ସୁପ୍ରିମକୋର୍ଟଙ୍କ ଚେତାବନୀ,ଏହି ଭିଡିଓ ଦେଖିଲେ-ଡାଉନଲୋଡ୍ କଲେ ଯିବାକୁ ପଡ଼ିବ ଜେଲ୍‌...

ନୂଆଦିଲ୍ଲୀ: ମୋବାଇଲରେ ଭିଡିଓ ଦେଖୁଥିବା ଲୋକଙ୍କୁ ସୁପ୍ରିମକୋର୍ଟ ଚେତାବନୀ ଦେଇଛନ୍ତି। ବାସ୍ତବରେ ସୁପ୍ରିମକୋର୍ଟ ନିଜର ଏକ ରାୟରେ ଶିଶୁ ଅଶ୍ଳୀଳତା(ଚାଇଲ୍ଡ ପୋନୋଗ୍ରାଫି)କୁ ଅପରାଧ ବୋଲି ଘୋଷଣା କରିଛନ୍ତି।

 କୋର୍ଟ ନିଜର ଐତିହାସିକ ରାୟରେ କହିଛନ୍ତି ଯେ ଅନଲାଇନରେ ପିଲାମାନଙ୍କର ଅଶ୍ଳୀଳ କ୍ଲିପ୍ ଦେଖିବା କିମ୍ବା ଡାଉନଲୋଡ୍ କରିବା ଏକ ଅପରାଧ। ତେବେ ଆଇନର ଅପବ୍ୟବହାର ମଧ୍ୟ ସମ୍ଭବ ବୋଲି କୋର୍ଟ ସ୍ୱୀକାର କରିଛନ୍ତି। ଏଭଳି ପରିସ୍ଥିତିରେ ଏହାକୁ କଡ଼ାକଡ଼ି ଭାବେ କାର୍ଯ୍ୟକାରୀ କରାଯିବା ଆବଶ୍ୟକ ବୋଲି ଶୀର୍ଷକୋର୍ଟ କହିଛନ୍ତି।

ସୂଚନାଯୋଗ୍ୟ, ଦେଶରେ ଅନେକ ଅନ୍‌ଲାଇନ ୱେବସାଇଟ୍ ଏବଂ ସୋସିଆଲ୍ ମିଡିଆ ପ୍ଲାଟଫର୍ମ ଅଛି, ଯେଉଁଠାରେ ପିଲାମାନଙ୍କର ଅଶ୍ଳୀଳ ଭିଡିଓ ସହଜରେ ଉପଲବ୍ଧ। 

ଯଦି ୟୁଜର ମୋବାଇଲ୍, ଲାପଟପ୍ କିମ୍ବା ଅନ୍ୟ କୌଣସି ଉପକରଣରେ ପିଲାମାନଙ୍କର ଅଶ୍ଳୀଳ ଭିଡ଼ିଓ ଦେଖନ୍ତି କିମ୍ବା ଡାଉନଲୋଡ୍ କରନ୍ତି, ତେବେ ସେମାନଙ୍କୁ ଏଥିପାଇଁ ଜେଲ୍ ଯିବାକୁ ପଡିବ ବୋଲି କୋର୍ଟ କହିଛନ୍ତି।

ମାଡ୍ରାସ ହାଇକୋର୍ଟଙ୍କ ନିଷ୍ପତ୍ତିକୁ ଶୀର୍ଷକୋର୍ଟଙ୍କ ରାୟ ରଦ୍ଦ କରିଦେଇଛି। ମାଡ୍ରାସ ହାଇକୋର୍ଟ ଶିଶୁ ଅଶ୍ଳୀଳତାକୁ ଅପରାଧ ବୋଲି ବିବେଚନା କରି ନ ଥିଲେ। ଆଇଟି ଆକ୍ଟ ଏବଂ ପୋକ୍ସୋ ଆକ୍ଟ ଅନୁଯାୟୀ ଶିଶୁ ଅଶ୍ଳୀଳତା ଆଧାରରେ ଏକ ମାମଲା ଦାୟର କରାଯାଇପାରିବ ବୋଲି ଶୀର୍ଷକୋର୍ଟ କହିଛନ୍ତି। ଶିଶୁ ଅଶ୍ଳୀଳତା ଦେଖିବା କିମ୍ବା ଭିଡ଼ିଓ ଡାଉନଲୋଡ୍ କଲେ ୟୁଜରଙ୍କୁ ଜେଲ୍‌ ଯିବାକୁ ପଡିବା ସହିତ ଜରିମାନା ଲାଗୁ କରାଯାଇପାରିବ।

ଏହା ସହିତ ସୁପ୍ରିମକୋର୍ଟ  କହିଛନ୍ତି ସରକାର ଏ ସମ୍ପର୍କରେ ଏକ ନିୟମ ଆଣିବା ଉଚିତ୍। ତା’ପରେ ଏହାକୁ ସଂସଦରେ ଉପସ୍ଥାପନ କରିବା ଏବଂ ନାମ ପରିବର୍ତ୍ତନ କରିବା ଜରୁରୀ।

ସରକାର ଏହିପରି ଆପ୍ ଏବଂ ସାଇଟ୍ ଉପରେ ପ୍ରତିବନ୍ଧକ ଲଗାଇଛନ୍ତି। କିନ୍ତୁ ବର୍ତ୍ତମାନ ଭିଡିଓ ଯୋଗାଇବା ସହିତ ଯେଉଁମାନେ ଭିଡିଓ ଦେଖୁଛନ୍ତି ଏବଂ ଡାଉନଲୋଡ୍ କରୁଛନ୍ତି ସେମାନଙ୍କୁ ମଧ୍ୟ ଅପରାଧୀ କୁହାଯିବ। ଯଦି ୟୁଜର ଶିଶୁ ପୋର୍ନୋଗ୍ରାଫି ଦେଖନ୍ତି, ତେବେ ସେ ଅନଲାଇନ୍ ମୋଡ୍ ମାଧ୍ୟମରେ ଧରାପଡିପାରିବେ। କାରଣ ତାଙ୍କର ଅବସ୍ଥାନ ତାଙ୍କ ଆଇପି ଠିକଣାରୁ ଟ୍ରାକ୍ ହୋଇପାରିବ।