍ରିମ୍କୋର୍ଟ
ନୂଆଦିଲ୍ଲୀ: ‘ପଦ୍ମାବତୀ’ ଚଳଚ୍ଚିତ୍ରର କିଛି ଆପତ୍ତିଜନକ ଦୃଶ୍ୟକୁ ବାଦ ଦେବା ପାଇଁ ହୋଇଥିବା ଆବେଦନକୁ ସୋମବାର ସୁପ୍ରିମ୍କୋର୍ଟ ଖାରଜ କରି ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ମୁଖ୍ୟ ବିଚାରପତି ଦୀପକ ମିଶ୍ରଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଏହି ମାମଲାର ବିଚାର କରି ସୂଚୀତ କରିଛନ୍ତି ଯେ ଚଳଚ୍ଚିତ୍ରଟି ଏ ପର୍ଯ୍ୟନ୍ତ ସେଣ୍ଟ୍ରାଲ୍ ବୋର୍ଡ ଅଫ୍ ଫିଲ୍ମ ସାର୍ଟିଫିକେସନ(ସିବିଏଫ୍ସି)ର ସାର୍ଟିଫିକେଟ୍ ପ୍ରାପ୍ତ ହୋଇନାହିଁ । ତେଣୁ, ଏହି ମାମଲାରେ ହସ୍ତକ୍ଷେପ କରିବା ଅସଙ୍ଗତ ହେବ। ହସ୍ତକ୍ଷେପ କରିବା ପାଇଁ ଆମେ ଇଚ୍ଛୁକ ନାହୁଁ ବୋଲି ଶ୍ରୀ ମିଶ୍ର ତାଙ୍କ ରାୟରେ କହିଛନ୍ତି । ଏହି ଖଣ୍ଡପୀଠରେ ମୁଖ୍ୟ ବିଚାରପତି ଦୀପକ ମିଶ୍ରଙ୍କ ସମେତ ଏ ଏମ୍ ଖାନ୍ଓ୍ଵଲ୍କର୍ ଏବଂ ଡି ଓ୍ଵାଇ ଚନ୍ଦ୍ରଚୂଡ ସାମିଲ ଥିଲେ।
ଚଳଚ୍ଚିତ୍ରରୁ ଆପତ୍ତିଜନକ ଦୃଶ୍ୟ କାଟିବାକୁ ଆଇନଜୀବୀ ଏମ୍.ଏଲ୍ ଶର୍ମା ଆବେଦନ କରିଥିଲେ। ସେ ଅଭିଯୋଗ କରିଥିଲେ କି ସେନ୍ସର୍ ବୋର୍ଡ ଏ ପର୍ଯ୍ୟନ୍ତ ସାର୍ଟିଫିକେଟ୍ ପ୍ରଦାନ କରିନାହିଁ, ମାତ୍ର ଚଳଚ୍ଚିତ୍ରର ‘ଘୁମର୍’ ନୃତ୍ୟ ରିଲିଜ୍ ହୋଇସାରିଲାଣି।
ଉଲ୍ଲେଖଯୋଗ୍ୟ, ଡିସେମ୍ବର ୧ ତାରିଖରେ ରିଲିଜ୍ ହୋଇଥାନ୍ତା ବହୁ ପ୍ରତୀକ୍ଷିତ ଚଳଚ୍ଚିତ୍ର ‘ପଦ୍ମାବତୀ’। ମାତ୍ର ଚଳଚ୍ଚିତ୍ରର ପ୍ରଯୋଜନା ସଂସ୍ଥା ପକ୍ଷରୁ ଚଳଚ୍ଚିତ୍ରଟିକୁ ପୂର୍ବ ନିର୍ଦ୍ଧାରିତ ତାରିଖରେ ରିଲିଜ କରିବାକୁ ମନା କରି ଦିଆଯାଇଛି। ରିଲିଜ୍ ତାରିଖ ଏ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।